【自殺之後，我遇見死神小姐】救贖七個自殺者的故事: Case 4 守候了五年的忠犬—(22)
與少年同佢老豆訣別後，我繼續我嘅尋人之旅。
「哥哥，你諗住點搵嗰個人？」小妹妹一路圍住我兜圈，一路問。
「有嗰個人嘅姓，讀嘅小學同畢業年份，上網search下可能搵到。」
我踎低，撫摸狗狗嘅頭講：「狗狗，我依家就幫你搵你主人返嚟！」
狗狗伸出舌頭，眼仔碌碌望住我，然後回應：「汪汪！」
「好！明白！我哋let’s go！」我起返身。
「哥哥你明狗狗講咩嘢咩？」小妹妹好奇地問。
「哈哈！當然明啦！」
「點解嘅？」
「因為我哋心靈相通囉！」我自信滿滿笑咗笑，狗狗都吠咗兩聲和應我。
「咁佢講咗啲咩呀？」
「嗯……」我手放喺小妹妹頭上，「呢個係秘密。」
「我想知呀！」小妹妹扁起嘴巴。
「到我搵到狗狗嘅主人先同妳講喇！」
「好，一言為定！」小妹妹露出笑容，「我哋let’s go！」
「白痴妹！」我忍唔住笑咗出嚟。
我哋去到附近商場，借用公用電腦去搵線索。喺我打緊字嘅途中，小妹妹竟然走去玩穿透遊戲，程度不下於Cathy，後來狗狗都加入戰局，兩個靈魂愈玩愈起勁。有一瞬間我見到小妹妹喺個學生妹後面烏低身，扮人馬嘅後半部份……
佢兩個……
我Google咗幾次，雖然搵到間小學嘅校網，但喺入面搵唔到畢業生嘅名單。我試過用其他搜尋器搵，一樣搵唔到結果。
既然上網搜尋唔到，唯有用最後手段。
「小妹妹！狗狗！」我將嗰兩個玩到癲咗嘅靈魂叫返過嚟，雖然喺旁人眼中我只係同空氣講緊野，但點都好啦！
「哥哥，係咪搵到喇？」
我搖頭答：「搵唔到。」
狗狗好似聽得明我講嘅嘢，失落地低下頭。
「咁點算呀？」小妹妹擔憂地望住狗狗，「會唔會搵唔到個人㗎……？」
「咁又唔會，我重有方法。」
「係咩？」小妹妹歪頭問。
「我哋依家要闖入間學校。」
「好似好刺激咁！」小妹妹突然雙眼發亮一樣。
「汪汪！」連原本死氣沉沉嘅狗狗都即刻抬起頭吠幾聲。
「認真少少，我闖入學校係要搵啲嘢，只要搵到嘅話就知嗰個人嘅外貌。」佢哋醉翁之意不在酒，純粹對闖入學校感到興奮。
照中年大叔所講，間小學應該喺呢條邨入邊。我上網查一查間小學地址，照住地址一邊問路人，一邊行。
我哋行到目的地，小學，呢間小學睇落無小妹妹嗰間中學大。
我帶住小妹妹同狗狗圍住學校兜一轉，從圍欄可以見到校內戶外地方無咩人，不過兩道大閘都閂咗，而且有校工喺閘外看守。上次帶小妹妹去中學時可能係午飯時間，所以先無人看守，今次唔可以再大搖大擺入去。
我走到其中一道大閘面前，同校工講：「唔該，我想搵一搵校務處職員，可唔可以入去㗎？」
「吓？搵校務處職員？你係邊個？無學校准許唔可以隨便入去喎！」呢個肥婆校工態度特別唔友善。
身經百戰嘅我作大話已經當食飯，「我係學生嘅家長，想搵一搵職員問一問學生啲嘢。」
「你係邊個學生嘅家長呀？同埋家長要放學之後先可以入學校㗎喎！依家唔入得學校呀！」
呢個肥婆校工態度令人十分不爽，可惜我又唔夠佢駁。
唯有去第二道閘睇入唔入到。
我走嘅時侯，小妹妹突然叫停我。
「哥哥！等等！」
我望向小妹妹，發現佢已經身處閘內，狗狗都入埋去，喺小妹妹隔籬。
「我哋入咗去喇！」
「你哋兩個入到去，但我入唔到去，有咩意思呢？」呢兩個白痴。
「咁我哋可以幫手去搵㗎嘛！」小妹妹挺起胸膛講，狗狗又喺佢隔籬和應。
「你兩個可以點搵？」我笑問，不過假笑。
「啊……」小妹妹𢯎住頭，然後傻笑，「又好似係啵！」
我無出聲，直接轉身走，因為我見到個肥婆校工已經用緊啲極為不匾同鄙視嘅眼光望緊我嘅怪異行為。
我哋去到第二道大閘問，呢個校工態度比較友善，但佢都係唔俾我哋入。
我企喺學校出面思考著。
「咁點算呀？定係我同狗狗入去搵？」小妹妹圍住我轉。
「先唔論你哋識唔識搵，你哋嘢都掂唔到，點搵呢？」我抱起雙手，「要搵就一定要我入到去先得，但問題係我要點入去……」
我望住學校嘅圍欄，忽然靈機一觸！
「啊！我諗到喇！」
【作戰方案一：妹妹直昇機】
腦海浮現小妹妹成日喺我身邊周圍轉嘅畫面。
「妳可以飛，而我可以接觸到妳。」
「即係點呀？」小妹妹將手指放喺下巴。
「妳飛起嗰陣捉住我，咁我咪會一齊飛起囉！妳只要升到圍欄個高度，將我放入去，就大功告成！」
「好似幾得意咁！」
「快啲試下先！」
小妹妹飛喺我頭頂，烏低身捉住我雙手，然後三、二、一，飛——
「飛唔起呀！哥哥！」小妹妹瞇起雙眼，谷到塊面紅哂，好似痾唔出屎一樣。
「妳用咗盡力喇？」
「係呀……」小妹妹用盡九牛二虎之力都扯唔起我。
「一係妳試下飛上空中，然後我跳起嚟捉住妳！」
「嗯！」
小妹妹飛到我原地企掂唔到嘅高度，然後我一嘢跳起捉住佢。
「啊啊啊！」小妹妹被我扯返落嚟。
既然佢拉唔起企喺原地嘅我，被我喺空中扯返落嚟係當然……
就好似佢嘅重量比我輕好多，所以提唔起我。不過講到鬼魂嘅重量，鬼魂既唔係物質存在，當然唔會有重量，能觸碰到鬼魂只係我嘅特殊能力，並唔代表鬼魂係真實物質。
總之作為無重量嘅佢，係無可能拉得郁有重量嘅我。
作戰方案一，失敗。
【作戰方案二：視妹妹如鏈球】
「點樣好呢？」小妹妹喺我頭頂埋頭思考。
「我諗到個方法。」既然小妹妹本身嘅力量無法拉起我，由外部施加慣性作用力，再喺一瞬間小妹妹出力飛起，話唔定可以騰空到幾秒鐘。
幾秒鐘，足夠我跳入校園。
我雙手捉住小妹妹嘅右手，講：「準備好啦！」
「等等！好似有啲恐怖！畀定心理準備我先！」小妹妹驚惶地講。
「無事嘅，就算失敗，妳飛咗去外太空，都唔會損妳一分一毫！」
「哥哥你露出咗個好邪惡嘅笑容呀！」
「三、二、一——」
「No！」
我將小妹妹好似鏈球咁轉起嚟，小妹妹不斷尖叫，大嗌「唔好」「停」。
我嘅計劃係將小妹妹當鏈球咁揈（音：fing），將道力施加喺佢身上，喺揈出去嗰下，小妹妹連埋道力，再用自己嘅力飛起，再我拉起嚟。
「準備飛啦！三、二、一——」
小妹妹並無飛起嚟，只有我失足向前踏咗幾步，而小妹妹依然喺我手中。
「小妹妹，我唔係叫妳數到一就飛嘅咩？」
「我有用力飛呀！但我拉唔起你飛！」
「無理由㗎！照計我揈嗰陣將道力施咗畀妳，然後妳再用力應該拉得起我㗎……」
我再捉住小妹妹嘅雙手，「我試下就咁揈妳出去。」
「唔好！等等！」小妹妹話口未完，已經被我揈緊。
「嚟來喎！」
「哇哇哇哇哇！」
小妹妹做咗太空人，一飛衝天。
作戰方案二，失敗。
【作戰方案二（假）：狗狗也想做鏈球】
「哥哥正白痴！哥哥正白痴！」小妹妹經歷過天空唔同嘅景色，最終降落返地面。
「啱啱諗落覺得幾奇怪，其實呢個方法由一開始應該唔可行，由作戰計劃一推斷，靈魂並唔係真實物質，理應唔存在重量。用盡力扔一條羽毛都唔會遠得去邊，試問扔一個靈魂出去點會飛到十萬九千里遠？我物理知識實在太貧乏，解答唔到問題。」
「我唔理！總之哥哥正白痴！」
「唔好嬲喇！我都唔想㗎！」我摸摸小妹妹嘅頭。
呢個作戰方案都失敗，重有咩方法可以入到去呢？
正當我思考時，狗狗忽然喺度吠。
「做咩呀？」
「汪汪！」
「啊……？你諗到方法？」
「汪汪汪！」狗狗吠完，圍住我飛咗幾個圈。
「啊……你唔係想講，我都想玩下嘛？」
「汪汪！」狗狗好雀躍咁吠，我已經知道答案了。
我雙手抱起狗狗嘅身，然後紮好馬步。
「預備好未？」
「汪！」
「三、二、一——」
「汪！」
繼小妹妹之後，有一隻太空狗成功衝出地球。
【作戰方案三：人肉層層疊】
「如果係唔使拉嘅動作，唔知又做唔做到呢？」小妹妹意外地提出建議。
「例如？」
「層層疊！」小妹妹興奮地講，我最初都開心咗一秒，但見小妹妹過度興奮嘅樣，我就知佢根本只係想玩！
「點疊法呀？」我無將想法道出，繼續俾小妹妹發表偉論。
「你騎住我，我推你上去。」
「你夠力咩？」
「試下可能得呢！」
我聽從小妹妹嘅建議。小妹妹踎低身，我扶住欄杆，慢慢騎上去佢膊頭。
「咿呀！」突然聽到小妹妹一聲慘叫，下一秒我就屎忽跌落地上。
「哇……好痛……」我一手撳住屎忽，另一隻手撐住地下企起身。
起身之後發現，呢度剩返我同狗狗喺度。
「小妹妹！妳去咗邊？」我大聲叫道。
「嗚呀！好可怕！」小妹妹從地底飆返出嚟。
「妳啱啱去咗邊度呀？」
小妹妹無出聲，過幾秒後，佢忽然大鬧一句：
「白痴哥哥！」
小妹妹扁起嘴巴，擰埋一邊。呢個妹妹，有點麻煩。
最後方案——
其實直接爬入去就好，圍欄又唔係高，點解我要嘥咁多時間諗埋啲無謂方法……
我自己好似沉醉於同嗰兩個貪玩嘅細佬做埋啲白痴嘅事情。
爬入學校後，我進入校舍。門口有塊牌寫住校園設施分佈，我依照塊版前往圖書館嘅位置。
行到圖書館門口，我輕輕打開門，但見到有個人喺入面，應該係負責管理圖書館嘅老師或者職員。如果直接行入去，可能會被人發現。
正當我諗住閂返對門，另想辦法時，嗰個人發現咗我！
我哋兩個視線對望，佢又無出聲，好尷尬。
但既然佢又無咩反應，咁我決定光明正大行入去。
行到入去，圖書館管理員果真無理我，低返頭做自己嘢。我慢慢行去圖書櫃嗰度，搵我要搵嘅書。
圖書櫃睇落幾殘舊，啲木已經甩皮甩骨，啲書又黃又巢皮，啲塵多到鋪哂喺上面，都唔知幾耐無打掃過。但都有幾多種類嘅書喺上面，有學術性，有童話，有圖畫書，不過我想搵嘅書唔喺以上類別。
我繼續掃視，行到最尾嗰行嘅圖書櫃，終於搵到我想搵嘅類別。
歷屆畢業生紀念冊。
我計返年份，將我想要嗰年嘅畢業生紀念冊拎出嚟，翻閱每班嘅全班照。畢業生紀念冊有嗰一年畢業嘅班別嘅全班照，以及所有畢業同學嘅名。中年大叔講過，嗰個人嘅姓好特別，我諗即使喺咁多班之中，應得嗰個人係有嗰個姓。
我翻到某頁，見到嗰個姓氏，為確保無錯，我睇埋後面嗰幾頁嘅畢業生名單。果然，只得嗰一頁有嗰個姓。
確定係呢位學生無誤。
然後我對應返班相，搵返個學生出嚟。
係佢啦……但點解有種面善嘅感覺，好似曾經喺唔知邊度見個呢個人……但我又諗唔起究竟喺邊度見過……
我望多兩眼個學生嘅樣，嘗試記實，但係就咁望兩眼好難記實，個學生身上又無咩特徵。
「你係度做咩？」我後面突然傳嚟一道聲，係啱啱個圖書館管理員，「你係咩人？呢度淨係俾本校嘅老師同職員使用。」
睇嚟我嘅行為太可疑，終究引起佢懷疑。
但我重未記得個學生嘅樣，如果而家就咁走，豈不是功虧一簣？
「喂！你喺度做咩？你如果唔係本校老師或者職員嘅話，即係擅闖校園。依家我要求你放低手上嘅嘢，否則嘅話……」
我無等佢講完嘢，將手上個本紀念冊打開扔過去，佢被我扔中塊面，後退咗幾步。
「喂！你做乜嘢！」
我趁佢分心，兜過佢跑咗出去。
「有人擅闖校園呀！」臨到門口，聽到佢忽然大叫。
我無理會佢，直接衝出門外，點知一轉頭，就見到有個校工企喺走廊到。
「喂！停低！」呢個校工雖然咁講，但我見過年邁嘅面容，佢應該無咩殺傷力，我無視佢，喺佢身邊跑過。
跑到樓下，我跑去啱啱爬入嚟嗰個位，守喺大閘嘅肥婆校工注意到，即刻起身行過嚟。我趁佢未行到過嚟，即刻爬欄杆出返去。
「搵到啦？」小妹妹問。
「嗯……都算搵到嘅。」
「搵到啲咩呀？係咪知道嗰個人喺邊喇？」
「嗯……我哋走咗再講。」我見到個肥婆依然向我哋接近，而且露出極為不屑嘅表情。
「好！」
「汪汪！」狗狗都一齊和應。
直到我行開，肥婆先轉返身，返去佢原本個位。
雖然到最後無記實個學生嘅樣，亦無拎到本紀念冊出嚟，但至少知道咗佢嘅全名。當然，既然佢嘅姓咁特別，即使唔使知佢嘅外貌同全名，直接去中學到搵，都有機會搵到。
但係咁做係更加確實嘅方法，畢竟我唔知佢係幾年級，全校成千人嘅話，就算稍微特別嘅姓，都好有機會相撞，所以最確實嘅方法係知道佢嘅外貌同全名。
結果唔記得佢嘅樣係敗筆，不過反正過咗咁多年，話唔定已經變到唔同樣。知道佢全名已經夠，特別嘅姓加不普通嘅名，應該幾難會有撞名情況出現。
而家線索己經掌握，最後一步就係去中學，搵嗰個人出嚟！