【中學時期，我竟然被一個女仔改變晒】: 七、肥源
七、肥源
過左成個星期，我都仲係好頹咁生活，上堂無心機聽書，雖然平時都唔多聽書，但呢家直程係上堂連吹水，挽，小息睇女仔既心機都無。
頹左成個星期，我決定落去飯堂，睇下D女，等自己唔好沉淪喺Joyce度。
肥源食住左手上既鹵水雞肶：「喂，死仔，變左喎，做咩變到咁頹呀？」
我無回應。
肥源：「喂，做咩姐？」
我只唉左一聲。
大智：「個死仔一直中意緊既女神原來有男朋友呀。」
肥源吮住雞骨：「咁少野咋嘛，小白你唔係咁都頹吓嘛。我慘過你好多啦。」
大智：「我都係咁諗呀，都唔知有咩好頹。咦，肥仔源聽你咁講，你都好似有D問題喎。」
肥源邊從褲袋攞出袋麥樂雞一邊講：「係有少少事既…不過我本來只係想同小白講架咋……」
大智佯裝要打佢：「屌！你個死肥仔唔同我講？！講呀！」
我低住頭：「肥源有咩你咪講囉，大智份人唔錯，都幾識諗既。話唔定可以幫到你呢。」
肥源抹抹嘴邊既油：「咁呀……好啦…就咁既…其實我都有個女朋友既……」
大智諤然：「唔係吓嘩…你咁肥都有女朋友？！」
肥源：「咩呀！！！肥人唔可以談戀愛架咩！」
大智：「又唔係既，不過你有女朋友我就真係有D驚訝咁啫。」
我HEA答：「講番正題啦。搵我咩事？」
肥源：「無咩既…我覺得我女朋友其實好似唔多愛我。」
大智：「何出此言呢？」
肥源：「唔知點講好…我覺得其實我地好似唔係拍緊拖咁……」
大智：「此話又係何解呢？」
肥源：「唉…你地拍拖三個月會唔會手都唔拖，嘴又唔錫，又唔抱咁呀？」
大智：「唔係吓嘩…你講真架？」
肥源：「呃你有咩用呀……」
大智：「咁都幾大獲喎，小白你點睇呀。」
其實我一直都無聽過佢地講既野，一直都係諗緊女神同佢男朋友既野，不過唔比D意見又好似好衰。
我唯有隨隨便便答句：「分手囉，你咁多意見，相信條女都唔會改架啦。」
肥源：「吓…但我唔想同佢分手喎…」
講真個句，我個心已經夠煩，你呢家要我幫你諗計搞掂你D私人事…咁我D野又邊個幫我搞掂呀。但我無講出口。
反而用好重既語氣，又爆晒粗咁講：「好撚心你啦！你同人拍拖拍到好撚似做兵咁。你自己話啦，你同兵有系唔同咩，又唔錫、又唔拖手。屌你呢家係咪追求緊『柏拉圖式戀愛』呀！」
肥源低頭說道：「咁又唔係…」
我：「講開又講，你條女叫咩名？」
肥源：「咦，乜小白你又想識咩？」
我啖氣依然未落：「屌！緊係唔撚係啦，知道邊條八婆咁樣搞我兄弟，遲下搵佢算帳。加上以後溝女都唔會溝到佢。」
肥源：「咁又係既…我條女咪我地班果個韓玲囉。」
大智：「吓！果個大波妹呀？！」
我：「大波妹？哦！即係邊個呀？」
大智拉着我同肥源：「屌，番到班房話你聽啦。行啦上去啦。」
我：「得啦，我晏D先上去啦，你同肥源上去先啦……」
大智：「咁好啦，你無咩既快D上黎啦。」
我：「嗯，知啦。喂肥源幫我同大智開locker呀。唔該。」
雖然大智都係跟肥源一齊上去，但大智係唔會開locker果種人，要人地幫佢開埋攞書。
我點解唔上去？因為我唔想被我佢兩個見到我頹既樣……但係我反而被一個我更加唔想被佢見到我既人，見到我既頹樣。
無錯，係Joyce。佢見到我即刻對我say hi，但我並無理佢。直到佢坐喺我對面。
Joyce：「喂，做咩唔理人呀你？」
我依舊無回應，甚至打算起身走人。點知有人拉住我隻手，唔洗轉頭都知邊個啦。
Joyce：「喂，上次見面又話有機會再見面既話再傾計既，做咩又要走呀？」
我：「咁你想傾咩。」
Joyce：「你做咩咁頹呀…連態度都變晒既。」
我：「唔關你既事。」
佢無出聲，我諗諗下呢句好似有D問題。
我只好補番句：「我意思係我頹都唔係因為你而頹，唔好誤會。」
Joyce微笑着：「我知呀，你做咩咁急要解釋呀。」
唔知點解對住佢好似唔會唔開心咁，頹既感覺都繼而被我迫走。
我：「急？我唔急呀，你急咩？急就快D去廁所啦。」
Joyce佢大笑，我完全Feel到旁邊既小毒男已經啤住我。我反而無沾沾自喜，因為我知道佢有一個比我更為完美既男朋友。但我好享受同佢傾計既時間。
我想同佢講多D野：「係呢…你係咪有男朋友架？」
Joyce：「你點知架？佢係咪搵人搞你呀？你無事嗎？」
搵人搞我，我無事？Joyce講既野我一句野都聽唔明，不過大概估到係咩事。大概係佢男朋友為左唔比佢同其他男仔接觸，所以就會搵人警告果D同佢做朋友既男仔，但係佢男朋友好似唔係呢間學校，因為我睇佢既球衣上面寫住既學校名唔係我地讀緊果間…即係話佢男朋友係識我地校既高年級。
Joyce在我面前輕輕揮着手：「喂？你無事嗎？」
我：「我無呀…你講咩搵人搞我呀，點解我唔明既？」
我本來諗住扮下傻可以過關，點知後果更加嚴重……
Joyce：「你咁慢先答人，而且你岩岩答得咁驚，好明顯係我男朋友搵人搞你啦。唔洗驚架，我今晚同佢講，叫佢唔好搞你！」
仆街，咁佢男朋友咪知道我呢個男仔既存在，到時可能真係搞我架喎。
我口窒窒講：「唔洗講啦，我都無穿無爛，我咩事都無喎。」
唔講都算，講左出黎反而令佢更加信佢男朋友真係有人搞我……金翅仆街鳥。
Joyce：「得啦！你唔洗講架啦，我會幫你架啦。」
講完Joyce就走左，小姐你越幫越忙呀，我今次賣屎忽都唔掂啦……
不過我份人比較奇怪，應付一樣野可以有唔同既心態去對待。
諗真D呀，其實佢男朋友咁樣隔絕左佢既交友圈子都幾有問題。好野係應該分享架嘛，佢男朋友真係唔通氣。反正呢家都洗濕左個頭，解釋都係無謂既，要黎既始終都會黎啦。既來之，則安之。我就睇下佢男朋友有咩咁威威！