《台灣個表妹嚟咗我屋企住》【完】: (六十九)黑暗中的⋯⋯

眨下眼就踏入咗八月份，同樣嘅炎炎夏日，唔同嘅係距離開學同埋小南離開嘅時間越嚟越近。

我就繼續溫下書，陪下表妹打發時間。

除此之外都冇咩好做⋯⋯

成日都帶表妹去一啲自己去過嘅地方，對我嚟講梗係冇咩新鮮感，所以今日就想帶佢去一個連我自己都未去過嘅地方，就當係探下險，順便練下膽。

而呢個地方⋯⋯





「好黑呀！表哥！呢度係邊度呢㗎？」

「呢度？黑洞呀，我特登帶你嚟探索宇宙嘅奧秘。」

「唔好啦⋯咩都睇唔到喎⋯」

「行啦，有人帶住我哋㗎嘛。」

「但⋯但係⋯」





「做咩呀？」

「我怕黑㗎⋯唔制呀！我唔行呀！」

「都唔係好黑啫⋯」雖然係喺好黑暗嘅環境當中，但我仍然好微弱咁見到小南嘅身影，於是我就伸手去拉一拉佢嘅手臂。「行下啦。」

「唔制呀！」但係小南偏偏寸步不讓。

只係啱啱入咗去黑暗中對話體驗館，小南就十足十即將畀人拖入屠宰場嘅肥豬一樣大吵大鬧，而且一步都唔願郁。





唯一唔同嘅係佢冇咁多肥膏⋯⋯

「我又唔係午夜屠夫，你又唔係多肉，唔通真係鋸咗你咩？」得知小南嘅反應，我就彈出如此想法。

「最多行完之後陪你食嘢啦！」我溫柔咁勸喻佢。

「唔制！」小南好堅持咁講。

唔會啩？連殺手鐧都出埋都對表妹冇咩用？

佢仲要諗唔使諗就答返我，睇嚟「怕黑」同埋「食物」比較之下，食物嘅引誘竟然完全比唔上小南怕黑嘅弱點。

上次睇戲，小南又係驚到要攬實我，到咗戲院開返燈先肯放手。

睇嚟今次連殺手鐧都失效嘅時候，我又要用另外一個方法啦！





不知那裏來的勇氣，我冇再拉住佢纖細嘅手臂，而係好大膽咁捉住咗佢隻手。

突然一股暖意游過手掌，湧上心頭。

好耐都冇試過拖住人哋隻手，依家拖住小南嘅纖纖玉手，呢種感覺真係唔知點形容好。

「表哥⋯做⋯做⋯做咩呀？」小南顯然地十分之錯愕。

「嗱⋯表哥咁樣拖住你行，咁得喇啩？」我話。

「吓⋯」

「放心啦，表哥唔會放手嘅。」





「嗯⋯」

跟住小南就好乖咁畀拖住去行，我哋跟住個領賞員，唔知行咗幾耐，只記得一路上，小南都冇再出聲，只係不時聽到佢喘氣嘅聲音，而佢隻手依然係好暖好暖。

不過如果我唔咁做，我諗表妹仍然會企喺入口位置度唔肯行。