認真便輸鳥: 616.拯救林生
幾經辛苦，我終於清理完畢地上那攤小陳鳥的嘔吐物，而它已經冷靜下來… 希望是吧。
偽明蝠俠伸手到他西裝的暗袋，抽出一粒紅色藥丸，說:「陳仔，吞左佢。」
「等等先，呢粒血紅色既野係咩黎?」雖我相信他不會毒害我，但有人突然命令你吞一粒血色丸，你也會怯吧?
「陳仔，唔好怯，怯，你就輸一世! 呢粒係我地研發出黎既『消除蝴蝶效應劑』，配合埋呢支無鉛水，就可以消除喺你身上既異常反應。即係你既小陳鳥會變返直，唔會再向住我嘔。」偽明蝠俠邊說明邊從同一個暗袋拿出一支標籤著無鉛的清水。
「哇，明哥，你係咪叮噹? 點解你個袋可以收埋咁多野…」我從他手上接過藥丸和無鉛水，然後快快地把消除劑吞下。
「陳仔，既然你答應左幫忙，咁我地就唔好浪費時間，馬上出發去下一個時間特異點。」偽明蝠俠一把抓著我的手臀，把我拉到書枱前。
「喂…明哥，唔駛咁快呀…我仲未ready好喎…」我感覺猶如一位初次接客的牛郎，被馬伕硬生生地拖去「開工」一樣，那種忐忑不安令我菊花一緊。
「我明白既陳仔，但你要知道敵人已經開始行動，我地再唔快啲反擊，就會賠上兩個平行世界。我相信你，正如我一出世就準備做好地球人，我得，你都得!」偽明蝠俠抓實我的雙手，激動地說道。
「係既係既，明白明白，咁我地而家開始啦下…」為免他再抽我水，我只好快快答允。我能夠這麼想，看來那粒血色藥丸真的有效。
偽明蝠俠再從暗袋拿出一把小型鑰匙扣，那種形狀似曾相識，我定晴一望，然後我已經百分百肯定那是什麼了…加上他之後念出的咒語…
「隱藏著金句力量既鑰匙! 喺我面前顯示你真正既力量! 契約之下小明命令你立即! 解除封印! Time! Ma~~~chine!」
「哈哈哈! HIHI! 你做乜向左走向右走呀，哈哈!」頂，其實真的很難忍笑，想像一下黎明在你面前手舞足蹈地唸初代蘿莉的萌萌咒語，還要自稱做小明，那種落差感令我笑到要拾回掉在地上的內臟。
但我很快就笑不出了。
我書枱下的抽屜突然併出一道金光，伴隨一股燒焦的臭味和白色濃煙。
「陳仔! 過黎啦，我地而家要搭時光機去6月16號既香城!」
「黎老闆，唔好同我講我個櫃桶變左時光機…」
「根據你地A世界既文化，時光機係存在於櫃桶。」偽明蝠俠一本正經地回答。
「下…你地睇叮噹睇上腦? 唉，算啦，快啲做完快啲返黎，第二日仲要返工…」
我沒有和他爭論太多，便和他一同跳入叮噹時光機。
頃刻間，我們已到了6月16日，時間為凌晨12時整。
「太好啦陳仔，我地準時到達!」偽明蝠俠開心得露出他的招牌潔白牙齒笑容。
「好好好，咁我地而家要做咩?」
「我地要去寧波。」
「下?! 返大陸?! 我張回鄉證過左期九萬幾年…」正確點說，我從沒想過要續證，作為一個生於斯長於斯的毒男，怎會花近兩小時的車程出門? 我的活動時區絕不會超出一小時。
「唔駛擔心，頭先我已經預備左一個港口鑰。」這次他脫下左腳的黑皮鞋，嗯，有點咸魚的味道…
「你係話港口鑰? 喂唔好玩我啦明哥…我地呢啲麻瓜唔會有魔法世界既野。」哈他的波特，先是小櫻，再有叮噹，現在又來一個魔法用具，我究竟在和誰一起行動? 我真的看不透。
「陳仔，呢樣唔係魔法用具，係我地B世界科研既成果。黎啦，隻手放喺隻鞋上面，然後一齊唸啟動語『坎坷過後有艇搭』，下一秒我地就會去到寧波。」
很不情願地，我把手放到黑鞋上和唸出那句黎明金句。
蓬!
說時遲那時遲，我們已經到達寧波。
「點解我個身成陣咸魚味…我HI你個HI，好明顯係你隻香城腳既味!」
「我地去返核心既內圍先，陳仔，一陣你要扮中央專案組既人員，然後潛入去4689既單位入面，帶林生出黎，我地再傳送佢返香城。」偽明蝠俠對我指手畫腳地說道。
「阿黎生，一黎就打大佬? 唔係應該比我儲下經驗先? 我而家武器防具又冇，又唔識魔法，點去屠龍啊哥哥，我既固有技能只有詐病射波咋。」如果返工射波納入為奧運項目，我應可代表香城出賽。
「放心，我會從旁協助你。你先吞左呢塊蒟蒻，會令你聽得明同講得到北京腔既普通話，之後戴上耳機，我會一步一步教你。」他一定是叮噹的私生子，看，連翻譯蒟蒻都拿出來了。
唉，早知道這麼麻煩我便不答應了，不過為了我下半身的幸福，還是頂硬上吧。
「(普) 你是誰? 咱沒看過你!」守在門口的便衣公安問我。
「(普) 那個人派咱來。」聽著偽明蝠俠的指示，希望這句對白能騙過他吧…
「(普) 安檢密碼?」
「(普) 一國兩制是假的。」喂，是誰想這個安檢密碼的?
「(普) 任務內容?」
「(普) 一帶一路。」偽明蝠俠你沒玩我吧?
「(普) 同志! 放他進去!」
「喂! 黎天王! 我入左去啦!」我按著耳機的通話鍵向他報告。
「Bravo! 一陣陳仔你入到房，唔好多講，將耳機放響林生隻手，之後立即唸啟動碼，個耳機就會傳送你地返香城! 我地之後喺香城匯合!」
不消幾秒我便找到4689號房，打開房門，看到林生正在睡覺。
實在太好了，還在想若果他看到我要怎麼辦，他將會在睡夢中回到香城。
「坎坷過後有艇搭。」
蓬!
之後有關林生的事各大傳媒也有報導，除了CCTVB和維穩報吧。
第一次任務成功。
那麼，說好的囡囡呢?
未完…