結局.如果我們不曾相遇


有人話過往生前,會睇到屬於自己最珍而重之嘅回憶⋯⋯上次喺書展見過一次,冇死到。

今次,我一擘大眼,就企咗喺一個純白空嘅空間入面。

我諗依個真係天堂啦㗎?但係⋯我唔想死喎⋯我仲有個承諾未兌現。

「喂!有冇人呀?」我大嗌一聲。





冇人回應,原來天堂係咁虛無。

「喂!」我再嗌。

「有呀。」突然有一個身形肥胖嘅阿叔出現喺我面前。

「嘩!你係邊個呀?」我嚇左嚇,望住佢臉龐,有種熟悉嘅感覺⋯⋯

「我?你唔認得我咩?」神秘同叔問。





「吓⋯」我睇真啲,先驚覺呢個獨特嘅容貌,好似冇耐之前先見過。「你係⋯⋯小南嘅筆友?」

「嗯⋯⋯都可以咁講嘅。」神秘阿叔行到我面前。「我嘅身份比較特別,或者係⋯⋯」

神秘阿叔一轉身,就變咗個阿婆。

「嘩⋯」喺天堂見到如此事情都不足為奇,但我仲未做好心理準備,因為眼前嘅阿婆又係一個熟悉嘅面孔。「長洲阿婆?」

「嘻嘻⋯」長洲阿婆又轉身,今次變成一個戴住眼鏡嘅西裝青年。





「你到底係咩人呀?」我問。

「嗯⋯我係咩人?問得好!」

「講你就講啦⋯⋯」

「你可以叫我做⋯緣份監察員。」西裝青年話。

接踵而來嘅古怪事情,真係搞到我一頭霧水。

「吓⋯⋯到底依家係咩情況,我,係咪死咗?」

「你?No!你未死呀。」





「你講咩話西裝友?我未死?咁呢度係?」

西裝青年托一托眼鏡,開始向我解釋哂所有嘅事情。

「你聽我講下先啦,呢度係你嘅潛意識空間,係你距離死亡嘅前一步,仲有⋯我唔係叫做西裝友,我叫做緣分監察員,負責監察你同你表妹嘅緣份。」

佢講得出我同表妹,證明唔係拍緊戲,呢一切都係真嘅?

但心裏又慢慢惦掛住小南⋯⋯唔知佢依家點呢?

「你講清楚啲得唔得呀?仲有小南佢⋯⋯依家點呀?」我開始有啲激動咁問佢。

「喂喂!你聽埋我講先啦,一係我畀你睇啲嘢先。」西裝青年話。

說罷,佢揮一揮手,我哋出嚟離開咗純白色嘅空間,場景轉換成⋯⋯醫院。





我見到「我」瞓咗喺病床上面動也不動,而我同西裝青年就企咗喺「我」嘅隔離。

「點⋯解?」我又呆咗一下。

「咁係因為你哋兩個都唔聽我講嘢嘅下場。」西裝青年坐喺「我」嘅床邊。

「兩個?唔聽你講?」我再問。「喂!咁我表妹依家點呀?你答咗我先啦。」

「佢?佢喺病房出面條走廊喊緊囉。」

聽完西裝友咁講,我即刻想衝出去搵小南。

「喂!」但畀佢喝停咗我。「你依家出嚟有鬼用,真正嘅你瞓咗喺度呀!你出去佢都見你唔到㗎,你聽埋我講嘢先呀。」





我瞧一瞧瞓喺病床上,面無血色嘅「我」。

「好,你講。」我話。

「咁就啱啦!簡單啲講啦,你哋兩個好特別,我諗你都記得返你同你表妹宿世姻緣嘅記憶啦啩?」

「嗯。」我點頭。

「你哋嘅「緣」太深,甚至每一次輪迴轉世,都總會重遇,皆因你仲係鄭成功嗰陣同你表妹許下嘅承諾。」

「承諾?」我記得我同小南之間都有一個承諾。

「嗯嗯⋯因爲你第一世愛上咗你表妹,同佢對住山海盟誓,話無論喺轉世幾多次都要同佢一齊,可惜可惜⋯你哋嘅「緣」深,但「份」輕,到最後注定要分開,我都唔知點解,每一世嘅你哋只要一齊超過咗一個半月,男女是但一方就會死。我有提咗你表妹先㗎,點知佢又唔理我,我提埋你,點知你都唔理我。」

西裝友長嘆一聲,再話:「而我作為緣份監察員,接手你哋嘅案件就係為咗解決你哋呢個魔咒,可惜呀⋯⋯我做咩都冇用。」





「所以你就化身筆友同長洲阿婆?」我問。

「化身筆友係想試下你今世嘅表妹有冇可能鍾意其他人而避過同你一齊嘅命運,點知都係衰咗⋯佢生活咗十八年,淨係鍾意過一個人,就係你。」西裝友話。

「我?但係小南話佢有暗戀嘅人㗎喎⋯⋯」我問。

「嗰個咪你囉,你細個去過鄉下同佢玩,嗰陣佢同你嘅「緣」又確立咗起嚟,點搞都冇用,唉⋯⋯」西裝友好無奈咁講。

聽到呢個消息,我個心好似又跳動咗一下,悲痛嘅感覺從心底湧出嚟。

「咁長洲阿婆呢⋯⋯」

「哦,我見你呢一世好似唔係咁識溝女,嗰次純粹想幫你哋拉埋天窗啫。

「嗯⋯」咁算係暗示緊我溝女廢?

不過點都好,聽完佢咁講,即係注定我同小南永遠都冇可能一齊⋯⋯

我都唔知有咩反應好,畢竟咁脫離現實嘅事情發生喺我身上,但我又搵唔到理由唔相信呢件事情。

「咁⋯⋯小南會唔會搵到屬於佢嘅幸福㗎?」

我第一時間都係諗住小南。

「哈,你扮人咁多世都咁得意,唔係問自己係咪會死嘅。」西裝友笑住咁話。

「屌,你答咗我先。」

西裝友神情一轉,變得認真:「呃⋯⋯好難講,例如好似上一世咁,你死咗之後你表妹又跟住跳樓自殺。」

自殺嘛⋯一諗到小南會係咁,我好憤怒,好嬲自己嘅無能為力,同時好想喊。

點解個天要咁玩我哋呀?莫非注定我哋要有緣無份?

就算要我死都唔緊要,總好過要小南受苦。

正當我萬念俱灰,突然靈機一閃⋯⋯

「咁我想問⋯⋯可唔可以有方法令我哋都唔會受傷害,就算要喺對方嘅生命中消失?」

「嗯,我唔知呀,睇咗你哋十世,次次都係由甜蜜開始,然後悲劇收場,不斷嘅輪迴,老實講我都唔想再睇落去,如果唔係月老條仆街⋯⋯」西裝友欲言又止。「我講遠咗,如果你有啲咩諗法都可以同我講,我會試下配合。」

「你會幫我?」我問。

「當然,我嘅職責一部份就係要幫你哋締造一段最美好、最完美嘅姻緣。」西裝友微微一笑。

「嗯!咁就得啦。」以我都向佢報以微笑。

突如其來嘅所有事情我好快就接受得到,乜嘢宿世姻緣、緣份監察員。

我知道唯有咁做,先可以拯救到小南,跟住我就將我嘅秘密大計講畀個緣份監察員聽。

「ok?」

「ok!」

就算我哋嘅未來見唔到一絲曙光。

我都會盡力令你一個見到。

***

喺另一邊廂,一個憂心忡忡嘅少女正以淚洗臉,十分擔憂處於病房裏嘅男朋友。

因為醫生都對佢男朋友嘅急病束手無策,甚至叫所有家屬做好心理準備⋯⋯

病床上嘅男仔依然昏迷緊,佢嘅爸爸、表姐同外公都趕到嚟。

少女無語,唔知做啲咩先可以幫到佢嘅男朋友。

呢一刻,少女又聽到一把神秘嘅聲音告訴佢可以點做。

少女一開始聽到,有啲錯愕,但為咗佢男朋友,佢選擇咗聽從嗰把聲音嘅指示。

默然離開⋯⋯

***

醫生本來話我嘅情況越嚟越嚴重,應該冇得救。

但係我最後都奇蹟咁活過嚟,瞓咗兩個月醫院,終於都醒返。

第一個見返嘅人,就係阿爸。

「星仔,你終於醒啦?」

「嗯⋯⋯佢係邊呀?」

而自從嗰日之後,有一個人,喺我嘅生命中消失咗。

或者我應該當佢從來冇喺我生命中出現過,咁嘅話先可以保護到佢。

出咗院,返到屋企。

我第一間衝入阿哥間房。

果然⋯⋯嗰個女仔留低咗啲嘢畀我。

喺書枱上,有一隻我送畀佢嘅Hello Kitty,隔離仲有一本日記⋯⋯

我翻開日記嘅第一頁,瞬間將嗰個暑假嘅回憶全部喚醒返出嚟。

第一晚嘅三餸一湯,原來你都知自己煮得難食。

我寧願自己辛苦啲都借個枕頭畀你,原來你都知道。

去咗迪士尼玩,呢一頁,仲黐住兩張相:喺第一張相入面佢攪住隻米奇老鼠笑得好靚,第二張相係我同佢一齊扮鬼臉。

我好懷念嗰陣天真爛漫嘅你。

搵筆友,你嬲咗我一陣,但最後都好快冇事,仲一齊去食西多士,原來你都覺得個筆友有啲樣衰⋯⋯

去拜祭媽媽,你好傷心,亦都嬲自己唔可以同我分擔呢啲悲傷。

去書展,你好鍾意睇書,更加鍾意活蹦亂跳,你嘅離開令我暈低咗,你有啲內疚,所以往後出街都撓住我隻手。

到咗之後嘅三餸一湯,你花咗勁多心機去鑽研廚藝,終於煮出令人窩心嘅晚餐。

而你花嘅汗水,全部都係為咗我,所以你覺得好值得。

有一次你唔小心夢遊入咗嚟,第一次同我瞓埋一齊,原來你竟然覺得好開心⋯⋯

去咗朋友屋企燒嘢食,你話我啲朋友全部都好好人,特別係阿yo,講咗好多我嘅事情畀你知。

去咗糖水舖食宵夜,我食碗紫米露,你食咗碗西米露,聽住我講我嘅前度,你就呷緊醋。

帶你去戲院,唔小心揀咗套鬼片,先至知道你咁細膽,我仲趁機玩下你。

帶你去商場掃街,先至感受得到你嘅食量係有幾咁恐怖,但亦到畀我知道咗你鍾意食燴番薯。

帶你去食譚仔,先至知道你係好食得辣嘢,食完都唔會噴火,我就啱啱相反。

後來又去咗黑暗中對話體驗館,咦⋯⋯好似係你第一次拖男仔嘅手仔喎。

然後就係長洲之行,我偷咗你粒大魚蛋食,你就扑濕我個頭,仲有踩架三輪車去張保仔洞,回程嗰陣畀你踩,點知你又撞爛阿婆啲嘢,一定要講嘅係去咗沙灘嗰邊,我畀你主動挑釁,結果由潑水大戰變咗潑沙大戰,玩得好盡興。

當然仲有嗰晚⋯⋯同你一齊瞓,同你第一次嘅親吻。

到我下定決心,喺尖沙嘴碼頭同你表白,發現咗個驚天大秘密,而最後都能夠向你表白成功,正式同你一齊。

確立咗我哋嘅關係之後,又繼續同床共枕,食你嗰啲好似屎嘅早餐。

你大姨媽嚟,我畀你出氣。

你想錫我,我唔畀你錫。

我煮飯畀你食,你話好難食。

你煮飯嗰陣,我就玩你盞燈,點知你趁我沖涼先熄我個爐,諗返起我好似未報仇喎!

你飲醉酒,話鍾意我所有嘢⋯⋯到底係咩意思呀?我都未問你。

你支牙擦冇咗,我幫你擦牙。

唔好彩又畀你發現咗我盒AV,仲要畀你開埋嚟睇。

露營嗰日,同你發生嘅事情,我仲記憶猶新,我諗返起嗰日,聽住你最鍾意嘅《星空》,應該特別有意思。

同你去鋸扒啦,又幫我哋嘅仔女諗埋名。

媽媽嘅事,多得你開解我。

所以我發誓一定要好好愛你,向你作出一個簡單嘅承諾。

直到依家呢一刻,我仲未兌現同你嘅承諾,而你就已經離開咗我⋯⋯

睇返哂本日記嘅每一頁,諗返起我同嗰個女仔嘅所有點滴。

我嘅眼淚忍唔住失控咁湧哂出嚟⋯⋯

我攬住Hello Kitty,瞓喺個枕頭上面,失控咁喊,失控咁嗌⋯⋯

「呀!!!呀!!!」

我到最後都係失去咗你。

不過那怕只係一面,我都會再去搵返你㗎!

因為,我應承過你。

由佢離開咗我屋企之後,我再食唔到三餸一湯,我再搵唔到人聽我傾訴,我再見唔到佢溫暖嘅笑容。

連觸碰一下,都冇可能。

時光荏苒,咁就過咗六年⋯⋯

喺呢六年裏面,有好多嘢都變哂⋯⋯

軒少考完DSE後,因為成績太廢而冇再讀上去,而係去咗環遊世界,睇住佢成日影低唔同國家嘅靚相,再放上網分享,搞到我都有啲羨慕佢。

而阿yo考完DSE之後,真係畀佢讀得返上去,讀咗四年終於畀佢完成到佢嘅教書夢,依家喺某間中學入面做緊教畜。

阿榮都讀完書,依家同人搞咗間IT公司,聽聞生意仲蒸蒸日上,不過更值得慶幸嘅係佢已經有女朋友。

阿爸就依然做緊地盤,每日都食返外賣。

咁我呢?

我考完個垃圾DSE之後,就去咗台灣讀書。

唔但只因為成績太廢而去,即係為咗搵返嗰個女仔⋯⋯

我曾經照住佢嘅屋企地址,去到台南搵佢,點知去到先發現人去樓空。

心灰意冷嘅我再冇任何線索可以搵得返佢,於是喺城市入面開始咗我嘅頹廢生活,每日望住天上粒星,祈求佢會喺某個地方同我一齊望住。

還期望有日喺街口嘅轉角位會撞返你。

再衝過去攬實你。

呢啲幻想,幾乎每日都係我嘅腦海中上演一次。

台灣嘅生活節奏真係好慢,我讀大學嗰幾年,就真係可以享受下何謂孤單,一個人慢慢緊咁做一啲我想做嘅嘢。

孤單咁生活喺一個二千幾萬人嘅島國,

一個人品嚐下為人熟悉嘅夜市小食,

一個人走去欣賞附近好多嘅小島,

一個人去咗睇下迷人嘅海平線,

台灣嘅沙灘唔見你,唯有長洲嘅沙灘先有你存在嘅痕跡。

喺嗰個我寫上咗「白痴表妹」嘅鎖頭上,原來你寫嘅嘢係⋯⋯

「白痴表哥」

其實,我仲有好多嘢想問下你,例如問多你一次究竟你鍾意我啲咩。

我好想見到你呀!

我好掛住你呀!

孤寂地完成環島遊,先發覺台灣好大,大到我搵唔到你。

喺呢幾年間,我冇再對任何人動心,讀完書就直接留喺台灣做嘢,而阿爸都知道我等緊一個人,每次佢打電話畀我,都會問我「你依家生活點呀?」

可能佢都想知道我搵返嗰個女仔未。

而我總係會答返佢:「唔錯啦,都過得幾好⋯⋯」

其實我過得唔好,有時會無啦啦諗起你。

一諗起你,啲眼淚又忍唔住湧出嚟。

唯有聽住你最鍾意嘅嗰首《星空》。

https://www.youtube.com/watch?v=RTUwaCImChM

摸不到的顏色 是否叫彩虹
看不到的擁抱 是否叫做微風
一個人 想著一個人 是否就叫寂寞

命運偷走如果 只留下結果
時間偷走初衷 只留下了苦衷
你來過 然後你走後 只留下星空

那一年我們望著星空 有那麼多的 燦爛的夢
以為快樂會永久 像不變星空 陪著我

獵戶 天狼 織女 光年外沉默
回憶 青春 夢想 何時偷偷隕落
我愛過 然後我沉默 人海裡漂流

那一年我們望著星空 未來的未來 從沒想過
當故事失去美夢 美夢失去線索 而我們失去聯絡

這一片無言無語星空 為什麼靜靜 看我淚流
如果你在的時候 會不會伸手 擁抱我

細數繁星閃爍 細數此生奔波
原來 所有 所得 所獲 不如一夜的星空

空氣中的溫柔 回憶你的笑容
彷彿只要伸手 就能觸摸

摸不到的顏色 是否叫彩虹
看不到的擁抱 是否叫做微風
一個人 習慣一個人...

這一刻獨自望著星空 從前的從前 從沒變過
寂寞可以是忍受 也可以是享受 享受僅有的擁有

那一年我們望著星空 有那麼多的 燦爛的夢
至少回憶會永久 像不變星空 陪著我

最後只剩下星空 像不變回憶
陪著我... 


聽下聽下,先至冇咁辛苦。

歌,有好似毒品一樣,當對一個嘅思念猶如毒癮發作,聽返嗰首屬於嗰個人嘅歌,先能夠生存得到落去⋯⋯

可惜永遠冇辦法戒除呢種毒癮⋯⋯

喺依幾年嘅時間,五月天都出咗好多嘅新歌。

有兩首我係特別鍾意,

其中一首叫《如果我們不曾相遇》。

如果我們不曾相遇 我會是在哪裡?
如果我們從不曾相識 不存在這首歌曲


你咁鍾意五月天,我相信你一定有聽過。

唔知道你聽嗰陣,有啲咩感受呢?

睇嚟呢一世,我都好難再見返你⋯⋯

沒法改寫既定結尾,就期待下世紀⋯⋯

***

某一日,我心血來潮想將我哋嘅故事寫低,於是我將手放喺鍵盤上,用兩本日記記錄低嘅事情,寫咗一個故仔畀你。

寫到一半,我決定放埋上網。

再為呢個故事起個名叫做⋯⋯

《台灣個表妹嚟咗我屋企住》

一個屬於我同你嘅故事……

我放咗上之前成日教你上嘅嗰個討論區,唔知你會唔會睇到呢?我寫緊嗰陣,個腦自動諗返起同你甜蜜嘅回憶,間唔中寫下又停下⋯⋯

寫咗大半年,終於都寫完。

我最後打上「全文完」三隻字,將雙手移離鍵盤。

走咗出去街道上,食咗支煙。

再祈求會重遇你,

如果我哋不曾相遇嘅話。