轉性人的荒淫校園: 21.《考試前的補習班。下》
《21.考試前的補習班。下》
上回講到老母限我一個禮拜內填曬本筆記D窿，於是乎我死死地氣去左上堂，諗住抄得幾多就得幾多。我入到課室就搵左個位坐，隔離坐左個女仔，佢輪廓好分明，皮膚好白淨。「唔好意思呀，呢度有冇人座㗎。」個女仔放左佢袋係班房入面唯一一張空凳。（係，我又遲到。）
「冇呀」個女仔望一望我，拎走左個袋「你隨便坐啦！」
「麻煩曬喎。」
於是我就坐低左，今日最低限度都要填半本⋯⋯物理之嘛⋯⋯有幾難喎⋯⋯都話我係愛因斯坦再世囉。我隻手好似飲左red bull 咁多左對翼，好快就填左半本。忽然有題要計數，死啦，十萬九千七除六百八十九？唔通用長除法咩？但冇帶計算機喎，惟有借⋯⋯我望望隔離位個女仔，佢有一部計數機。
「唔好意思，可唔可以惜一惜部計數機俾我呀？」我問個女仔。於是乎，一個老土到唔再老土嘅對答就開始
左啦。
個女仔遞左部計數機俾我「用完俾番我啦。」
「麻煩曬！」
話都冇咁快，我就計完半本筆記。踏正五點半，課室有盞紅色燈閃左兩下，出面個公仔箱入面隻基爾獸亦非常合作，好似趕住投胎咁，立即收皮「好，今日基爾獸天下無敵物理雞精係呢度結束。下下禮拜同樣時間同樣地點⋯⋯」坐出面果個MK助教亦立即熄機。我俾番部計數機坐隔離個女仔「唔該曬，還番部計數機俾你呀。」
個女仔袋番埋部計數機「係喎，其實你要部計數機黎做咩？歪歪𡃁計好曬D答案係出面架喎⋯⋯」
「哦，我想計番之前果D。」
「之前果D佢都有俾答案架喎。」
係呢個時候坐出面果個MK助教行左埋黎「喂！你兩個講完未呀！走啦！出面有人要入黎呀！出去傾到夠啦！」個MK助教D語氣同澳牛D侍應差唔多，不過工作態度就冇澳牛侍應咁勤力。應該話，個MK助教根本冇做過野。
於是我拎左係澳牛唔敢拎出黎嘅氣勢，板起塊面「我未執完野，唔好意思。」
我隔離個女仔亦唔係弱質女流。個面色一變。「我成枱都係野。」忽然間房嘅空氣好似停左唔郁咁「一係你幫我執丫。」
個MK仔好似死狗咁款「唔好意思呀。」
「丫係喎，你啱啱係咪話歪歪有俾之前D答案嘅？」我話
「係呀！」個女仔答。「我都係照抄，咩都唔明㗎。」
「我啱啱好掉轉，我明曬，但冇抄。」我笑左一聲
「係囉，我從來都未見過你黎上堂嘅。」
「唉！我阿媽叫我變番曬抄果D出黎呀！你借我得唔得呀？」
「吓？」個女仔話「但你好日都唔上一次堂架喎⋯⋯你扲左我本野然後冇左影咁點呀？」
「你有冇電話？」我問「我俾我電話冧把你。」
「er.....」個女仔猶疑左一陣，遞左部電話俾我「嗱。」
「係喎，」我一邊㩒住個女仔部電話「講左咁耐，我都未知你個名喎。」
「Vanessa ，啲人多數叫我小遙」
「Andes，你可以叫我關公。」
小遙笑左聲「乜你個名咁好笑嘅？」
「係囉⋯⋯肯定係啱啱出世，我就得罪左老母⋯⋯」
小遙笑左陣，俾番部電話我「嗱，入好啦，你記住下個禮拜還番本筆記俾我。」
「係呀，你有唔識都可以Whatsapp 我架。」我俾番部電話小遙。「疑，你係呢度附近番學架？」
「係呀，我讀彿教聚賢女書院架，你聽過未呀？」小遙怕怕羞羞咁講。
「哦！女佛聚！梗係聽過啦，專出狀元果間嘛⋯⋯哇你學霸黎㗎？」
「邊係丫，我炮灰黎架咋。你讀果間聖欲強都好出名架喎。」小遙又話。
「出名打交呀嘛⋯⋯」果時我未轉校，重讀緊聖郁強書院。聖郁強係香港最頂級嘅男校，最出名嘅校友係陸發久，小遙知道聖郁強並唔出奇。
行下行下，我同小遙就到左地鐵站，「我行呢邊呀，bye bye。」小遙行左入地鐵站走左。
抄下抄下，疑，點解怪怪地嘅。自己計一次先。原來小遙抄錯左。於是我影低左，然後Whatsapp 左小遙，呢個亦都係我同小遙第一個whatsapp。漸漸地，我同小遙嘅Whatsapp 愈來愈多。由物理傾到學校到個人生活。當然，我上「歪歪𡃁」嘅出席率亦都直線上升。小遙係個女漢子，佢唔似D港女咁咩都post snapchat。唔會扮「打耳」，間中會講粗口。
***
「唧⋯⋯」褲袋入面部電話係度響
「邊Q個咁大膽！」我係褲袋拎左部電話出黎「斗膽阻住本公瞓覺⋯⋯」
***********************
1 message from Tobias
Tobias: Kristy 你今個星期六得唔得閒
我 ：得
Tobias: 咁就好啦，我想約你星期六去自修室
我 ：你得閒咩
Tobias: 得閒呀
我 ：但你有不良紀錄喎！（加上我瞓瞓下覺俾人嘈醒左）
Tobias: 對唔住啦，今次一定唔會⋯⋯再放你飛機，你罸我戴超人面具，然後著條紅色底褲係面番學。
我 ： 嗱，冇人迫你㗎⋯⋯screen cap 低先。你試下放我飛機丫！
Tobias: 得啦⋯⋯
***
我冇覆Tobias。因為好眼瞓。
「疑，邊個約你去自修室呀？」小遙肯定係一路𥄫實我whatsapp。
「嗚⋯⋯男同學⋯⋯」然後我趴低左瞓覺。
***
「火燭呀！」有人係我耳邊大哎⋯⋯大鑊⋯⋯火燭⋯⋯但由於主角威能，我冇咁快死住嘅。反正一集嘅時間又到啦。
欲知後事如何，請看下回分解。