返屋企嘅路上,小南突然停下腳步拉住我嘅手。

「嗯?」

「表哥,你睇下嗰邊!」小南指向嘅位置,有一個喺原地哭泣嘅細路哥。「嗰個小朋友好似唔見咗媽媽喎⋯⋯」

「咁去睇下啦。」

「好呀!」





小南拉住我,去到個細路哥嘅面前,只見佢嗚嗚咁喊晒口,喊到雙眼都紅晒。

由於個細路哥實在太細粒,所以小南就彎低腰慰問一下佢:「小朋友你冇事呀嘛?」

「嗚⋯⋯姐姐!媽媽⋯⋯唔見咗呀⋯⋯」果然同小南嘅猜想一樣。

「咁呀⋯⋯咁姐姐帶你去搵媽媽啦。」小南話。

「嗚⋯⋯真係?」細路哥問。





「係呀!嚟啦,拖住姐姐,話我知你媽媽行咗去邊。」小南向個細路哥伸出溫暖嘅手。

「嗯嗯!」細路哥點點頭回應。

然之後,小南就拖住個細路哥,我就拖住小南,好似一家三口咁踏上咗尋回媽媽之路。

可惜我係幫人搵,而唔係自己搵,因為我嘅媽媽,已經想搵都搵唔到。

行咗好耐,我哋都搵唔到個細路哥嘅媽媽,只好休息一下再作計劃。





大熱天時,我哋就買咗三支甜筒坐喺公園度食。

「多謝哥哥,多謝姐姐!」細路哥好可愛咁舔住支甜筒。

「咁就乖啦!」我摸一摸佢個頭,估唔到呢個小朋友咁有禮貌。

「唉⋯⋯」聽到小南長嘆一聲,有甜筒食都唔開心。「但係我幫唔到你搵返媽咪呀⋯⋯」

「唔緊要啦,一定搵到嘅!」呢刻好需要我振奮一下士氣。

細路哥望望我,又轉個頭去望下小南,然後話:「哥哥姐姐,你哋係咪兩夫妻呀?你哋好似我爸爸媽媽呀!」

「哈哈⋯⋯」我同小南同時候笑咗出嚟。

小朋友應該係最純真嘅人,如此的話真令人哭笑不得。





「小朋友乖!我同哥哥未結婚㗎。」小南笑住話。

「咁你哋幾時會結婚呀?」細路哥又問。

呢刻,我同小南面面相覷,被一個小朋友道出咗現實。

如果有朝一日,我同小南結婚嘅話,應唔應該擺酒呢?

請晒全部親戚嚟?但鑒於我同小南係表兄妹嘅身份,又好似有啲尷尬喎⋯⋯

不過點都好⋯⋯

「我一定會娶姐姐,六年!六年之後,我一定會娶姐姐!」我又作出一個承諾,但呢個承諾並不虛無,我係好信心做得到。





六年之後,嗰陣我應該讀完書,出嚟做緊嘢,搵到足夠嘅錢之後,我就會親手為小南帶上戒指,娶佢為妻。

呢個,就係我渴望得到嘅結局。

小南聽完之後,呆咗一下,然後又似笑非笑咁話:「乜你諗好哂㗎喇?你叫我點畀反應你喎⋯⋯」

「我⋯⋯」正當我想開聲回應嘅時候⋯⋯

「希仔!」喺不遠處有一個中年女人好慌張咁衝過嚟。

「媽媽!」睇嚟個中年女人係細路哥嘅媽媽,原來個細路哥叫希仔。

希仔嘅媽媽好緊張咁衝過嚟攬住希仔。

「你頭先去咗邊呀?我叫咗你企定定等我㗎嘛⋯⋯嚇死我咩?」





「咁我等咗好耐都唔見你嘛,跟住哥哥姐姐就帶咗我去搵你啦!」

希仔嘅媽媽瞧一瞧我哋,好冷淡咁講咗句:「唔該哂。」

「唔使⋯⋯」

「希仔我哋走啦,爸爸等緊呀。」說罷,希仔嘅媽媽就好匆忙拖走希仔。

只見希仔,呢個小南路見不平而拔刀相助過嘅小朋友,佢嘅背影喺離開我哋雙眼之前,回頭望向我哋,大嗌一聲:「多謝你哋呀!哥哥姐姐!」

「嗯!拜拜!」小南揮哂手咁向佢道別。

唉⋯⋯好心冇咩好報,識咗呢個小朋友唔夠半日,已經感受到佢仍有童真嘅心,往後同佢應該唔會再有任何交集,我只祈求希仔唔好畀佢個怪獸老母教壞啦。





之後,又變返我同小南兩個人喺度。