【自殺之後，我遇見死神小姐】救贖七個自殺者的故事: Case 7 被愛著的那個人—(45)

自從嗰次之後，我再無搵過狗狗。我每日都會接妹妹放學，同佢一齊返屋企，教佢做功課，陪佢一齊玩。

妹妹係個女仔，會鍾意芭比或者Hello Kitty嗰啲玩具，有時同妹妹行玩具舖，佢雙眼會發光咁望住啲玩具，但我無錢，買唔到畀佢。

父親靠住拎綜援過日子，佢只會定期畀啲錢我哋買嘢食，而且好少，根本唔夠我哋兩兄妹食咁多餐。我哋只能三餐當一餐咁食，重要嗰一餐少得可憐，好啲就有碗麵，衰啲就只有麵包，有麥當勞兒童餐已經係恩賜。

或者父親講得好啱，錢先係最重要，正因為無錢我哋先會活得咁淒涼，媽媽都係因為錢而扔低我哋……

可能我哋根本就唔應該出世，誕生喺一個貧窮嘅家庭就好似受罪咁。





但係，就算我可以捱肚餓，我可以無娛樂，我都想妹妹有個健康嘅成長。我寧願自己唔用啲錢，買多啲嘢食畀埋佢食，買多啲玩具畀佢玩，就算捱住肚餓，見到妹妹可以得到佢想要嘅玩具，我就已經滿足。

有時，我見到妹妹望住其他人嘅眼神，我就明佢諗咩。

「哥哥，你要去邊？」

「妳企喺度等我一陣，我好快返。」

我跑去麥當勞，拎出僅餘嘅散銀，同店員講：「我要一杯新地筒。」





我拎住新地筒，行到妹妹背後，將新地筒遞到佢面前，「妹，有雪糕食呀！」

「哇！」妹妹見到即刻雙眼發光，開心到停唔到。

妹妹揸住杯新地筒，輕輕用脷舐咗一下，又縮返埋，跟住再輕輕舐，以呢個進度去食杯雪糕，結果杯雪糕溶哂都未食完。

「做咩食咁慢呀？妳睇下杯雪糕都溶哂，滴哂落手度啦！」我拎出紙巾，幫妹妹抹去手上嘅雪糕漬。

「因為咁難得有雪糕食，我唔想咁快食哂呀……同埋我想留啲畀哥哥呀！」妹妹用白色嘅嘴巴同我講。





我幫妹妹抹埋嘴上嘅雪糕漬，然後講：「傻女嚟嘅，妳食得太慢啲雪糕會溶，一樣無得食㗎。難得買返嚟嘅雪糕，當然要大啖大啖咁食啦！」

我哋嘅生活就係如此貧困，我哋亦只能相依為命。

但我想畀更多嘅物質畀妹妹……我想妹妹有更好嘅生活！

只要有錢，就可以令妹妹幸福！

自從嗰件事，我依家盡量每分每秒陪喺妹妹身邊，唔會畀機會俾父親掂妹妹。隨住我愈嚟愈大，我開始識得反抗，父親虐打我嘅程度亦收斂咗，最多打我幾下，摑我幾巴就算。

不過咁樣唔代表我哋嘅生活好咗，父親會以妹妹為由，威脅我去做兼職賺錢畀佢。即係話，一日唔脫離呢頭家，唔脫離父親嘅魔掌，我哋一日都唔會得到真正嘅幸福。

如果幸福嘅果實生長於天空之上，咁我就建造一條由凡間登上天上嘅樓梯。為咗幸福，我可以不惜一切！

有一日，我哋走咗去對面村民地方到玩，嗰度有好多流浪狗，呢次係妹妹第一次近距離接觸狗，當中有啲狗都幾兇神惡煞，妹妹驚到縮埋喺我身後，行都唔敢行。





好耐無見過小獅，唔知佢而家點呢？大概，佢早就忘記咗我掛。

「唔使驚，啲狗唔會咬妳㗎。」

我拖實妹妹嘅手拉佢前行，佢最初扯住我碎步地行，但佢見啲狗企喺原地望住佢，無其他動作，於是就快快腳行過去。

我哋喺唔熟悉嘅地方尋覓著，翻開密麻麻嘅樹枝同草叢，我哋到達咗片隱蔽嘅空地。

「呢度以後就係我哋嘅秘密基地，只有我哋兩個人，無人可以騷擾我哋！」我張開雙手大叫。

「哇！秘密基地！」妹妹天真地叫。

「雖然呢度有啲細，有啲偏僻，哥哥遲啲有錢，一定會買到層樓返嚟畀妳住！」





「買一層樓要幾多錢㗎？」

「我聽老師講好似要一千萬……我依家都儲咗幾十蚊，等我再大過啲就夠錢買㗎啦！」

「Yeah！我想新屋企有好多好靚嘅裝飾！」

「無問題，包喺哥哥身上！依家無樓，就用住呢個秘密基地頂住先喇！」

「好呀！」

放心啦，妹妹！我一定會帶畀妳好嘅生活！

隨住成長，我喺學校識到一部分朋友，我亦無變得咁扭曲孤立自己一個。不過，即使做咗朋友都好，我都唔會同佢哋交心，只有一啲好表面嘅交流，而且就算我點變得會正常交流，依然存在住一啲奇怪嘅習慣，亦因此令到有部分人會排斥我。

我望住同學之間所謂嘅交流，表面上就叫同學，實際上就背後互相數臭對方，講到尾都係為咗利益先同人做朋友……為咗錢，為咗名氣……愈睇愈無眼睇。





我無必要同呢啲同學交心做朋友，一直以嚟我都係咁諗……





直到我遇上一個少女。