「你知唔知呀?頭先套戲真係好慘㗎,男女主角係青梅竹馬嚟,一直以嚟都深愛對方但係又冇講出口,所以錯過咗好多好多嘢。」小南越講就越唔開心。:-(

的確,一段無法釋懷嘅關係往往充滿住好多遺憾。

講唔出嘅說話⋯⋯

送唔出嘅禮物⋯⋯

要是我同初戀嘅分開係因為錯過咗某啲嘢,咁應該係我唔了解佢,冇真正咁好好了解過佢。





所以我唔想再有任何遺憾喺另一段關係上。

每段關係嘅結束,都會令人變得成熟。

「咁你頭先喊咩呀?」我問。

「因為⋯⋯個結局仲慘呀!」講下講下,小南嘅雙眼又慢慢泛紅。「最後個女主角有病入咗醫院,而男主角喺佢身邊陪住佢,又氹佢笑,女主角知道自己時日無多所以就對男主角好冷淡,但男主角都冇放棄過,反而決定向女主角表明心跡,點知就喺想講嘅前一刻⋯⋯女主角⋯⋯」

小南雙眼更紅,聲線亦變得沙啞,彷似唔忍心將個結局講埋落去。





「聽唔到就離開咗?」我幫佢接埋落去。

「嗯嗯⋯⋯」小南點一點頭,看似就快要喊出嚟。

「喂,唔使喊呀?戲嚟㗎咋!唔係真㗎,如果現實嘅話,男主角一早講咗啦?使等咁耐?」我咁講,係希望令小南抽離出個角色。

戲入面嘅男主角如果一早願意講出自己心意,根本唔會落得一個悲劇嘅下場,但係要是調返轉,當我哋成為男主角嘅時候,可能都係一個連表白勇氣都冇嘅懦夫。

呢種咁韓劇feel嘅故事我聽得多,一早就唔會話有太大感覺。





不過每次知道係悲劇收場,我個心總會覺得好辛苦。

所以如果係我作嘅故事,我一定會以開心結局嚟收尾。

因為人生在世都已經經歷咗咁多悲劇,何必仲要喺故事入面經歷多次,傷心多次呢?

「你究竟明唔明我唔開心啲咩㗎?」小南以不屑嘅眼神望向我。

「吓⋯⋯明呀。」

「你都唔明!」

「咩呀?」我怔咗一怔,摸住個頭話:「我點會唔明呀?你因為個結局太慘而喊呀嘛⋯⋯乜唔係咩?」

我實在唔明白到底小南點解話我唔明白。





媽呀!好亂呀!

「梗係唔係啦!算啦⋯⋯講你都唔明㗎啦。」

「你講我咪明囉。」

如是者,我同小南玩咗好耐「明定唔明」嘅說話遊戲。

玩到咁上下,小南又問我⋯⋯

「星星,如果我有一日死咗,你會點呀?」