《台灣個表妹嚟咗我屋企住》【完】: (二十四)廣場恐懼症

「⋯⋯」

一擘大雙眼，就見到自己瞓咗喺病床上面，身邊嘅一切都漸漸顯得真實，我可以郁得到自己嘅四肢，而再唔係純粹得一雙眼睛。

原來我冇死到，只係入咗醫院。

但又點會見到嗰啲回憶出現喺眼前⋯⋯

「星星表哥！」身邊嘅小南馬上好擔心咁攬住我，見到我醒咗就好似喺黑暗中見到一絲曙光。「你終於醒喇！真係擔心死我呀。」





「做咩事⋯⋯」啱啱醒返嘅我完全搞唔清楚發生咩情況。「我瞓咗好耐？」

「係呀！你瞓咗四個鐘啦⋯⋯」小南佢依然緊緊咁攬實我。

「吓⋯四個鐘啫。」

夜晚瞓覺嗰陣都唔止啦，大驚小怪⋯⋯

「四個鐘唔少咩？」小南語氣好重咁話我。「你知唔知呀？頭先真係嚇死我，我去完廁所出嚟就見到你暈咗喺地下啦，跟住仲有一班人圍住你呀，嗰陣真係好驚呀！唔知點算好呀⋯⋯」





「咁你都識得call白車送我嚟醫院喇。」我話。

「call白車？唔係我打電話㗎，我邊會識㗎，係有個同我差唔多大嘅女仔幫手打電話咋，佢仲叫附近嘅人讓開畀啲空間你。」小南向我講返當時嘅情況。

「同你差唔多大嘅女仔？」我問小南，因為好好奇係邊個幫咗我。

「嗯，佢等到啲醫護人員嚟就走咗喇，我連多謝一聲都講唔切。」

咁神秘嘅，連多謝講唔到就走鬼咗⋯⋯





「不過表妹呀⋯」

「嗯？」

「不如你放開表哥先喇，我畀你攬得好實。」呢一刻我真係成個人畀小南攬住，而且仲感覺到有啲軟淋淋嘅嘢壓住我心口。

小南都知道佢嘅反應有啲誇張得滯，於是都怕怕醜醜咁縮返對手，有少少尷尬咁笑一笑。

「表哥，你頭先係咪嗌咗一個人嘅名⋯⋯」小南問咗個我唔係幾明嘅問題。

「我嗌咗咩人名？」我反問。

「頭先你醒嘅時候同時間大嗌咗一聲，好似⋯話咩阿⋯琪？」

原來係咁，我大嗌咗聲前度嘅名⋯⋯不過小南知唔知道都冇咩所謂喇。





所以我就好含糊咁輕輕帶過呢個話題。

「哦⋯我話奇怪啫，哈哈…」希望冇畀小南識穿。「係喇，醫生話我做咩事會暈低咗嘅？」

當我一咁問，小南就耷低咗頭，露出一個好憂傷嘅神情，好似有口難言咁。

「你講啦⋯⋯我做咩事？」不禁令我自己都有啲擔心起上嚟。

「醫生⋯醫生話你有病。」小南嘅愁容更加明顯。

死喇⋯⋯根據小南呢個反應，唔通同我想像中差唔多？我患咗癌症？所以先至會暈低⋯⋯

我完全接受唔到，我明明一向個身體都幾好㗎喎⋯⋯





連我自己嘅眉頭都忍唔住皺起上嚟，同表妹就咁沉默咗幾秒。

但我都要做好心理準備㗎喇，人終須一死，分別只係在於遲死同埋早死啫，雖然我真係唔想咁快英年早逝。

我慢慢深呼吸，然之後好冷靜咁樣問小南：「係咪到咗末期？我仲有幾耐命？」

「吓！咩話？你講緊咩呀？」小南個樣變得好詫異咁望住我。

唔通我⋯會錯意？

「醫生話你患咗焦慮症咋，你諗咗去邊呀？」

「吓⋯咁啫係咩？」

焦慮症？我點會無啦啦有焦慮嘅？





「醫生話你有個咩嘢⋯⋯廣場恐懼症，所以一喺人多嘅環境，就會覺得頭暈同埋呼吸困難囉。」小南講得好詳細。

「哦！原來係咁，唔怪得我咁驚喺人群度喇⋯⋯」我終於明白點解自己咁驚人多嘅地方。

「只要食啲藥，快啲就冇事㗎喇。」小南安慰我話。

「對唔住呀表妹⋯要你擔心我，咁我幾時可以出得院呀？」雖然瞓喺病床上，但感覺自己嘅四肢已經有返哂氣力。

小南突然一副如夢初醒嘅樣，然後話：「哎呀！唔記得咗，你醒咗應該第一時間話畀醫生知。」

「乜你咁大頭蝦㗎⋯⋯」我無奈咁話。

「哈哈⋯⋯咁我依家去叫佢喇。」小南以笑遮醜咁話。





「嗯，好啦好啦，你快啲去喇。」我揮揮手，示意小南快啲去搵醫生嚟。

「係嘅表哥！你休息下喇喎。」說罷，小南就離開咗病房。

之後我就繼續瞓喺病床上，冇諗到自己竟然會患咗焦慮症，因為好驚人多？又唔鍾意同人有太多交流，可能喺兩年前，我就已經有呢個病。

一定係因為佢⋯⋯

將我隻手放開嘅嗰個人。