[預知未來] Frozen 2劇情大綱

0. 一開波第一幕發生於某城市中 一班身份不明o既人比一大隊警衛追殺 

1. 當中幾個人比箭射死 最後得一個男人跳入河中成功逃走

2. 鏡頭番番去主角群果邊 首先梗要有D日常系情節(仲要唱下歌仔 Anna同男主拖下手仔咁)

3. 然後新角色登場 兩位女主去郊遊時係河邊救起一個昏迷的神秘男子(靚仔)

4. 個神秘靚仔失左憶記唔起自己係邊個 Elsa同Anna就當左佢係屋企人咁接左番去一齊生活





5. 神秘靚仔同Anna互有好感 男主騎鹿靚仔對神秘靚仔心存芥蒂 例牌的三角關係就此確立

6. 好境不常 此時主角們個王國比第二個王國侵略(呢度要整首好雄偉 o既歌) 於是Elsa要御駕親征上戰場

7. 大反派就係敵國大權在握o既邪惡宰相 以及受其控制o既年輕國王

8. 邪惡宰相識用火焰魔法 加上敵國黎自北方唔怕風雪 Elsa一方陷入苦戰

9. 敵國提出和談 條件係要Elsa嫁過去比敵國o既年輕國王做老婆





10. Elsa唔想再有生靈塗炭 所以答應嫁比對方換取和平

11. 呢度要展示出Elsa作為女王o既成熟 愛民如子 以大局為重同自我犧牲等角色特點

12. Anna極力反對 同Elsa嘈完又喊完但都阻止唔到 Elsa臨走前叫Anna要堅強同繼承佢個王位(順便唱番隻煽情歌)

13. 敵國邪惡宰相同使者團黎接Elsa走 此時神秘靚仔離遠見到邪惡宰相 終於記番起自己o既身份

14. 神秘靚仔原來係敵對王國o既王子 亦係正統王位繼承人 只不過比邪惡宰相o既奸計所害而淪落民間





15. 敵國現任國王係王子(神秘靚仔)個細佬 份人on99又無能 只係邪惡宰相o既傀儡

16. Elsa走左之後 王子同Anna講左自己身世 然後計畫番去自己個王國奪回王位再終止戰爭

17. Anna為左救家姐自願幫助王子 騎鹿靚仔為左保護Anna又要一齊去 鹿仔同雪人理所當然都跟住去架啦

18. Anna 王子 男主(騎鹿靚仔) 佢隻馴鹿仲有雪人5條友穿山涉水前往敵國o既首都

19. 途中Anna覺得好不安同徬徨又懷疑自己o既能力 雪人見狀就講幾句廢話同Anna打氣 於是Anna就鼓氣左勇氣了

Olaf: We will bring her home!You have to belief in yourself!

Anna: Thank you Olaf.(Smile)

(設計對白)





20. Anna見王子朝早會練劍 為左面對接下來o既戰鬥 Anna請王子教佢劍術 過程中擦出愛火花(男主於是更加睇王子唔順眼)

21. Anna練劍一黎為左角色成長(主角點都要有番樣技能) 二黎帶出現代女性要自強自立o既電影理念

22. 呢度要埋番個伏筆 Anna問王子佢D劍術邊度學番黎 王子就答係跟王國第一劍士學 而佢住係市郊某村落 仲話遲下有機會可以一齊去見佢

23. 終於到左首都 王子帶佢地入城中一間酒館同仲未死o既地下革命黨會合(亦即第一幕被追殺班人)

24. 班革命黨就Disney例牌人設 個個外表粗獷但心地善良 同主角們唱番隻歌仔就做左好朋友

25. 革命黨其實係王國前朝o既老忠臣同士兵 同邪惡宰相敵對 想發動政變幫王子取回王位

26. 去到呢度要交代下各主角o既內心 Anna一心想救Elsa所以幫助王子 但心中仍然充滿懦弱同不安





27. 王子知道年輕國王無能加上邪惡宰相高壓統治令國民受苦 雄心壯志想要拯救國家

28. 男主一心只想保護Anna 主張要Anna匿藏唔好參與戰鬥 幫助同時又敵視王子

29. 革命黨一直進行各種反政府活動 而且經常劫富濟貧 攏絡人心 

30. 到左第二日 Anna 男主 同王子仲有幾個革命黨員一齊出動劫走一批皇家o既財物然後派晒比D窮人

31. 打劫過程中要一邊唱歌一邊成龍式打鬥 Anna因缺乏作戰經驗而身陷險境 要靠男主同王子carry先嬴到

32. 到左夜晚要黎番場男主同Anna o既感情戲 男主認為Anna女仔人家唔應該參與戰鬥 要求Anna停止練劍並且搵地方匿埋 將救Elsa o既任務交比佢

33. Anna於是同男主鬧交 覺得自己比人睇小 並且認為男主只係葡萄王子有得同Anna格劍 最後搞到雙方不和 (男女主耍下花槍梗要有架啦)

34. 到呢度係時候要講番Elsa果邊 邪惡宰相帶走Elsa時用魔封手鐲封印左佢o既魔法力量然後將佢軟禁





35. 番到首都城堡之後 邪惡宰相色心起想要搞Elsa 但遭到Elsa極力反抗而擺手 

36. 年輕國王見到邪惡宰相咁做仍然無動於衷 此時Elsa先知原來同年輕國王結婚只係騙局 邪惡宰相真正目的係將Elsa o既魔法力量(同肉體)據為己有

37. 邪惡宰相此時on99咁將佢o既計劃講晒出黎 原來佢打算係(假)婚禮上進行魔法儀式 將Elsa o既力量轉移去自己身上 然後用呢份力量征服世界(呢度確立番反派形象)

38. Elsa知道自己中左計而痛哭兼意志消沉

39. 鏡頭回到Anna一方 主角們同革命黨培養完感情之後 突然一班警衛殺入酒館 原來主角們上次行動時比人跟蹤

40. 革命黨們為左比主角們逃走而一個個犧牲 Anna好勇猛地同警衛隊隊長格劍 但就打輸左仲受埋傷

41. 男主為左救Anna比警衛捉住 警衛隊長錯誤將男主認作王子而無再追其他人 最後得Anna王子同雪人騎住鹿仔成功逃脫





42. 邪惡宰相視王子為最大威脅 認為唔可以比國民同貴族們知道王子仲未死 發現警衛捉錯人後大發雷霆 

43. 然後又例牌情節 邪惡宰相指使年輕國王宣佈要係(假)婚禮上公開處決被捉的革命黨同男主 想藉此逼王子現身

44. 逃離首都之後 Anna覺得好絕望 好後悔同男主鬧交 覺得男主o既主張其實先係正確 又責怪自己害死男主

45. 然後王子帶Anna黎到一個市郊o既小村落 搵番係果度隱居o既王子老母 亦即前朝王后

46. 王子老母向王子了解事情始末後走埋去Anna度同佢傾計 於是進入王子老母回憶篇

47. 原來王子老母就係之前王子提及過o既王國第一劍士 話說王子老母出身寒微 年輕時想學劍術 但當時社會風氣認為劍術乃男士專利 女性無能力亦唔應該練劍

48. 王子老母於是力抗社會潮流 走在時代尖端 經一番苦練後成為劍術大師 仲嬴埋全國大賽 開創女性習武練劍o既新風氣

49. 王子老母係全國大賽決賽打敗o既對手就係時任國王 佢亦因此被國王愛上而成為王后(呢度班Feminists實睇到出晒水)

50. Anna當然亦聽到出晒水 於是繼續聽王子老母講埋落去

51. 王子老母得到短暫o既幸福生活 生左王子同佢細佬(即做緊傀儡果個年輕國王)

52. 然後唔使問阿貴又係邪惡宰相搞事 佢用奸計暗殺國王然後嫁禍比王后(王子老母) 仲想殺埋王后同大王子再控制小王子黎個挾天子以令諸侯

53. 王子老母於是抱住仲係小朋友o既大王子 隻身一人憑住超凡劍術殺出重圍 逃離首都後係鄉村隱居並帶大左王子

54. Anna聽完王子老母o既往事覺得好鼓舞 再加上王子老母講多幾句「要相信自己」「女人要自強」之類的說話 Anna終於回復番勇氣 決心要拯救Elsa同男主

55. 此時離(假)婚禮仲有一個星期時間 Anna同王子擬定作戰方案時了解到如果要打嬴邪惡宰相 一定要借助Elsa o既魔法力量

56. 王子記得邪惡宰相帶Elsa走時同佢戴左隻魔封手鐲 為左解放Elsa o既力量一定要解開手鐲 要解開手鐲就需要有人潛入城堡搵出解鎖方法

57. 呢個任務自然只有隻雪人可以做啦 "someone is worth melting for"講得咁過癮 一於將Olaf煲成湯再送入城堡

58. 於是王子老母就託佢老伴(寡婦再婚好正常姐)假扮成黎自Elsa國家o既廚師 去到城堡話要將家鄉風味o既湯獻比Elsa

59. 老伴原本比警衛欄住入唔到城堡 好在咁o岩年輕國王路過見到 又on99咁相信佢講o既野 於是將煲湯(雪人)攞左比Elsa

60. 話說Elsa係呢段時間用盡方法不斷嘗試逃走 但都失敗仲差D整傷自己 年輕國王心存善念又心有惻隱 所以帶煲湯黎諗住安撫下Elsa

61. Elsa咁醒目一見煲湯就知咩事 等年輕國王行開左就出盡力o必左小小法力出黎幫Olaf回復原狀

62. Olaf同Elsa講番事情經過 Elsa計劃係(假)婚禮當晚趁城堡內無人 派Olaf去偷魔封手鐲o既鎖匙 但在此之前要先搞清楚邪惡宰相私人房間o既位置

63. 與此同時 Anna加緊向王子老母學藝升呢 王子老母於是傳授女劍士對抗男性對手o既獨門技巧比Anna 而王子就四圍搵願意助陣o既鄉里

64. 鏡頭轉去被捉的男主度 男主被困地牢比警衛隊長嚴刑逼供 

65. 邪惡宰相黎到地牢後扮晒好人 叫停警衛隊長 幫男主療傷仲比好野佢食 然後訛稱王子先係騙子同壞人 仲話如果男主提供到有用情報就放過佢同佢條女

66. 男主內心有所動搖 記番起王子講過「第一劍士」住係市郊某村落 仲差D供左出黎 但最後都係扮唔知 寧願繼續被虐待都無背叛到王子

67. 呢度要突顯男主有高尚情操 雖然敵視王子但仍然維持自我犧牲小我顧全大局為人成熟唔會意氣用事

68. 又講番Elsa果邊 為左套出邪惡宰相房間位置o既情報 Elsa借機叫左年輕國王入房同佢傾計

69. Elsa訛稱想了解城堡o既生活空間 問年輕國王各項設施o既位置 最後成功套出關鍵情報

70. 年輕國王雖然on99但其實都心地善良 Elsa有見及此想勸佢改邪歸正 可惜年輕國王懦弱無能 未有勇氣反抗邪惡宰相 但內心已有所動搖

71. 好快就黎到(假)婚禮亦即決戰當晚 邪惡宰相係城堡廣場大排筵席招待貴族商人政要等人士 並且架起斷頭台準備以處死革命黨員作為娛樂節目

72. 與此同時Anna 王子 王子老母同幾個同黨係城堡外準備進攻 此時王子老母將自己o既配劍交左比Anna 並且交代打倒邪惡宰相唯一方法係刺穿其心臟

73. 邪惡宰相打算以公開處刑引出王子及其餘黨 再放埋伏於城堡外o既軍隊入黎殺晒佢地 然後發動魔法陣吸走Elsa o既力量 最後得到壓倒性o既魔法力量再篡位稱王

74. 臨行刑前一刻 一個蒙面劍客騎住鹿仔衝入廣場 以高超o既劍技將擋路o既警衛擊倒 成功到達斷頭台解救男主同其他革命黨員

75. 邪惡宰相見佢咁好打 以為佢就係王子 於是命令所有警衛包圍斷頭台

76. 蒙面劍客去到男主面前拉開面罩 原來佢真正身份係Anna 係呢度Anna同男主擁抱下真情流露下終於和好如初 仲話經過今次先知原來自己咁緊張對方諸如此類

77. 於是Anna男主仲有革命黨員係斷頭台上同四面而來o既警衛陷入混戰

78. 呢個時候真正o既王子原來已經趁機爬左上城堡o既演講台上面 然後大聲對在場所有貴族同政要講自己係大王子 仲話要打倒邪惡宰相取回王位 使得眾人譁然

79. 此時邪惡宰相為左控制情況 用魔法放訊號彈想叫軍隊入城 好快就有大批人馬進入廣場

80. 殊不知進入廣場o既唔係軍隊而係大批平民百姓 原來王子老母聯同鄉親父老帶領群眾發起革命 廣場入口於是塞滿平民令軍隊無法進場

81. 與此同時Anna男主同其他人牽制住警衛 令王子有機會同邪惡宰相單挑

82. 邪惡宰相用火焰魔法攻擊 王子舉盾擋住 可惜邪惡宰相法力太強連個盾都熔埋 王子於是戰敗

83. 邪惡宰相見情況失控 於是打算直接發動魔法儀式吸走Elsa o既魔法力量

84. 此時Elsa被鎖左係一張位於魔法陣中央o既凳上面 邪惡宰相發動魔法陣令Elsa痛不欲生

85. 眼見邪惡宰相奸計就快得逞 最後關頭Olaf終於帶住條鎖匙黎到現場 此時邪惡宰相為左維持魔法陣無法移動

86. Olaf馬上衝去Elsa度想幫佢解鎖 即將到達之際卻被邪惡宰相o既火焰彈打中而熔 Q左 條鎖匙於是跌左係地

87. 王子本來想衝去執鎖匙 可惜受傷太重跑唔郁 最後條鎖匙比年輕國王執起左

88. 邪惡宰相以為勝券在握 於是叫年輕國王快D交條鎖匙比佢

89. 點知年輕國王竟然自己幫Elsa解鎖 原來佢見到大王子現身後終於認清邪惡宰相o既惡行 並且鼓起左反抗o既勇氣

90. 年輕國王o既角色係要教各位小朋友唔好盲目聽從權威 要獨立思考並且要有勇氣對抗邪惡

91. Elsa重獲自由後即刻發力解除左邪惡宰相o既魔法並且進入戰鬥狀態

92. 此時Anna本來想上前幫拖 卻被警衛隊隊長攔路 兩人於是再次一決高下

93. Elsa作為Disney公主界最強戰力 緊要比機會佢show下cally打番場勁架啦 最後一幕正邪對決由「冰雪女王」Elsa vs 「火焰之惡魔」邪惡宰相

94. Elsa一黎就使出威力120 o既暴風雪 成個廣場馬上變到冰天雪地 邪惡宰相即刻凍到變雪條

95. 不過邪惡宰相都唔係省油燈 馬上用烈焰驅進解開冰凍狀態同時展開反擊

96. Elsa於是召喚兩隻冰巨人出黎做阻擋 可惜比邪惡宰相用大字火一野熔 Q晒

97. Elsa同邪惡宰相o既戰鬥如此激烈令成個廣場一時凍到仆街一時又熱到陷家鏟

98. 二人打到難分難解 邪惡宰相於是決定解放力量並且顯露真正姿態 原來邪惡宰相並唔係人類而係一隻全身比火焰包圍o既巨大惡魔

99. 邪惡宰相上二檔之後力量大增 Elsa即刻被壓制而陷於劣勢

100. 此時Anna終於打敗左警衛隊隊長 即刻衝上前助Elsa一臂之力

101. Anna高舉寶劍衝向邪惡宰相 Elsa見狀馬上施法幫Anna上Buff增加火焰抗性 Anna於是衝進左邪惡宰相o既火焰之中

102. 係Buff加持下Anna成功衝到黎邪惡宰相面前 用寶劍一野刺左落佢個心臟到 邪惡宰相於是慘叫一聲

103. 可惜事情無咁簡單 邪惡宰相心臟被破壞後力量竟然無消失

Evil prime minister:Well done for destroying ONE OF MY HEART!(Laugh evilly)

(設計對白)

104. 於是Anna o既身影消失於火焰之中 

105. Elsa見狀即刻尖叫兼情緒崩潰 

106. 基於少年漫畫戰鬥o既基本原理 Elsa情緒崩潰後爆seed力量大增 即刻對邪惡宰相發動排山倒海o既攻勢

Elsa:GIVE ME BACK MY SISTER!!!!

(設計對白)

107. Elsa o既攻擊力大到連在場o既所有人都差D被牽連 而邪惡宰相亦漸漸被壓倒

108. 最後Elsa集中力量召喚出超巨大冰矛 再一野貫穿左邪惡宰相o既身體同時破壞埋佢另一個心臟

109. 邪惡宰相慘叫幾聲後身體結成冰然後粉碎

Evil prime minister:WHAT IS THIS POWER??? OHHHHH~~~ (Die)

(設計對白)

110. 戰鬥終於落幕 Elsa傷心欲絕咁跪左係地

111. 不過Disney又點會夠膽死玩 Bad Ending 戰場o既煙霧散去之後 地上出現一股藍光

112. Elsa即刻衝上前查看 原來Anna手持o既寶劍(王子老母o既配劍)有魔法力量識放防護盾保護主人 Anna因而大難不死

113. Elsa邊喊邊擁抱Anna 廣場決戰完美落幕

114. 事情結束後 王子 王子老母同年輕國王一家團聚 王子上任成為新國王 戰爭隨之結束 國家從此歌舞昇平

115. 王子於是向Anna求婚 可惜被拒 Anna最後都係選擇左男主

116. 最後Elsa Anna 男主 雪人同鹿仔係國民歡送下回國 大團圓結局 可喜可賀 可喜可賀