幸福而平淡嘅日子又過多日,我今日依然留喺屋企睇住小南嘅小說,陪喺佢身邊,唔同前幾日嘅係小南已經好返好多,冇好似之前咁痛到要生要死。

突然之間,小南又問我啲無聊問題⋯⋯

「表哥呀,其實你幾時先會恢復返啲記憶㗎?」

「咩記憶呀?」我一邊低頭睇住,一邊問。

「你望住我先啦!」小南用雙手夾住我個頭,逼我擰過去望住佢。「你真係唔記得我哋前世嘅嘢?」





「咩呀?我記唔記得都咁鍾意你㗎啦。」

「講真㗎!咪口花花啦⋯⋯」

其實我對當日小南講嘅嘢依然半信半疑,好有可能係小南唯一玩得到我嘅事情,亦有可能係真。

乜嘢宿世姻緣⋯⋯

乜嘢我會死⋯⋯





如果係真嘅話都幾神奇,完全顛覆咗呢個現實嘅世界以及人類嘅認知,所以我係抱着半信半疑嘅心態去面對呢種事情。

「我真係唔知喎⋯⋯咁你點記得返㗎?」我問。

「我係睇完一本書之後記得㗎,睇哂之後好似隱約覺得自己經歷過書入面嘅事咁,慢慢諗諗下,啲記憶就出哂嚟。」小南好認真咁講。

以我認識嘅小南不嬲都唔識講大話,所以都幾肯定佢講緊真話。

但又叫我點相信啲咁荒謬嘅事呢?我估最有可能係嗰本書嘅代入感實在太強,令小南代入埋個角色入面,甚至將角色嘅記憶轉化為自己嘅記憶,因而令腦袋變得模糊。





我都試過⋯⋯

「咁⋯⋯嗰本書呢?可以我睇下就會記得返呢。」

「本書⋯我冇拎埋嚟呀。」

「就算唔記得都冇所謂啦,我哋都一齊咗啦。」

「咁又係⋯⋯」

唔使理會其他奇奇怪怪嘅嘢,只要珍惜眼前尚有嘅時光,擁有嘅東西就足夠,當時我係咁樣諗⋯⋯

小南話喺屋企匿咗幾日好想去街,而我當然冇所謂啦,畢竟終於可以明正言順拖實小南去行街,用另一個身份去建立屬於我同佢獨有嘅回憶。

拖住佢,走過街道。





人海裡,我眼中只有佢。

喺街上見到啲有趣嘅事,我哋會雙視而笑。

見到感興趣嘅事物,我哋會互相分享講畀大家知。

例如小南見到個冒險樂園好似幾得意咁,就拉咗我入去玩,玩下籃球機,又玩下擲彩虹。

快快樂樂又一日⋯⋯

呢啲回憶,就係書本嘅幻境製造唔到,而現實就可以建立起嚟。

所以,我會識得珍惜。





可惜,有時並唔係任何嘢都有得畀你去珍惜。