聽說過美國聖地牙哥這間鬼屋嗎──
03
 
兔子男這話一出,在場人士面面相覷,一時間驚訝得答不到話。
 
兔子男見狀輕輕一笑,儼如宣告剛剛那恐嚇的話只是開玩笑,大家馬上尷尬地跟著哄笑起來。這就是醜陋的人類,為了讓自己看起來跟大家一樣聰明,爭先恐後跟隨大眾行動。
 
「等陣我會陪你哋一齊喺鬼屋入面冒險,多多指教!大家叫我Bunny Man(兔子男)就得喇。」他誇張地向我們行個鞠躬禮。
 




陽光男書生男2人組聽完馬上一臉刷白,正在我不明所以時,天韻喃喃道:「唔係呀嘛……」
 
「吓?」我問。「做咩嘢?」
 
可惜兔子男又開始說話,只好等有機會再問天韻。
 
「今日我哋要對足8個鐘,都希望大家先互相認識一下。不如由你開始自我介紹丫?」冷不防兔子男指向站在半圓中間的陽光男說。
 
陽光男愕一愕後再次展開友善的笑容:「早晨呀,我叫James,喺英國過嚟。同我同事一齊攞到大假出嚟玩,真係好興奮呀!」
 




Come on James?
 
相反James,他的書生型同事很寡言:「你哋好,叫我Ethan啦。」
 
Ethan旁的印度女說:「我個名係Asha,我哋──」
 
「Tejal,」嚴肅印度佬為免Asha「拋頭露面」似的,把發言權搶來:「我叫Tejal。我同我老婆Asha喺德克薩斯州果度開餐館,已經住咗超過十年喇。今次係專程嚟聖地牙哥玩呢個鬼屋嘅。」
 
垃圾大男人主義。我搖搖頭接:「哈囉我係香港人Zach,職業係警察。」
 




「香港?」印度佬Tejal插口問。「即係中國果度?」
 
「唔──」我話說到一半,卻被人搶答:「唔係呀,香港即係香港,唔係中國呀。」
 
轉頭一看,是運動美女糾正Tejal。她的聲線很磁性。
 
「Um…mm…」天韻來回望望我和Tejal,才開始介紹自己。「我叫天韻。Zach話想慶祝我生日,就帶咗我嚟美國玩。其實我好細膽㗎,希望你哋等陣高抬貴手呀。」
 
說罷她紅著臉衝向兔子男微笑。
 
「你傻㗎。」我輕聲在她耳邊說。「你唔知啲鬼屋見你愈驚佢哋就愈係嚇你咩。」
 
「吓唔係嘛!」天韻驚訝得叫了一聲,害原本正說話的港男頓了頓望過來。
 
港男好像叫阿忠,接著我最期待的畫面出現了!運動美女!




 
「我叫綺淇,」她的態度冷冷。「聽到細佬話要一個人嚟旅行所以唔放心,就跟埋過嚟。」
 
原來阿忠不是她的男朋友!這下可好辦了!
 
「多謝大家咁合作!」兔子男歡愉地拍拍掌。「接落嚟我提醒大家入到去要注意啲咩野,之後可以入去玩喇!
 
「相信鬼屋嘅生物(我發覺他們喜歡用”生物”來形容鬼屋的員工)接大家嚟果陣已經講得好清楚有咩嘢唔可以帶入去,如果大家身上仲有嘢未放低,依家好放喇。因為等陣遊戲開始咗,無論你係跌咗相機定手機定任何嘢,我哋係唔會停落嚟等你搵番㗎。
 
「生物們係會同大家有接觸,但你哋千萬唔好搞佢哋,否則會受到各種各樣嘅懲罰而事先係無任何警告。你哋係8人為一組咁進行遊戲,中途唔可以離開,全程大概8個鐘──」
 
「等陣!」James大聲打斷兔子男。「我有問題!」
 
兔子男聳聳肩用手勢示意發問。James問道:「你哋又話每次得2個人入鬼屋,點解嚟到又話8個人㗎?」
 




「我哋每年轉一次主題,之前嘅主題都係2個人就夠。不過我哋發現如果得2個人個遊戲會太快完,所以諗住由2016年起,每次多啲人一齊玩,一嚟又唔使大家等咁耐先排到隊嚟。」
 
多人就可以玩久一點?是指人多可以壯膽,參加者「戰鬥力」可以持久的意思吧?
 
兔子男望望我們,繼續他的話:「遊戲期間只要跟從我哋嘅指令去做,就可以成功出番嚟喇!依家會派生死狀俾你哋簽名,再提醒一次,入面嘅生物會盡情折磨你哋,絕對唔似其他鬼屋咁友善。呢個生死狀就係說明你哋唔會追究入面發生嘅事,希望你哋睇過晒我哋放上網嘅Promo片有晒心理準備。」
 
說罷他後退一步敲敲木門,胖女人再次登場。慢條斯理地從櫃檯拿出一疊A4塑膠板丟給最接近的阿忠,一臉不高興地轉身回櫃檯坐下。這女人是怎麼回事啊。
 
阿忠默默取下一塊,把其他傳給綺淇,如此類推,我拿到所謂的生死狀。其實只是一張黑白的A4打印紙和原子筆夾在簽名板上,恍如在街上填問卷調查。這樣的生死狀給人感覺既廉價又馬虎。
 
「寫完我哋就入去喇!麻煩先寫完嘅就排喺木門前面先,一個跟一個。」兔子男揚揚手。
 
1-2分鐘後,我們8人乖乖排成一隊。我把握好時機跟在阿忠後,他前面是綺淇;我後面是天韻。
 
「好,我哋第一站係『恐怖屋』,不過大家唔使緊張,間房咩都無,只係俾大家平靜一下心情先。生物們會幫大家戴上眼罩先入去。記得呀,入左呢道木門之後就係遊戲開始既時候,無論你哋有幾驚,我哋係唔會放大家走㗎!」




 
站在最尾端的James興奮地高呼:「Yeah!當然啦!」
 
「呀──好驚呀──」天韻也跟著未出發先興奮叫囂。
 
我想問兔子男:如果不聽從鬼屋生物的指令,是否不能出來──即使超過8個小時?
 
──待續