我老婆參加咗歌唱大賽......: 2

「老公~返黎喇？今日攰唔攰呀？」
雖然Shirley有時真似令我好尷尬，但係每日返到屋企，聽到佢講呢句嘢，再攬住佢，我簡直覺得自己係全世界最幸福嘅男人！！

「我煲咗湯俾你呀，你想而家飲定聽朝先飲？」
「老婆特登煲俾我，緊係而家飲啦，我去斟啦，你坐喺度。」
「嗯~」
入到廚房，正打算斟湯時，Shirley輕輕喺後面攬住我。

「老公呀，唔知點解今日特別掛住你。」
我擰轉身錫咗佢一啖，「傻妹，做咩事呀？」


「我係咪成日阻住你做嘢呀？」Shirley眼紅紅咁望住我。
我即刻攬實佢：「點會呢，老婆搵我我不知幾開心，點會阻住我。」而實情係......唉！

「老公呀，不如我出去搵返份工吖？」
「點解呀？」
「因為...我成日得自己一個喺屋企，好容易就覺得悶，一悶就好想搵你...」
我打斷佢。「老婆，你知唔知我點解要娶你？」
佢一聽到呢句，即刻面都紅晒。
「係因為我要你做我嘅女人，我要你舒舒服服留喺屋企做我老婆，唔洗去返工受人氣。如果你悶可以去買吓衫，坐吓Cafe，或者學吓嘢，唔夠錢就同我講，好冇？」
「唔係錢呢個問...」


「好、唔、好？」
「好...」

你話我大男人唔俾佢出去返工？咁我錫老婆冇罪架嘛，我可以靠自己一份糧就養得起頭家。雖然公司班細嘅成日笑我老婆，但係我知佢地其實好羨慕佢，有個咁好嘅老公，哈哈！