《台灣個表妹嚟咗我屋企住》【完】: (七十一)長洲賓客人數多

風和日麗，陽光燦爛⋯⋯

呢兩個四字詞用嚟形容今日嘅天氣就最適合不過。

差唔多中午時分，我就叫小南留定肚，然後帶住佢去到碼頭，搭船去到呢個同旺角人流一樣嘅小島—長洲。

只係排隊去搭船，就已經唔知用咗幾耐時間⋯⋯

一上到去架船上面坐低，小南就失去平時嘅笑臉，有啲緊張咁同我講：「表哥呀⋯⋯你識游水㗎呵？」





莫非小南係第一次搭船？

「哈⋯點解你咁問嘅？」

「因為我驚我會唔小心跌咗落船⋯⋯」

小南又會有啲咁天馬行空嘅想法㗎⋯真係搞笑。

我用手指輕輕彈咗佢一下額頭，然後笑住話：「傻妹！我就算唔識游水都跳落去救你先啦。」





「我認真㗎！咁你係咪識游水㗎？」

呢種問題⋯⋯通常都係女朋友用嚟試探男朋友想做裙腳仔定係老婆奴，即係一齊跌落水會救老母定女友嗰啲，之但係冇女友嘅我都要答呢啲問題，真係有種莫名嘅悲衰。

「識！梗係識啦。」

「真係？」

「係呀，講你又唔信⋯你痴住我咪唔會跌落船囉。」





「咁我痴實你啦！」

言而，小南並唔係一直痴實我，喺大約一個鐘嘅船程，佢都要去一去廁所。

睇住佢步履蹣跚咁行去，除咗可笑之外，都有啲擔心⋯⋯

唉呀！我肯定畀個白痴表妹嘅傻氣感染咗，好地地又點會跌落船呀？鐵達尼號咩？[banghead]

涼爽嘅微微海風吹過⋯⋯輕撫住我嘅臉龐。

聽住嗰啲好有歷史嘅引擎聲⋯⋯好期待。

心情亦如同海面一樣⋯⋯起伏不定。

正當我用身體嘅感官享受緊呢啲獨有嘅感覺⋯⋯話咁快就喺船上就見到不遠處有一個島嶼。





無法再自我陶醉，就只好返嚟現實。

嚟到眼前呢個長洲⋯⋯

吃喝玩樂，我諗缺一不可，所以有先見之明嘅我就一早拎多啲錢嚟。

落咗船，離開碼頭後先入眼簾嘅並唔係嗰啲因美食而聞名嘅鋪頭。

而係人流！人群洶湧嘅景象，其實唔意外呀⋯⋯

暑假日日都多人是正常吧！

「嘩！星星表哥，呢度咁多人⋯你會唔會暈低㗎？」小南話。





「表妹你幾時學識抽水㗎？我一早食咗藥啦，唔會有事。」

「吓⋯⋯咩叫抽水呀？」

「你想知？」

「係呀。」

既然係咁，我就滿足下佢嘅好奇心啦⋯⋯

跟住我耷低頭靠近小南耳邊，細細聲咁同佢講：「唔話你知喎⋯⋯」

「吓⋯喂呀！」小南畀我激到跳下跳下。「你之前明明講好咗話唔再恰我㗎喎！」

「哈⋯得得得！」喺佢再搬我老豆出嚟之前，我就畀咗個建議佢：「想我解釋畀你知都得！不過要玩個遊戲先。」





「咩遊戲呀？」小南好天真咁問我。

而我呢個突發奇想嘅遊戲，就好邪惡了⋯⋯

「好簡單啫！一條IQ題。」我話。

「車⋯我仲以為係咩嘢添，快啲講啦！我係IQ題大師嚟㗎！」小南露出一副自大狂妄嘅樣子。「冇一條IQ題會難得到我囉！」

自大唔係唔好，不過呢條IQ題你點估都估唔到㗎啦⋯⋯

「嗱！聽住喇！點解長洲賓客人數多？」