《台灣個表妹嚟咗我屋企住》【完】: (五十七)中辣嘅程度

睇住小南嗰碗米線啲煙霧係咁向上噴，我真係擔心佢會食唔到。

「嘩！好似幾好味咁喎！」

「表妹你食唔到就出聲啦，唔好死頂呀。」

「哈⋯你顧掂你自己先啦。」

好！就睇下你會唔會食到面容扭曲。





見住小南飲完一羹湯，再夾啲米線嚟食，食多粒牛丸，依然面不改容⋯⋯

不過好快就嚟料㗎啦！

但見佢繼續食落去，好似咩事都冇咁，仲好悠閑咁問我：「表哥你唔食嘅？」

「吓⋯我食㗎啦。」

睇嚟我真係太睇小表妹可以食辣野嘅程度。





我食自己碗中辣乍醬腩肉米線，都已經食到條脷都開始麻痹晒，而且越食就越熱，開幾大冷氣都冇用。

食食下，仲忍唔住要嗌多杯凍檸茶嚟飲。

中辣嘅程度，食到我成條脷都無晒知覺，但正正因為呢種刺激感先吸引到我嗌中辣嚟食，所以每一次我都係叫呢一個組合—中辣乍醬腩肉米線。

相反，坐我對面嘅小南真係一啲事都冇，仲食得津津有味咁嘅樣，到底佢嘅直頭係用咩構造㗎？可以完全唔覺得辣都有嘅？

「喂⋯喂⋯表⋯妹⋯」因為太辣嘅關係，搞到自己講嘢都有啲口齒不清。





「表哥做咩呀？」小南一邊夾緊米線食，一邊望住我。

驟眼咁望落去，小南塊面係成條紅蘿蔔咁紅。

「喂⋯乜你⋯唔覺得⋯好辣咩？」

「吓⋯差唔多啦。」

點解小南仲可以咁輕鬆答返我？佢嗰碗係咪最辣㗎？定還是係清湯？但睇過顏色又唔多似喎，小南又食到塊面紅卜卜咁。

一試便知龍與鳳，就等我試下佢碗嘢先！

「表妹⋯畀一羹湯嚟試下啦。」

「你咪有囉。」





「咁⋯你⋯嗰啲⋯唔同呀。」

「哦⋯咁你試下囉。」

我手震震咁拎起匙羹，喺小南碗米線度舀咗一啖嚟飲。

一飲落去⋯⋯

咳咳！

我即時就咳聲幾聲，發覺佢嗰碗係辣過我嗰碗十倍有多。