被踢回人間的天使: 4. 來龍去脈
「喂，999呀，依到係銅鑼灣金百利地下，有個女仔暈左呀…..麻煩你….」劉琪邊抱著李桐，邊打電話求救。
李桐在迷迷糊糊之間，用盡最後的力氣阻止了劉琪。
「我…..我唔去得醫院….」李桐說後便完全暈迷過去。
就在李桐暈倒期間，土地終於在他的夢境中出現了。
「實習天使689，咩解究你落嚟落得咁難睇呀？」土地說。
「難睇？！我叫你咁多次都唔出現，依加先出現，有冇搞錯？我被習總一腳伸落嚟，醒咗就係銅鑼灣喇。仲有呀，點解我變左女仔架，點解啲人可以見到我？我唔係應該隱形架咩…..比人見到我著件咁核突嘅天使裙，我仲有臉出嚟蒲咩？你好快啲解釋清楚….」李桐捉著土地的衣領，搖晃著土地說。李桐真的很憤怒，生前甚少發怒的他，死後竟然怒氣爆發。
「我就快比你搖散啦….你放手先喇….我幾億歲唔搖得架….咳…..我抖唔到氣啦….咳….」土地快要被李桐弄到窒息時，李桐才放手。
「嗱，你好講清楚咩事….」李桐仍然怒氣沖沖。
「真係壽星公吊頸…..先接你嚟做….咳咳咳咳….」土地不停深呼吸地說。
「咩壽星公吊頸呀？你好快啲講咩事？唔講我再搖你….點解我變左女仔架….搞到我負擔好重呀.......」李桐再次威嚇土地說。
「等等…咳….咳…..可能你落嚟果陣有啲野搞錯左掛，上層嘅野，我唔知架喎，你知喇，涉及中央機密，我咁低級點會知….」土地說。
「咁點解啲人見到我嘅？」
「咁你之前成為左靈魂去左天堂。依加落返人間，所以會做返人，咁人類未會叫到你，但又有法力，叫做半人半天使......」土地說。
「喂，我發現你地似玩我多啲囉…」李桐再次憤怒起來。
「等等，唔好嬲….我講多啲你知…..因為呢，之前冇人好似你咁天使考試會肥佬，所以上層比多個機會你，要你做下社會服務令填夠數。所以你要去幫月老手搞返掂啲婚姻緣。月老老喇，老眼昏花，搞到啲姻緣亂晒籠。」土地說。
「點亂法先？」李桐好奇地問。
「唉，你自己去睇下喇，我都唔識講…..嗱，因為你仲係實習….你嘅法力有限，每日只可以用一次，用法力時就講士多啤梨蘋果橙。法力用完後你就會變返普通人架喇，等到12點就會有返法力….」
「即係點呀？做返普通人即係要食飯去廁所？天堂食飯就吸收太陽同愛心？落到嚟食咩呀？我冇身分證，冇錢點生活呀？」李桐連珠砲發的說。
「普通人就緊係要食飯，天使就緊係吸收太陽同愛心喇，冇抵觸架….至於點食飯，你自己決定喇...搵食唔駛我教掛….上層話你好蠢，果然聞名不如見面。嗱，我手上有張卡施左法，你對住佢講變身分證，佢就變成身分證。講變會員卡就變成會員卡，但唔變得提款卡或八達通，因為涉及錢等於偷野，上層唔容許架…..」土地說。
「唉….我比你地玩死…..」李桐沮喪地說。
「唉，我都覺比你地玩死，你係咁多億年來，第一個考試肥佬嘅人，唔明你個腦裝咩….呀，有樣野再要提醒你，你唔可以話比你知你生前身分，如果一講就會暈低架喇。其他任何形式都唔得，講左被天堂警察知道，就會捉你返天堂….」土地千叮萬囑李桐。
「土地，我點再可能搵你搵月老呀？」
「去我地屋企叫我地就得喇….你就快醒，自己執生喇….」土地邊說邊消失在雲霧裡。
「喂，我未問完呀，邊到你屋企呀….….喂….」李桐緩緩地張開眼睛，看到了熟悉的天花板。劉琪在他旁邊睡覺。
原來他在劉琪位於銅鑼灣的家中那張床上。李桐生前會到劉琪家過夜。她很喜歡他從後抱著睡。她說這樣睡，彼此的體溫也融化在一起，特別有安全感。 看著在旁熟睡的劉琪，李桐忍不住流淚。李桐生前不是這樣眼淺的，或許是因為女性荷爾蒙影響了他。突然間，他發現自己的天使裙被脫下，換上了輕巧的襯衫和短褲。胸口前的兩團肉仍在，下半身的部分仍然失蹤。
「唉…..今次大獲了….」李桐坐起來嘆了一口氣。
「你醒喇….」李桐把劉琪弄醒了。
「唔好意思，麻煩到你…..」李桐說著。
「唔會，你身體仲有冇唔舒服？你昏迷左一日喇….」劉琪說。
李桐發現和土地談了一會兒，便用了一整天的時間。
「你肚唔肚餓？我煮個麵你食丫….」劉琪窩心地說。
李桐感覺到劉琪的關心，像有一股愛心湧入他的體內，令他感覺到飽滿幸福。此刻的李桐原來是天使。
「唔駛啦….我唔阻你瞓喇….」李桐凝望著劉琪說。
「世界上最遠嘅距離唔係生死，而係我企係你對面，都唔知果個係我，亦唔知我愛你….」李桐內心泛起的獨白，老土但卻傳神。
「小姐，其實我係唔係識你或者見過面架？我覺得你好面善….」劉琪問李桐說。
「Er…..」李桐支吾以對……