《台灣個表妹嚟咗我屋企住》【完】: (六十五)再見

之後我送阿琪去到小巴站搭車，喺路上佢就將兩年前嘅事情娓娓道來⋯⋯

「其實嗰陣係因為屋企人要移民去加拿大，所以逼我都要過去，所以⋯⋯」

「但咁突然嘅事，點解你嗰陣唔同我講？本來好地地仲一齊去行書展，過咗兩個禮拜你就無啦啦同我講分手，唔通唔可以講清楚啲咩？」講講下，我都有啲激動。

「我知道你一定接受唔到㗎，或者係因為我哋太鍾意對方，我知道我呢次一去外國就可能好耐都唔會返嚟香港，異地戀你接受到咩？我唔想要你同一齊去面對呢啲未知嘅將來，邊個可以肯定將來係一定依照自己嘅想像嚟實現？我唔想你同我都辛苦呀！我唔想令你更加難受呀！我唔想⋯⋯呀⋯⋯」

阿琪嘅眼淚忍唔住湧咗出嚟，於是佢抬高頭擰轉一面望向星空，假裝冇事嘅同時順便逃避一下我嘅目光。





其實愛情無分對錯，事到如今邊個都唔應該話邊個。當日阿琪就咁走咗去，都有佢嘅苦衷，我真係唔應該用怪責嘅語氣對待佢。

雖然到最後兩敗俱傷，我同阿琪都係只得悲痛嘅結果。

「你講得啱，或者係因為我哋太鍾意對方⋯⋯變得更加難開口⋯⋯」

「都⋯⋯都過咗咁耐啦⋯⋯我哋⋯⋯我哋都係時候真正放低。」阿琪咽喉咁話。

「嗯⋯⋯可能當初同你異地戀，我哋最終都會分手。」





「嗯⋯⋯」

可能初戀係必然殘酷，人生中第一次嘗到各種動心嘅經歷，各種美好嘅回憶，就最好停留係最適合嘅一刻。

我會將嗰個過去留喺我同阿琪成日一齊去嘅糖水舖，初次相識嘅班房入邊，而且永遠放喺我心入面。

一直以嚟嘅疑問終於得到答案，長久嘅心結終於可以解開。

行下行下，我同阿琪就行到去小巴站。





此時，佢喺個袋度拎咗一本書畀我。

「交返畀你㗎。」阿琪話。

「呢本係？」當下嘅我相當驚訝。

「你本書囉。」

阿琪畀我嘅，係我喺書展有拎埋親筆簽名嘅一本小說，但當日暈低咗之後，連本小說都不翼而飛。

「點解喺你度嘅？」

「嘻⋯嗰日係我幫你Call白車㗎，估唔到你仲係咁鍾意睇書。」

「又會咁啱嘅⋯⋯咁都撞到你但又見唔到。」





「咁你依家有冇事？」

「都冇咩事，嗰日咁啱冇食嘢啫。」

「係喎，當時仲有個女仔係咁喊住叫你起身，佢係⋯⋯你女朋友？」

「哈⋯邊係啫，嗰個表妹嚟啫。」

「哦⋯⋯咁佢對你都幾特別喎。」

「幾特別？」

「唔知呀，可能係第六感，我覺得佢唔只係當係表哥咁簡單。」





「哈⋯你講咗去邊呀，我同佢冇嘢㗎。」

「點都好啦，阿星⋯⋯」

阿琪又忽然感觸起嚟，好認真咁同我講⋯⋯

「你要應承我，搵過一個你鍾意嘅人，然後慢慢忘記我，可能今次係我哋最後一次見面啦。」

「你講笑咩？咩嘢最後一次見呀？你想見我隨時都得啦。」

「但我怕⋯⋯我又再傷心多一次⋯⋯其實我仲係好愛你⋯⋯」

「阿琪⋯⋯」

突然之間嘴唇有一種甜蜜嘅感覺，封住我說話嘅機會，䁔意緊緊咁撫慰住我嘅心靈，曾經擁有過嘅暖意再度回來，遺憾係只有一瞬間。





失去後又再次失去。

一個長吻過後，阿琪成個人攬住我，然後將塊臉緊緊依靠住我嘅心口。

我哋兩個都冇再出聲講嘢，默不作聲任由空氣凝結，沉寂一時。

唔知過咗幾耐，小巴嚟到了。

阿琪先至依依不捨咁上車。

「再見啦，阿星⋯⋯」

「再見⋯⋯」





多一句話都唔知講咩好，我只係企喺原地目送住阿琪離去，直到離開我嘅視線範圍。

再見，有機會再見嗎？

可能因為命運嘅作弄，令我哋冇辦法一齊。

但你讓我擁有嘅甜蜜回憶，我永遠都唔會忘記。

我永遠都會喺心入面為你留一個好重要嘅位置。

阿琪，多謝你喺我生命出現過。