結局.幸福嘅倒數.1


我坐喺房間入面張電腦凳上,聚精會神咁寫緊本日記,寫到一半嘅時候⋯⋯

忽然,就有啲軟綿綿嘅東西從後壓住我。

「嘩!」我嚇咗一下。

「嘻嘻⋯⋯你寫咩呀?」原來係小南嘅突襲,佢趁我冇留意嗰陣入咗嚟。「我要睇我要睇!」





小南好快手搶走咗我放喺枱上嘅藍色日記。

「冇嘢好睇㗎⋯⋯」

「嘻嘻⋯⋯」小南笑嘻嘻咁睇緊我本日記。「寫緊我喎。」

「日記嚟㗎。」

「點解你啲日子飛得過快嘅?六月寫咗兩日就飛咗去七月十四號⋯⋯」小南好疑惑咁問:「但係七月到八月又有日日寫喎!點解嘅?」





「得閑咪寫囉⋯⋯同埋7月14號好有意思㗎。」

「好有意思?」

「銀色情人節囉。」

其實每個月都有情人節,只係我哋好多時都忽略咗,唔單止忽略咗呢個節日,更係忽略咗自己心愛嘅人。

「情人節?」





「嗯⋯⋯仲係你第一日嚟嗰日呀。」

唔知我仲有冇呢個福氣,可以陪你渡過真正嘅二月十四情人節⋯⋯

「嘻⋯⋯咁睇嚟你好重視我喎!日日都寫嘅。」小南又埋首睇緊我本日記。

「梗係啦。」

「咁呀⋯⋯錫哂你啦!」說罷,小南又跳過嚟要我抱住。

「頂你,你好重呀⋯⋯」我倍感吃力咁講。

「錫錫!」





坐喺我大髀上嘅小南靠埋嚟,雙手攬住我後,慢慢親吻我嘅嘴唇。

突如其來嘅長吻,坦白講我都幾享受。

雖然我同小南都唔係接吻高手,成日都唔覺意畀佢啲牙撞到,但呢啲技巧嚟啫,訓練多啲就得㗎啦。

不過我好快意識到一樣嘢⋯⋯

我向後一挨,迅速逃離小南甜甜地嘅嘴唇。

「喂⋯小南。」

「做咩事呀?」小南呆一呆,臉頰又紅起嚟。

「你⋯⋯」我指指佢個口。「你刷咗牙未呀?」





「未呀⋯⋯」小南話。

「咁我幫你刷呀。」

一聽到我嘅提議,小南就立即彈返起身。

「唔制呀!你都唔識幫人刷嘅!上次整到我好痛呀。」小南扁住嘴話。

「嚟啦,最多今次我再細力啲啦。」我好誠懇咁請求佢。

「唔得喎!」小南向我扮個鬼臉。「我瞓啦衰人,拜拜!」

轉眼間,小南已經逃之夭夭。





嘻,終於見唔到個衰妹。

我拎返起支筆,打返開本日記寫埋最後幾句⋯⋯

睇嚟幸福終止嘅鐘聲已經被敲響,
點解我一直唔敢問佢,
到底我哋最後係咪會分隔異地,
好似我同阿琪咁⋯⋯
但我唔想再失去任何嘢啦!
包括小南。
點解時間要過得咁快?
仲有七日咋⋯⋯