結局.幸福嘅倒數.4


話說,我畀兩位啱啱見返面嘅表姐嚇完之後,我哋就坐返喺客廳聽佢解畫。

「唔好意思呀表弟,頭先嚇親你,其實我哋只係想試探下你係咪真心鍾意小南。」大南解釋話:「見你咁着緊小南,連命都可以唔要,我就知道小南冇揀錯人。」

「嗯嗯!從古至今喺我刀下嘅異性都只會落荒而逃,除咗你咋表弟!」中南又話。

「哦⋯⋯」





左右護法在此,我諗真係乜嘢狗公都唔敢接近啦。

不過⋯佢哋唔介意我同小南係表兄妹嘅關係咩?

如果唔介意我就費事問,反正阿爸唔介意,表姐又唔介意,呢段非一般嘅關係所遇上嘅阻力就少咗好多。

啪!

小南突然拍枱企起身,嬲嬲地咁話:「你哋好過份呀!好搵唔搵,搵啲咁嘅嘢嚟試?」





「小南唔好嬲啦,你坐返低先啦,大家姐咁做,都係緊張你啫。」

聽完大南嘅勸喻,小南真係坐返低,鼓起泡腮望住佢。

「係囉係囉,一陣搵到衰男仔,你話點算好?」

「冇錯呀,要試下個男仔係咪真心鍾意你呀嘛!」

「唔用啲特別啲嘅方式試下又點知呢?」





「我哋都係為你好咋。」

「係囉,咁事實證明咗,家星表弟真係個好男仔。」

聽住佢哋兩個一唱一和,十足十新年嗰啲三姑六婆講埋哂一大堆廢話,悶到喊。

「好啦,唔好再講啦。」小南托住下巴,好唔耐煩咁話:「你哋點解會嚟咗嘅?媽媽呢?仲有⋯⋯咦?我唔係話我去咗台北㗎咩?同埋你哋點知我住呢度㗎?咦⋯⋯」

小南越講越慌張,呆咗一呆。

「哈哈⋯畀人識穿咗啦。」大南話。

「你啲大話咁屎,雖然一開始我都畀你呃咗。」中南話。





「咁即係話⋯⋯」小南似乎擔心緊某啲事情。

叮噹!

門鐘響起。

阿爸平時都有帶鎖匙出街,所以門外嘅一定唔係佢,係邊個嚟咗呢?

「嗯⋯⋯我⋯⋯我去開門先。」我走近門口,拉開門柄。

一打開門,只係望見一個老人。

細看下,白髮滄桑加上臉上嘅老態,有種似曾相識嘅感覺。

但正確啲講,我見到嘅應該係海賊王入面嘅冥皇雷利。





「請問你⋯⋯搵邊位?」我問。

「我嚟搵程小南㗎!快啲開門呀!」眼前呢個廢老喺度大吵大鬧,若果唔係有一閘之隔,我估佢早就衝咁入嚟。

「吓⋯⋯」當我仲諗緊佢係邊個嚟嘅時候。

「外公⋯⋯」小南行近埋嚟,喺我身邊好驚訝咁講。

外公?即係話眼前呢個廢老係我嘅外公?