到咗第二日,我嘅心情一時之間都仍未能平復,腦海中對媽媽嘅思念一發不可收拾⋯⋯

唯有攬住小南嘅時候,先可以暫時忘卻。

「喂呀,你唔好咁唔開心啦,我今日陪你出街玩啦,好冇?」瞓喺我隔離嘅小南話。

「好⋯」

跟住我就真係跟住小南出街四周圍行,但點解變咗小南帶我玩嘅⋯⋯





同佢行下公仔店睇下可愛嘅毛公仔,又行下人來人往嘅街道,聽住佢講埋啲答案古怪嘅IQ題,見住佢一直笑嘻嘻又傻呼呼咁想令我笑返,我本來都想擠出笑容。

但發現畀佢嘅傻氣感染完,原來我嘅笑,係會心微笑。

「好嘢!你終於笑啦!」小南好欣喜咁講。

「乜我平時唔笑㗎咩?」我問。

「笑⋯⋯平時都會笑嘅,但係今次笑得自然啲。」小南行到我面前,用力咁搣我塊面。「再笑多次啦!我鍾意你笑嘅樣。」





「嘻⋯嘻⋯」我假裝牽強咁笑。

「唔合格呀!笑得好猥瑣呀你!」小南用雙手玩弄我嘅嘴唇。「咁樣⋯⋯嘻嘻⋯⋯孖膶腸都幾襯你喎。」

呢一刻,我只係想緊緊咁攬實小南,好簡單咁講一句:「多謝你。」

「多謝你,小南。」

你同我講咗兩次,今次輪到我講返畀你聽。





「多謝你⋯⋯對我咁好。」

冇人好似你咁對我咁好,咁細心照顧我。

「咁因爲你都對我好好呀,唔係咩?所以我先至會咁鍾意你。」小南嘅雙手慢慢遊走到我背後。

我哋兩個企咗喺人來人往嘅街上,喺旁人眼中我哋係一對小情侶喺度相擁⋯⋯

閉起雙眼你最掛念誰

再唔係對媽媽嘅掛念,而係小南⋯⋯

眼睛張開身邊竟是誰

一直想著同埋擁有緊嘅人都係你,我好開心⋯⋯





當愛意升華到另一個層次⋯⋯

原來所謂「多謝」就係咁嘅意思。