《台灣個表妹嚟咗我屋企住》【完】: (七)第一晚

只見眼前，

一碟蝦仁炒蛋⋯⋯

一碟菜心炒牛肉⋯⋯

一碟葱香黃花魚⋯⋯

估唔到，眼前全部都係我鍾意食嘅餸，亦係媽媽以前成日煮開嘅餸⋯⋯





「點解你會⋯⋯」我有少少驚訝咁講：「點解你會識煮呢啲餸嘅？」

「吓⋯係咪唔啱你食呀？」小南好似驚做錯嘢咁問。

「唔係呀！全部餸我都好鍾意食。」我答。

「咁就好啦！」小南立即笑笑口咁講。

「咕嚕咕嚕⋯⋯」又有好明顯嘅肚餓聲出現。





「哈哈，我又⋯⋯」

「唔緊要啦，我哋食飯先啦。」睇嚟阿爸都開始肚餓。

「我唔客氣啦！」說罷，我哋就開始食飯。

「蝦仁炒蛋，好耐冇食啦⋯立即夾啲試下先。」我話。

我將一舊炒蛋夾起放入口，先係好平凡嘅蛋味，然後係好甜嘅甜味，接落嚟就係一種好難食嘅味道⋯⋯





「嘩屌！好難食！」身旁嘅阿爸好快就嘔返出嚟。

見到阿爸嘅反應，再加上我察覺到小南面有難色，知道小南為呢餐付出咗咁多汗水，我又點忍心附和阿爸。

所以喺呢一刻，我迫自己吞左舊蛋，然後話：「唔錯呀！」

「吓⋯阿仔，唔係喎⋯」

小南面色慢慢變差，並且皺起眉頭。

「唔差呀！幾好呀！」我打斷阿爸話。

跟住小南嘅面色先好返少少。

「等我試埋碟菜心炒牛肉先！」我話。





小南同阿爸都冇食住，反而目不轉睛咁望實我。

我鼓起勇氣，將一塊牛肉夾起放入口。同樣地，先係好平凡嘅牛肉味，然後係好甜嘅甜味，接下嚟就係一種好難食嘅味道⋯⋯

但係又唔可以直接同小南講好難食喎，我怕會打擊佢嘅自信心，於是我再次迫自己吞落肚。

「星星表哥，點呀？」小南滿心期待咁望住我問。

「好⋯好⋯好味。」我巴巴結結咁講。

而阿爸見狀，又夾咗塊牛肉嚟食。

「屌，仲難⋯」我立即從枱下踢一踢阿爸。





「仲⋯仲好食啲添喎。」阿爸話。

好彩阿爸識做咋⋯⋯

「小南都快啲食啦，你唔係好肚餓咩？」我問。

「嗯！」小南拎起筷子，笑住咁大魚大肉，似乎對我哋嘅反應十分滿意。

最後淨低嗰碟葱香黃花魚，我諗都唔需要多講啦，咁難食嘅嘢，佢嘅屋企人應該都係食咗好耐，真係好慘。

而依一餐晚餐，應該係我人生中食過最難食嘅一餐，同時⋯亦係最溫馨嘅一餐。

我、阿爸同埋小南四目交接咁樣去食依一餐，感覺就好似返去當年有媽媽嘅一家三口，一齊食飯嗰段時光⋯我好耐都冇試過食一餐平凡普通而幸福嘅家常便飯。

雖然每個人對於啲餸嘅反應都唔同⋯





阿爸就黑哂面咁低頭齋食白飯，

小南就好似餓鬼搶屎咁食得津津有味，

而我都死死地得閒夾啲餸食，

但係我都好開心，真係好鍾意呢種感覺。

話咁快，枱面上嘅餸都畀小南同我清哂，於是我就叫小南同阿爸輪流去沖涼先，而我就主動請纓去洗埋啲碗碟。

久違嘅一餐⋯確係得來不易。

當我洗埋啲碗碟，打算去沖涼嘅時候，就見到小南換上咗一身Hello Kitty嘅可愛睡衣，佢啲頭髮濕濕地之餘，原本紥起咗嘅頭髮放咗落嚟，更顯得可愛。





「星星表哥去沖涼喇？」小南呆呆咁問我，睇落佢都好攰啦。「姨丈佢瞓咗啦，佢叫我有咩事就搵你。」

「哦⋯可以呀，有咩事就嚟搵我啦。」

「嗯，嘻嘻⋯」

見到小南笑住咁返入房，然後我都去沖咗個涼，再行返房吹乾埋個頭。

正當我準備上床瞓嘅時候，突然有一陣敲門聲傳嚟⋯⋯

咚咚！

「星星表哥？」係小南把聲。

「係小南？做咩事呀？」

「冇⋯我想問下你⋯有冇一個軟啲嘅枕頭可以比我用啫。」

「有呀⋯你等等。」

其實我冇多餘嘅枕頭畀小南用，不過為咗令佢唔好瞓得咁辛苦，我將自己嘅枕頭拎起，開門畀咗房門出面嘅小南，同佢交換咗枕頭之後，我就熄埋燈，瞓住阿哥嗰個比較硬啲嘅枕頭，過咗一陣之後⋯⋯

又有一陣敲門聲傳嚟⋯⋯

咚咚！

「星星表哥？」又係小南把聲。

「係，又做乜事呀?」

「多謝你。」

「嗯⋯⋯」依個時候嘅我都唔知畀咩反應好，只係默默咁同門後嘅小南講：「你都攰啦，快啲瞓啦。」

「哦⋯你都快啲瞓，早抖啦。」

「早抖。」

講完之後，就聽到小南嘅腳步聲，知道佢返咗入房間，睇嚟之後嘅個幾月，我都會同依個咁可愛嘅表妹一齊住，莫名有種開心同興奮，估唔到咁就冇啦啦多咗一個屋企人。

我繼續瞓喺阿哥嘅枕頭上面，好快就瞓著咗⋯⋯

但突然瞓到半夜，我又醒一醒，無啦啦聽到好沉重嘅腳步聲喺門後，我開始緊張起嚟，慢慢起身靠近門，將耳仔貼落去，聽到啲腳步聲喺屋入面徘徊緊。

但慢慢啲聲開始遠離我⋯⋯

最後仲冇哂聲⋯⋯

我當時心諗：「唔通有賊？」

雖然我好想知道門後到底有啲咩，但最後太眼瞓嘅我都係冇理到，爬返上床繼續瞓。

而當我熟睡緊嘅時候⋯⋯

就發現好似有啲野壓住我嘅身體。

迷迷糊糊之間，我好想搞清楚發生咩事。

我用手捽一捽眼睛⋯

見到⋯好似有個人騎住我。

再捽多捽⋯

咦⋯係小南？