《台灣個表妹嚟咗我屋企住》【完】: (一百一十六)真正嘅解脫

「姨丈⋯」小南呢個時候傻傻地咁想講嘢。

「仲叫我姨丈？」阿爸笑住話，而且笑得好開心。

「啫係咩呀⋯」小南又呆一下。

「啫係叫爸爸呀。」我話。

「吓⋯」小南一聽，變得雀躍起嚟，好興奮咁嗌咗一聲「爸爸！」





「新抱仔乖！」阿爸笑住摸摸小南嘅頭。

我都依樣葫蘆：「爸爸～」

「爸你條命咩？叫返阿爸啦你！」阿爸話。

「哈哈⋯⋯哈哈⋯⋯」威風掃地嘅我，就被小南同阿爸恥笑。

「你哋咁快就同一陣線嘅？」我大吃一驚。





「係呀蠢材！以後有排你受啦～」小南一絲甜笑。

「星仔，我睇死你畀小南食住㗎啦。」阿爸好有信心咁話。

「大獲了⋯⋯」

跟住我哋食完飯，同小南再冇之前嗰種假扮嘅拘謹，反而能夠光明正大咁嬉嬉鬧鬧。

但總覺得我喺屋企嘅地位似乎低咗一級，變成畀阿爸加埋小南二人玩弄於股掌之中。





我記得⋯小南都講過佢冇爸爸，我諗如今阿爸充當咗呢個角色，呢個屋企再唔算殘破不堪，而真係一個真正嘅屋企，再無任何嘢缺少咗。

有殘缺嘅一幅圖畫，可以用畫筆去修補缺陷。

充滿悲劇嘅回憶，可以用文字去改寫成美好嘅故事。

本來面目全非嘅地方，可以用努力去重建成心目中嘅美境。

幸福嘅拼圖，最後終會拼得完整。

如此一來，總算是「一家三口」。

由嗰晚開始，我就可以喺屋企明正言順同小南拍拖。

喺天上面嘅媽媽⋯⋯我都要多謝你。





多謝你為我所做過嘅事情。

後來有次機會，我趁住阿爸唔喺屋企，小南上緊網嗰陣，我就偷偷走入阿爸同媽媽間房。

拎返部相機出嚟⋯⋯見返每一個有顏色嘅媽媽。

我冇再好似之前咁成個人崩潰，睇返啲相唔會再喊，而係得到好似阿爸嗰種釋懷。

撳下剷除，再撳確定。

我逐張逐張咁剷晒啲相片。

每剷一張，心入面嘅鬱結又少咗一重。





有時候唔願意忘記一個人，只係畀自己嘅一個藉口去虐待自己，原來學識放低先係真正得到解脫嘅事情。

開心嘅事唔會忘記，傷心嘅事就隨風飄逝。

西多士，再見了。

再見了，回憶中嘅媽媽。