音樂開始徐徐奏起,提示我地要開始進場。 

花仔花女開始前進,係我地前面幫我地開路。 

我果對已經硬到鐵咁既腳亦係Cherry既帶領開始郁起上黎。 

無事既,會場咁暗,我唔會睇到其他人,咁咪唔會緊張囉。 

我咁同自己講,個心即時定左一定。 



點知當我隻腳一踏入宴會廳,全場既燈光即時著返哂,我即時停低左腳步。 

喂你地係度做乜..? 

兄弟團既眾人,即係十四,晨哥,Jason,師父,阿偉,Aaron,肥豬…etc十二個人單膝咁跪係紅地毯既兩旁。 

而且佢地每個都著上左「Knight of Rounds」既披風,個個唔同,圓桌騎士咁。 

我即時用手捂住自己隻左眼,笑到見牙唔見眼。 



兄弟居然會為左我開心做到呢個地歩… 

Cherry:「點呀仲緊唔緊張?」 

我:「咁開心又點會緊張?行喇老婆。」 

我而家真係一D都唔緊張,好神奇。 

我地開始慢慢向台前進,我仲輕鬆到可以向兩邊揮手。 



但其實每一步我都百感交雜,六年黎既種種回憶開始隨住我每一下踏落地湧上黎。 

終於走到呢一步喇。 

我經過我果班「圓桌騎士」果陣亦有諗起同佢地每一個既回憶。 

幫晨哥執手尾,處理麻煩,同師父個雷狗打LOL,睇Jason溝女,安慰肥豬.. 

種種回憶都好青春,好開心。 

當然,最重要既當然係我身邊呢位靚女啦,無佢我而家就唔會係呢度。 

我偷瞄左佢一眼,見到佢同我一樣,向賓客們揮手。 

佢滿臉笑容,但其實佢而家成臉都係眼淚。



傻婆,明明話唔好喊既人係你,你居然喊? 

不過,我都無資格話佢啦。 

因為我都成臉眼淚。 

一段咁短既路,行起上黎居然咁長,好神奇。 

喊到眼淚都就乾,我地終於行到上台上,坐低左係皇座上。 

呼… 

一坐低全場隨即響起一波好響亮既掌聲,將我從回憶中拉返黎。 



我望一望眼前既野,係一份一式兩份既文件。 

之後我老豆同Cherry爸爸仲有一位應該係律師既人行左上台。 

噢,要簽字了。 

律師:「在你們兩位結為夫婦之前,本人在職責上要提醒你們,根據婚姻條例締結的婚姻,是莊嚴而有約束力的,在法律上是一男一女自願終生結合,不容他人介入。」 

當然喇呢層。 

律師:「因此,魯路修和 李芷睛,雖然你們的婚禮沒有其他世俗或宗教儀式,但你們在本人和現時在場的人面前當眾表示以對方為配偶並簽名為證後,便成為合法夫妻。」 

呼,應該到我講喇。 

律師:「魯路修先生。」 



我:「請在座各位見證,我魯路修願意娶妳李芷睛為我合法妻子,我願對你承諾,從今天開始,無論是順境或是逆境,富有或貧窮,健康或疾病,我將永遠愛你、珍惜你直到地老天長。我承諾我將對你永遠忠誠。」 

我拎住份稿,好爽快咁讀左出黎,無卡關。 

律師:「李芷睛小姐。」 

到Cherry喇。 

佢企左起身,拎起左份稿。 

Cherry:「我請在座各位見證,我李芷睛願意嫁你魯路修為我合法丈夫,我願對你承諾,從今天開始,無論是順境或是逆境,富有或貧窮,健康或疾病,我將永遠愛你、珍惜你直到地老天長。我承諾我將對你永遠忠誠。」 

哇…原來聽結婚誓言係咁既感覺…自己讀都唔覺…原來係咁感動… 



律師:「咁有請兩位係證書上簽名。」 

「唔好簽吖,無得返轉頭架!!」 

師父係門口大叫,搞到我忍唔住笑。 

唔止我忍唔住笑,全場都忍唔住笑。 

師父俾Jason同晨哥佢地抬左出去,令我笑到幾乎失智。 

不過我都係簽左,因為我根本唔需要再返轉頭。 

簽完之後律師俾我地既老豆再加簽,宣布儀式已經完成。 

律師:「而家兩位可以交換戒指。」 

Cherry:「戒指? 」

Cherry好似好意外,我見佢用手捂住自己個口。 


我:「做咩吖? 」 

Cherry:「我無左回事吖.. 」 

吓?原來佢真係唔記得? 

不過咁仲好。 

我撻左兩下手指。 

朱雀係台下行左上黎,帶住個盒。 

我係婚禮開始之前已經將戒指俾左佢保管,以免我大頭蝦。 

今日應該係我最穩重既一日,應該係。 

朱雀係我地面前打開左個盒,兩隻閃閃發光既戒指就係入面。 

Cherry:「咦點解…」 

咁可以算係我俾佢既一個少少既驚喜掛? 

我一手將兩隻戒指都拎左出黎,仲俾左我自己個隻佢。 

我:「Surprise? 」 

Cherry:「你係幾時…? 」 

我:「嘻嘻…」 

我無回答佢既問題,只係默默咁套左隻戒指係佢既無名指。 

佢又開始喊,仲一直望住無名指上隻戒指。 

我伸出左手手指公,慢慢咁抹走佢臉上既眼淚。 

我:「唔好喊喇,你仲未幫我戴戒指吖。 」 

我笑住咁同佢講。 

佢一直點頭,喊住咁幫我戴,仲要手震。 

戴完之後我就用手摸佢個頭,想安慰下佢,點知佢撲上黎抱住我。 

全場即時再響起一波新既掌聲,比頭先仲要響。 

「咀佢!咀佢!  」 

呢d必需啦係咪先。 

我輕輕咁抬起佢個頭,錫左落去。 

我:「我愛你。 」 

Cherry:「我都愛你.. 」 

佢用把好沙既聲同我講,特別可愛,搞到我又再咀多啖落去。 

司儀:「eh…有請新郎哥講兩句。 」 

噢,仲有正經野要做添。 

我輕輕咁推開佢,安置佢坐返低先。 

我慢慢咁走去咪前面,準備演講一下。 

我:「好多謝大家…」 

「Daddy吖~我要食雪糕吖~  」 

「呢個故事我地聽過好多次喇老豆。 」 

哎… 

我:「好啦去食雪糕啦 ,媽咪呢? 」 

「係個邊吖傻仔。 」 

「媽咪~~ 」 

Cherry:「做咩吖Nicole豬? Chase你又咁既態度對Daddy啦。 」 

呀,唔記得講添,頭先扭計話要食雪糕既係我個女Nicole,串鳩我既係我個仔Chase。 

同邊個既?仲可以有邊個?梗係同Cherry架啦。 

我地而家有一對仔女,一家四口過住D好平凡但好開心既生活。 

呢個,係我同Cherry既故事,不過咁並唔係結局。 

因為我地仲會一直行落去。四個人一齊行落去。 

「最終章」 我們的故事