【夢幻】《我從來冇諗過我會有咁正既女朋友》: 惡夢

但係世事難料，今晚我又發左一個關於敏兒既夢！

  係一個我好想快啲醒既夢！  係一個我希望呢一世都唔會發生既夢！

  我去左一個周圍都好潔白既地方...  呢個地方唔係天堂...  而係一間醫院....  

企起我隔離既係敏兒..  我好疑惑點解我會起一間醫院到...

敏兒佢面色好蒼白，比上次佢發燒我照顧佢既時候更加嚴重....  「



仲成！我知道自己而家既情況！醫生都話因為我腦部既腫瘤愈來愈大，所以而家已經唔可以開刀做切除手術！ 當個腫瘤一爆既時候，我就會好大機會昏迷又或者死.... 我好驚我以後都見唔到你! 我好想同你結婚組織家庭！ 我驚我而家唔講我遲啲冇機會再講.... 你可唔可以應承我，如果我真係昏迷左你唔好等我...我唔想見到你咁辛苦，日日照顧住一個垂死既病人。 我唔忍心見住我心愛既人日日咁哀傷落去！生活係痛苦底下... 我知你曾經最愛既人係我就已經足夠....你再去搵自己既幸福...你應承我好冇？我知你心裡面有過我就已經滿足...」敏兒好激動喊住講呢一番說話，我見到佢喊得好淒涼，我個心都好痛好痛！


我已經唔想問佢任何既問題...  

我好大力咁攬實佢，我感受到敏兒既體溫亦都感受到佢既悲傷。 

 我不斷同自己講...  呢個係一個夢...係一個夢....起身啊！李仲成!快啲離開呢個咁恐怖既夢境...... 

  我突然之間醒左，我發覺我眼淚不斷地流下...  



明明只係一個夢，點解會再次咁真實....  

我好驚真係會發生....敏兒明明今日先同我講過幾年前佢切除左個腫瘤，醫生明明話復發機會好微。

  冇可能架！一定冇可能架！

  一定只係一個夢,一個永遠都唔會發生既夢。

   我同自己講，我一定要好好珍惜呢一個女仔。我好想同佢拍拖，我好想同佢結婚！



我好想比到幸福佢同保護佢！  我相信敏兒都係鍾意我架！

只不過係我唔夠主動....  

所以我決定左起下星期六放假就同佢表白！我唔想令自己後悔！

  我唔想用敏兒既生死黎証實我有冇可能會預見到未來發生既事情....

我唔想咁樣....  我同自己講一定又係我推測錯誤！

我點會冇啦啦因為一次撞車而預知未來啊！ 

 同人講都實以為我痴撚左線啦！  



我由細到大都一事無成，人生一直都冇目標！  

而家我既人生目標就係去愛呢一個女仔！比到幸福快樂既生活佢！

 我決定左今晚放工再去搵志威吹下水，問下佢有咩意見比到我都好。

話哂係我人大事點都要同佢講聲既！   

而家重係凌晨五點鐘，我可以再訓多一陣先去返工！ 

 聽日見到敏兒都要開開心心，我唔想同佢講夢中見到佢舊病復發， 一件夢中發生咁虛無既事情，唔可以因為我咁同佢講而另佢有所顧慮。   

我send左個whatsapp比志威叫佢今晚老地方見，因為我想請教下佢應該做啲咩而另敏兒覺得感動，然後再同佢表白！