早兩日OT遲收工,女上司叫我上去佢屋企..: 15

"係呢, 我睇唔出你都會做呢d野喎!"
 
我個心打左個突, 咩野? 係咪指我殺人?...
唔係掛...d女人痴線架? 咁樣都睇得出?...
 
"我一星期先會黎一兩次架, 如果準時放工, 得閒煮飯既話先會黎派下飯"
 
Jenny笑住咁講, 我眨下眼, 鬆左口氣 : 我...我都係得閒先黎一次..."
Jenny : 咁你呢星期都可以成日黎啦!
 


我呆左呆, 唔係掛, 唔通...唔通佢發現到我處理屍體既方法?...
 
"佢地好慘架, 平時訓街已經好辛苦, d空氣又污濁, 地下又多細菌, 前排政府仲要洗濕塊地趕走佢地....我睇到新聞好唔安樂, 想盡力幫助下佢地, 但又冇咩野叻, 最多煮下野食..."
 
Jenny講完一輪, 見我呆左, 即刻雙掌合實, 一副唔好意思:
"Sorry呀, 我講野唔經大腦, 成日都俾Angela話, 哈哈..."
 
我笑左笑 : 唔緊要...我連腦都冇....
 
Jenny有d尷尬, 突然間佢又講: 其實你都幾好傾呀, 我同你係公司識左咁耐, 都係第一次傾到咁耐計.


我: 我係好傾架, 不過唔明顯姐.
Jenny : 同埋你都幾好心地喎, 我問過幾個同事, 佢地都覺得做呢d野好哂時間, 又哂錢, 所以...我真係估唔到會係呢到見到你.
我: 哈哈....我都估唔到, 真係估唔到....
 
唔知點解, 本來個人冇乜胃口 , 成日都食得好少野
但食Jenny盒飯, 我食得好快, 食哂, 好飽, 好滿足...
好似....好耐未試過有呢種感覺.
 
我抹抹嘴, 俾番個飯盒Jenny, 但唔知點解佢眼甘甘望住我,
我有d猶疑咁講 : 都...都煮得幾好食....


 
Jenny一臉開心: yes!!!! 我唔洗再俾老豆話我煮野咁難食, 嫁唔出啦!!!!
我見到佢握哂拳頭咁既樣, 都忍唔住笑左出黎.
 
忽然間, 我諗起Angela, 唔知佢而家係台灣點呢?
佢會唔會好似同我一樣咁, 對於每一件事都咁不安?
對於每一句說話, 都會猜忌, 都會言者無心, 聽者有意呢?...
殺人好易, 做人好難..
 
我諗左陣, 就話: 夜喇, 番屋企訓覺啦.
起身準備走, 點知Jenny一下子捉實我: 喂!食完我d飯唔洗俾錢呀?
我頭都大埋 : 下? 係你話唔好浪費食物, 叫我食架喎....
Jenny : 我叫你食就食, 叫你去殺人係咪就去殺人呀?
 
我呆左一呆, 屌, 佢講野唔經大腦姐, 係我諗多左, 冇事既, 冇事既...


不過....如果Angela叫我去殺人....
我會點做呢?.....
 
Jenny見我又發呆, 突然間打左我一下 : 拿, 你俾個電話我 , 呢餐飯就算啦
我: 下?....nokia你都要, 貪唔貪心d....
Jenny:傻佬! 我叫你俾個電話number我呀!
 
我再次呆左一呆, Jenny似乎塊臉紅左一紅:
"我次次派飯都冇人陪, 好悶架嘛, 下次約你一齊派飯好冇?"
 
老老實實...你估我好想夜媽媽落黎派飯咩....留係屋企打下飛機唔好...
但唔通同佢講: 我隊冧左人, 又唔知點搞條屍好喎, 岩岩班友食果d全撚部都係人肉黎架哈哈哈咩...
 
於是我就up左個number俾佢, 佢即刻入左 : 打俾你睇下係咪真既先!
我: 我都話冇帶電話喏,傻....妹


 
好彩, 差d將個西字講左出黎添...
 
"係喎嘻嘻..."
 
見到Jenny笑, 唔知點解我都好想笑,
突然間我脫口而出: 其實...我聽晚都會黎派飯...