【自殺之後，我遇見死神小姐】救贖七個自殺者的故事: Case 6 得到惡報的扭曲之人—(32)

我帶住小妹妹回到達叔嘅家，將小妹妹放喺梳化上。

「妳依家好啲啦嘛？」我問小妹妹。

「嗯，依家無咩事喇。」小妹妹笑道。

「妳重笑，妳啱啱真係嚇死我。」我揜住額頭表示無言。

啱啱差啲被小妹妹嚇死，佢突然揜住頭大叫，魂魄變得飄忽不定，之後更加暈低咗，點叫都無反應。





我大叫死神小姐，但佢無出現，當下之急我只好抱住小妹妹先回到達叔嘅家，差唔多到嘅時候佢先醒來。

「妳話，妳啱啱記返起自己係邊個？」我疑問。

「唔……我並無完全記起自己係邊個，但突然間有一段又一段嘅片段浮現喺我腦海中。」

「咩片段？」我追問。

「一啲生活片段，有喺學校，有喺屋企……有一部份同學嘅面容，我記起我係身處喺一個單親家庭……但更詳細嘅細節我就記唔起……」





「呢啲應該係妳嘅生前記憶……但係點解妳會突然記得返？」

「我都唔知……」小妹妹無奈笑道，「有時都會喺腦海中浮現一啲片段，但今次嘅片段特別多，個腦好似一時承受唔住咁。」

「無論如何都係件好事，至少離妳嘅真相又邁前一大步。」

「哥哥呢？哥哥有無記返起啲咩？」小妹妹睜大眼睛問。

「琴晚睏覺時又夢到啲片段，係我同另一個女人，但我記唔起詳情係點……」





「係呀……」小妹妹有點失落地道，「不過唔緊要，總有一日你都一定會記起嘅！」

「我嘅話無咩所謂，死神小姐講過救贖完七個人之後就會將我嘅記憶還返畀我。」

「你會唔會好驚記返起自己係一個點嘅人？」小妹妹突然問。

「啊？做咩咁問？」我發覺小妹妹已經同我當初遇到嘅佢變咗好多，當初嘅佢就好似小貓咁十分需要人依靠，如今嘅佢變得成熟咗，識諗咗好多。

「無呀，純粹好奇下！」但小妹臉上嘅笑容依然天真燦爛。

「我會，我會自殺嘅話即係我經歷咗某啲事情，而令我不得不自殺。我會害怕記返起嗰啲事情，我怕會將依家嘅我打落谷底。」我講出我嘅想法。

「我都驚記返起所有事情……我同哥哥相遇嘅日子短暫，如果記返起所有事情，或者我就要同哥哥你道別。」小妹妹苦笑地講。

「但嗰一日始終會到。」





「嗯嗯。」

小妹妹掛起不安嘅樣子，係因為啱啱腦海突然浮現大量片段所影響到嗎？

「妹妹。」

「嗯？」小妹妹機靈望住我。

我雙手各舉起一隻手指，「望實喎！」

我快速地將兩隻手指一點，右手嘅手指收返埋，而左手則舉起咗兩隻手指。

「係咪好勁呢？」





小妹妹面無表情望住我。

「唔勁咩？魔術喎！妳睇！」

「白痴哥哥！淨係識變埋哂啲低能魔術！你唔好當我三歲細佬妹先得㗎！」小妹妹鼓起臉蛋。

「咁妳有時係幾似三歲細佬妹，特別係掛住玩嗰陣同喊到哭哭啼啼嗰陣。」

「邊有呀！白痴哥哥！」小妹妹扁起嘴，「我不知幾了得，變魔術都變得勁過你呀！」

「有幾勁呀？睇過！」

「嗱！睇住啦！」

小妹妹穿上天花板，幾秒後從我面前嘅牆中露出半個身軀出嚟。





「呢個開外掛嘅！同嗰次喺公園玩捉伊人嗰次一樣，點夠妳玩呀！」

「唔夠人玩就玩人開外掛都有，真係無你乎！」小妹妹重要一臉囂張咁望住我講。

結果，佢被我一隻手從牆中扯返出嚟，然後瘋狂擳妹妹大行動！

『啊啦啦……睇嚟你哋玩得好開心喎！』死神小姐塊臉突然喺我面前出現。

「哇！」我被佢突如其來嚇咗跳，佢倒吊咁飄浮喺我面前，臉則靠喺離我臉部不足幾厘米嘅前方，披頭散髮咁望住我，一陣淡源香氣更傳入我嘅鼻中。

「好心妳唔好用啲咁恐怖嘅方式登場喇！」

死神小姐倒返轉個人，優雅地降落去上，『我見你哋玩得咁開心，所以加埋一份入嚟玩囉！』





「妳係特登嚇我咋掛！」

死神小姐無反駁，瞇起眼睛望住我詭異地笑。

「妳笑咩？」我好奇問。

『喔！無。』死神小姐又收返起笑，『事不疑遲，我將第六個自殺者嘅地點話畀你聽。』

「等一等！」我截停咗死神小姐。

『做咩？』死神小姐皺起眉頭，一臉不爽望住我。

「其實，」我指住小妹妹，「妳知道佢嘅事，同埋點解我會見到佢。」

死神小姐意味深長地一笑，『嗯，我的確知道，但咁又點？』

「點解妳要咁做？小妹妹同我之間到底有啲咩關係？」

『當你達成目的之後，我就會將記憶還返畀你，而你就會知道一切。』

「目的？咩目的？我嘅任務唔係就係救贖七個自殺者咩？」

『睇嚟你唔記得咗，我同你講過……喺救贖七個人嘅同時，好好反思一下人生，直到罪孽贖清為止。』

反思人生？贖清罪孽？

喺救贖嘅過程中，我遇到唔同嘅人與事，亦感悟到好多人生道理。

我嘅罪孽，唔係就係我自殺嘅罪咩？還是除咗自殺之外，我重犯下其他罪？

『唔好諗咁多啦！我講過你時間無多，再唔快啲嘅話，「頭七」就要到臨。你……都係快啲完成任務吧！』

死神小姐轉身，冷眼地望住小妹妹，小妹妹見狀感到不知所措。

死神小姐閉上眼睛，吐出一口氣，然後留下最後一句話：

『如果你能夠救贖今次嘅自殺者嘅話。』