【夢幻】《我從來冇諗過我會有咁正既女朋友》: 飛越太空山
鈴鈴鈴…鈴鈴鈴…鈴鈴鈴
係Iphone既電話鈴聲...邊春個咁早打黎煩住哂啊…
因為太嘈既關係..最後我都係忍唔住聽左個電話...
「喂！邊個啊！」我用一個好唔耐煩既語氣講出句說話
「仲成..係我啊！你訓緊教啊..對唔住啊..嘈醒左你..」一聽把聲我就知道原來係敏兒佢打比我...岩岩我係眼訓到連邊個打黎都睇唔清楚
「哦..唔緊要啦..你搵我咩事啊？ 」我既態度即刻有所好轉，如果呢個係廣告電話我應該會講句屌跟住就會勁燥底咁cut線再訓過
「仲成，你今日得唔得閒啊？」我聽到敏兒咁問之後，心諗佢今日唔係要同條狗公「側田」去迪士尼做野架咩...
「得閒啊！做咩咁問既？你今日唔係去迪士尼做野咩..」最好唔好比我晨早流流聽到條煩膠把聲，如果唔係我真係會好撚燥。
「Justin佢岩岩打電話比我話今日因為屋企有急事黎唔到..但我地約左個客聽日見面講我地既廣告idea，所以今日一定要去。仲成你得唔得閒陪我去啊..」我聽到敏兒咁講之後真係成個人都醒神哂！今次真係天助我也！！
「我得閒啊！幾點邊道等啊！」我二話不說就應承左敏兒，我覺得係個天想比機會我彌補返之前既錯失。
「真係架！太好喇！咁我地十二點起九龍塘等啊！」敏兒見到我應承左同佢一齊去都顯得十分雀躍。 當我地見到面既時候，就一齊搭地鐵入去迪士尼。 今日因為係星期六，所以都幾多自由行同埋「鴨仔團」。
海洋公園同迪士尼好唔同...有咩唔同？除左主題唔同之外...
最重要既分別就係...迪士尼永遠都係咁多大陸人...
所以當我聽到「上海迪士尼」好快就開幕既時候，我真係非常之感動...
加上重比我見到有人用「殘體字」留言話，「上海迪士尼那麼大，我們也不用去香港了。」 嘩！見到呢個留言我真係立刻比個讚佢同時內心亦十分之滾動，希望佢地真係識咁諗先好。
但講開迪士尼....唔知大家重記唔記得...我曾經起夢中都同敏兒去過呢個地方呢...
但現實中既我，呢個咁有童真既地方「我真係淨係中學旅行用團購價先去過一次」。
無理由我發夢去過就當去多次架嘛…好快我地就到左迪士尼門口，我地當然唔洗每人比成五舊幾水入去啦！因為我地係有
免費飛 ！
當我一入到去同夢中一樣都係見到好大個米奇老味既頭像...
我企起道呆左咁望住呢個米奇老味既頭像...
呢個地方又令我開始諗起..「夢中」同「現實」既關係...
「仲成你重企起到做咩啊！快d入去玩啦 ！好想玩飛越太空山啊！」講完之後敏兒佢就拉住左我隻手入去玩
點解呢一句對白...咁似曾相識既...好似「夢中」既敏兒都有講過同一句既說話...
因為飛越太空山係有得拎fastpass ，所以我地決定拎左fastpass先到時再一齊返黎玩！
敏兒話佢今日一定要做一個好有童真既大細路，因為咁就可以投入到小朋友既角色，從中搵到靈感。
「起我心目中你不嬲都係一個小朋友黎架啦！咁你而家想玩咩啊？」我望住敏兒再mit一mit佢塊面，佢塊面除左好滑之外重好有彈性，真係好可愛。
「我想玩....巴斯光年！」敏兒望一望周圍附近有咩玩，跟住見到巴斯光年起隔離就話要去玩喇！
巴斯光年最好就係有大量座位，可以唔洗排隊。
我同敏兒上左同一架車，之後我就開始拎起條槍係咁「亂射」。
但就算我亂射最後都係高分過敏兒..因為我見到敏兒每射一下都好似參加射槍比賽咁，我見到佢咁認真都忍唔住笑左出黎。
「點解你每次玩咩遊戲都咁高分架...」敏兒見到佢自己個分數之後再好自奈咁望一望自己個分，我地既分數的確又真係相差幾遠既！
「緊係啦！我由細個開始訓練到大喎！」大家唔好諗多左...我真係講緊打機！我最鍾意就係玩槍game，所以對我黎講玩呢個巴斯光年真係想低分都難。
大家即管比我囂張一陣啦..因為我除左自豪自己打機幾勁之外..
就真係冇架喇...
「仲成，你下一個想玩咩啊！今次你話事啊！」敏兒好民主咁比我決定今次玩咩
「我想玩灰熊山谷啊！上次玩過都幾爽！」我地好快就向住灰熊山谷既方向直行。
去到之後發現好好彩，因為都唔係話好多人排緊隊...
其實我真係唔介意排隊，我只係好憎比人瘋狂打尖！
等左十分鍾左右就到我同敏兒喇..
「我都係第一次玩灰熊山谷，之前見到個廣告都想玩左好耐架喇！」敏兒用興奮既語氣講出呢一句說話，令我都有小小愕然因為佢竟然唔係起到嗌哂救命話唔想玩。
不過自從上次敏兒同我去完海洋公園之後，佢已經比我感染到鍾意左玩機動遊戲。
成個過程我同敏兒都拖住大家舉高雙手，大家玩過灰熊山谷都知最刺激既都係向後衝完再向前衝果兩下架姐！
我真心好感激Justin比呢個機會我同敏兒今日黎左呢道玩得咁開心，如果佢唔係因為有事黎唔到，而家同敏兒玩得咁瘋狂果
個就係「佢」....
腦海裡突然之間彈出左呢個咁「恐怖」既畫面...搞到我成個人都打一打冷震... 玩完灰熊山谷之後我同敏兒就去左「反斗奇兵大本營」繼續玩喇！
我同敏兒都玩到完全唔記得左今日黎既目的係搵靈感sell廣告，不過唔緊要啦！唔玩得盡興又點會諗到idea呢！
我地起「反斗奇兵大本營」玩左一兩個機動遊戲就去左食少少野休息一下！
迪士尼真係一個比人重拾童真既好地方，我相信呢道係有一種魔力！
呢一種魔力可以強大到令人恢復童真既心境！！！
當我地食完野既時候，天黑都開始昏暗。
「我地不如去玩旋轉木馬啊！我以前細個好鍾意聽〔他約我去迪士尼架〕！」 兜過幾個圈 看木馬旋轉
美夢似是遙遠 仍埋藏著繾綣
快樂旅途中 有沒有熱戀
看著這入場券 如同尋獲溫暖
笑問你 你話連夜候票再多的困倦
也不怨 似在平靜地說出 絲絲的愛戀 畢生也願記起 香港迪士尼
煙火璀璨夜晚定會很美
坐咖啡杯 溫馨記憶 旋轉中細味
天邊星宿也沒法比 今天心碎或痛悲 只需要記住陪伴在你身邊有米妮 始終可以幸福地 沉迷在美夢裡希冀 https://www.youtube.com/watch?v=qekOjEQK9Q8 敏兒佢唱出左頭幾句既歌詞，呢次都係我第一次聽敏兒佢唱歌！
係一把好甜美既聲線，亦唱出左呢首歌既「幸福的感覺」。
同之前起「腦海」裡面聽到既哀傷聲線真係好唔同....
「仲成，你做咩呆左既！我地而家行啦！」敏兒講完之後就好快拖實左我隻手，我亦都係因為佢呢一個動作先清醒返。
而家既我又不自覺地諗返起..當日「敏兒」唱「洋蔥」既畫面...
當我地上左旋轉木馬既時候，我先諗返起對上一次玩已經係勁耐之前既事...
因為我不嬲都唔係話好鍾意玩啲不斷「轉黎轉去」既機動遊戲！ 「兜過幾個圈 看木馬旋轉 美夢似是遙遠 仍埋藏著繾綣」
第二句既歌詞意思亦都表達到點解我一直對「夢中」所發生既事咁情意纏綿、不忍分離。
其實當我地玩完旋轉木馬之後我成個人都有少少頭暈...
跟住敏兒好快就提議左不如去隔離玩埋「咖啡杯」...
我心諗..唔撚係掛...咖啡杯咪即係超級加快版既旋轉木馬...
敏兒話口未完，已經好興奮咁拉住我行緊過去咖啡杯既方向...
見到敏兒佢咁想玩咖啡杯，我又唔忍心同佢講其實我最憎就係玩啲「轉黎轉去」既機動遊戲！
所以最後都係決定「頂硬上」...
但我又點會估到敏兒會瘋狂咁樣轉咖啡杯果個「軚盤」先得架...
敏兒佢重要愈轉愈興奮...完全留意唔到我「辛苦」到就死既表情...
當我地玩完既時候，敏兒見到我無啦啦「面青口唇白」再加標冷汗咁既樣就好擔心咁問我係咪唔舒服...
「唔係啊..岩岩玩完個咖啡杯有少少暈暈地！抖一陣就冇事！」我承認我係比較「弱雞」左小小... 當敏兒打算拎紙巾出黎幫我抹下啲「冷汗」既時候...
發現左原來我地一直都唔記得左去玩「飛越太空山」，明明一入黎敏兒第一樣話要玩既野正正就係飛越太空山，點知而家會變左最後先黎玩！
「我抖多幾分鐘玩埋你最鍾意玩既飛越太空山就走啦好冇？」抖左一陣既我已經好返左好多，面色亦都開始紅潤返，唔再好似岩岩咁蒼白。
「你係咪真係得架..不如我地而家就走啦...」敏兒都重係擔心緊我會唔舒服...
「唔好啦！還掂都係最後一樣喇！都唔差在玩埋呢個先走啦！」 我用堅決既語氣同敏兒講呢番說話，因為我知道佢最鍾意玩既就係飛越太空山。
「好啦咁...你真係唔好死頂啊！如果唔係到時你暈低左要call白車就唔好啦！」敏兒帶點搞笑既語氣講出呢一句說話
「傻既！緊係唔會啦！我地而家行啦！」今次反而變左係我好興奮咁拉住左敏兒行去玩飛越太空山既方向。
因為而家已經入夜，自由行同鴨仔團都走得七七八八，所以就算唔用fastpast都唔洗排好耐隊就玩到。
等左大約十分鐘左右，就排到我同敏兒喇！
我地坐左起第一個座位，但唔係我地自己要求坐第一個位，真係咁岩得咁橋。
當我聽到「各位太空探險家，為左你既安全請坐好...」廣播既時候，就估到準備開始啟動。
「飛越太空山」應該係暫時全香港唯一一個配合背景音樂既室內過山車！
一開始都係見到一片黑色既畫面，同埋聽到科幻既背景音樂
之後架過山車慢慢向上緩升緊既時候就會見到有好多閃下閃下既「框框」同埋前方一個好夢幻既黑洞
「我地就黎入去個黑洞喇！」隱約聽到旁邊既敏兒用好期待既語氣講出呢一句說話
當我地要進入個黑洞既時候....