~到第二朝因為已經放緊年假唔洗返學嘅關係我訓到自然醒,
我拎起床邊嘅電話睇,咦...原來都仲係朝早十點幾咋喎,都唔算好晏姐。
 因為好急嘅關係,所以我就起左身行左去廁所啦。

搞完一輪出離,我行左出廳度,原來老豆成晚都訓左喺梳化度囉,
而家仲係未訓醒,唔知佢琴晚又睇戲睇到幾點先訓啦...。

我冇理到老豆,坐左埋去佢側邊開左部電視細細聲喺度hea睇...,睇左一陣之後。
 「…若...冰...。」老豆無啦啦發開口夢囉...而家伸左隻手埋離摸住我隻大脾....,
吖...救命呀....好想打冷震呀...。



我成個人即刻縮開左,老豆比我嘅動作搞到醒左一醒,
而家對眼半開合咁...四圍望...。

 「…若...冰。」望到我果陣,
老豆又開始細細聲咁叫左聲若冰啦。

 「...喂...老豆...你唔記得左我係子欣拿?」我繼續縮後,有小小緊張咁講。

 「……。」老豆而家捽一捽眼,個人好似清醒返啲咁...。



 「…係...係喎...仲以為發緊夢添...。」老豆捽完眼之後答我。

 「…er....。」我er...左一下。

 「...做...做咩咁驚咁嘅...,唔係...我訓緊果陣...做過啲咩掛???」
老豆見到我成個人縮後左咁,所以問我。

 「…er...冇...冇野...。」算啦...講出離咪盞老豆自責....。



 「…吖...嗚...。」老豆伸左個懶腰之後就行左入廁所啦。

 而我呢...就繼續坐左喺梳化度睇電視,睇睇吓呢...唔知點解心血來潮喎,
走左去櫃桶度係咁摷啲舊相簿出離喎。

 「…子欣...搵緊咩呀?」老豆去完廁所行返出離問我。

 「...嘻嘻...冇呀...突然間好想搵返阿媽啲相出離睇吓咋嘛...點解冇嘅。」我一邊搵一邊講。

 「…哦...你阿媽啲相好似放左入我間房度呀,等我搵比你啦。」老豆一邊講一邊行左入自己間房,
而我就執返好個櫃桶先,到我執返好哂啲野之後,老豆就拎住幾本舊相簿行出離啦。

 「…呼...啪.....呼...。」老豆而家一邊用手抺一邊用口吹走相薄面啲塵。

 「...拿...。」老豆抺乾淨之後就遞左比我。



 「...唔該...老豆。」我接過之後就打開離睇啦,
睇吓先...嘩...唔睇唔覺...而家睇返我同後生嘅阿媽真係餅印咁囉....,
我諗send張相去比一軍睇話係我都有可能會信囉...。

 「....真...真係...幾似喎...。」我呆左咁一邊睇一邊講。

 「...哈哈...你估老豆吹水架咩...,子欣你真係似到你阿媽十足架...,
拿...睇吓依張...我同你阿媽去海灘游水果陣影架...身材真係好到呢...。」老豆邊睇邊講,
講到好興奮咁....,不過阿媽身材真係幾好嘅...著住件比堅尼身材仲好過我添呀。

 「...不過子欣你都唔差...,直頭拍得住你阿媽添呀...。」老豆講講吓又無啦啦燒埋我果堆添。

 「....邊...邊係喎...阿媽身材好好多。」我面紅紅咁講。



 「...哈哈...諗落都係因為有我嘅良好遺傳姐...。」
老豆...我邊忽似你喎...擺明係因為阿媽嘅良好遺傳啦。

 「…係喎...子欣記住初一要去姑姐度拜年喎。」老豆無啦啦醒起。

 「...吓...我而家咁...點拜喎?」我好驚訝咁講。

 「…係...係喎...唔記得左添,點好呢...。」老豆依家個樣好無奈唔知點算咁。

 「...不如...唔好去囉。」我講。

 「…點得呢...過年緊係要去拜年架啦。」老豆好緊張咁講。

 「…er....不如話我係你姪女吖。」我再講。



 「…er...阿女呀...你覺得你同你阿媽成個餅印咁會呃到姑姐咩?」老豆串我囉。

 「...且...之前阿姨都唔認得我啦。」我講。

 「…你阿姨...若玉?」老豆問。

 「…係呀...之前上去表妹度,表妹都係話我係子仁堂妹咋嘛,
阿姨都冇懷疑。」我大條道理咁講。

 「…點同呢...你阿姨係大近視離架,又成日貪靚唔肯帶眼鏡,
邊睇得清楚你個樣架。」老豆好認真咁講。

 「...你咁講又好似係喎...咁又唔得...咁又唔得...唉...好煩呀。」我有啲發悔氣咁行開左。

 「…子欣...乖啦...唔好炆,我一定會認你係我個女架...


至於點解釋呢...等我度一度啦...好冇...唔好嬲啦。」
老豆而家對我好似對住阿媽咁千依百顺...有啲唔慣添。

 「…er...我邊有嬲姐老豆...,小小炆姐。」我講。

 傾完一輪之後,老豆話好耐都冇飲過茶喎,話好想去飲吓,
所以我地就換衫落左樓下商場間酒樓度啦。

嘩...今日雖然係平日咋,但係因為臨近過年嘅關係...酒樓依家人頭湧湧呀...,
企喺門口等位嘅人多到好似恆河沙數咁...,不過好彩...我同老豆得兩個人飲,
細枱相對較易有位,我地等左十幾分鐘就順利入到去坐啦...yeah。

 「...飲咩茶呀?」一坐低...阿姐就問我地飲咩茶。

 「…唔洗啦...你比啲滾水我就得啦。」老豆好有型咁講。

 「…唔要茶???」阿姐好疑惑咁再問多次。

 「...得架啦...阿姐。」我再講多一次,阿姐先肯行開。

嘻嘻...鬼咩...依啲茶老豆邊飲得入口架...老豆一早自己帶左啲私伙野離啦。

 「…佢果啲茶邊飲得落口架,緊係飲我地福建嘅(小紅袍)啦。」嘻嘻...比我估中左老豆講咩...,
老豆一邊講一邊喺褲袋度拎左一包仔茶葉出離,之後就用滾水起勢咁沖緊啦。

 「...拿...阿女牙,記住頭果次係洗茶葉架咋...快手倒左佢唔好飲,
之後呢,就再落滾水焗一焗佢...,唉...不過依度咩用具都冇...嘥左我啲茶葉吖。」
老豆對飲茶真係好鬼死講究囉...唔知係咪個個福建人都係咁架呢...,
平時喺屋企又話要用紫砂茶壺又盛咁...,我就真係唔識欣賞啦。

唉...冇佢咁好氣,喺老豆好認真咁沖緊茶果陣,
我就緊係喪點野食啦...菠蘿叉燒包呀....鳳爪排骨呀...
燒賣呀...全部都好想食呀...唔理啦...點左先算。

 就係咁...我點到停唔到手,終於離到成枱都係野食啦......。

 「...嘩...阿女...你叫咁多野食...食唔食得哂呀?」老豆睇到眼都凸埋。

 「…er...嘻嘻...。」死啦...玩大左添...,點果陣好似冇咁多架喎,
而家枱面有成十幾碟呀...點食喎。

冇計啦...唯有食得幾多得幾多啦...。

 係我諗緊點先可以食得哂嘅加減數其間,救星突然間出現。

 「...表姐...。」係表妹呀...佢依家行左入離。

 「...表妹...啱啦...一齊食啦。」我即刻企左起身拉左表妹埋離我隔離。

 「…咦...大姨仗返左離拿。」表妹終於都見到坐喺我對面嘅老豆啦,而家好驚訝咁講。

 「...喂...家蔚,大過左好多喎。」老豆望一望表妹講。

 「...er...係囉...係囉。」表妹hea老豆囉,個樣仲好無奈咁...唔知咩事呢。

 「…喂...阿女...有位啦,行去邊姐。」死啦...原來阿姨都喺度,
唔怪得表妹咁尷尬咁啦...諗諗吓...表妹離得飲茶緊係同阿姨一齊離架啦....死啦死啦....點算呀!!!

 「...咦...子欣...咁啱又離飲茶牙。」阿姨見到我啦...。

 「…嘻嘻...阿...阿姨你好。」我口窒窒咁答。

 「...哦...你爸爸牙,你好呀...不如一齊坐啦。」阿姨竟然仲未認到老豆囉。

 「...er...好...好呀,隨便坐啦...阿玉。」老豆口窒窒咁講,
而阿姨就同時坐左落離我地張細枱度啦,雖然逼啲但係都仲坐得落嘅...。

 「...啲野食啱啱到架咋...唔夠再點吖...飲杯我沖嘅福建小紅袍先啦。」
一坐低老豆就好鬼死熱情咁招呼佢地。

 「...咦...點解子欣老豆把聲好似咁熟咁嘅....?」阿姨忽然靈光一閃,
依家喺個手袋度拎緊副眼鏡出離添啦....。

 「...er....。」老豆面有難色咁。

 「…吓...你....你....你...」阿姨帶左眼鏡之後望住老豆好疑惑咁嘅樣,
不停講你...但係又講唔出老豆係邊個咁。

 「....。」我同表妹都唔敢出聲,將個波交比老豆,靜靜咁睇住事態發展。

 「...華...安...。」阿姨終於都認得老豆啦,
而家好驚訝咁...望住老豆又望吓我。

 「...er...好耐冇見啦...阿玉。」老豆好尷尬咁同阿姨打招呼。

 「...乜...子欣...係你個女???」阿姨繼續驚訝...而家轉而望住我。

 「…咪住先...而家睇清楚子欣個樣...,吓....點...點會咁架 ...
同...同家姐....咁似樣嘅...?」阿姨而家擘大個口得個窿咁,
個下巴好似就離跌出離咁。

 「....子欣佢...係家姐個女?」阿姨依家望住老豆好疑惑又好緊張咁問。

 「...er....係。」老豆諗左一諗之後答。

 「...原來當年家姐係生左對龍鳳胎呀?」吓...咁都比阿姨諗到...。

 「...咪...咪就係咁囉...,子欣細細個果陣,我就送左佢返福建比我家姐照顧啦,
果陣阿玉你都未喺美國返離...。」嘩....估唔到老豆仲吹得大過我囉...點夠你玩呀...,
咪住先...咁咪即係話我係...大陸妹???....搞錯呀...我唔制呀!!!