有一晚一個來電外傳: 第三章 - 活在當下的愛情
係租約上簽完名之後，阿欣就主動將將紙收埋，
原因係怕我整唔見，又或者係臨時毀約喎。
其實係果一刻，我仲係對”租約”呢兩個字比較介懷，
將關係當成租約未免過於可悲了吧！
感情自古以黎合則聚，不合則離。
雖然，我對阿欣既感情並非話只係朋友咁簡單，
坦白黎講係有少少朋友以上，
自知未談得上鍾意既地步，
但亦不至於以租約黎將我地既關係拉近吧。
如果大家能夠一拍即合固然係好，
但若果我同阿欣相處起黎先發現大家根本唔夾，
咁咪會傷害左我地既關係？
然而阿欣一直強調叫我唔好咁介意”租約”呢個字面意思，
因為佢對待我絕對係出於真心，
呢點我亦抱以百分之一百既態度去相信佢，絕對唔懷疑。
我怕既只係我自己，冇信心既只係我自己，
怕我會對阿欣唔好，怕我會辜負左佢，
甚至怕我自己根本未預備好心態去對待一段新既關係。
心入面既疑問一日未清得晒，我仲點能夠可以安然咁去拍拖呢．．
結果，心中既說話，就不其然咁說出口了。
我：欣，嗯．．．
阿欣：點呀，諗咩諗到咁既口面呀？
醫院飯堂ｄ野唔岩食嗎？
講完之後，
阿欣係我個碟上，夾一夾起一塊咕嚕雞球放入口中，
故意裝起一副食神評菜既認真表情，
然後伸一伸俐：嗯嗯，的確好難食，零分零分！
既然難食我同你出去第二度食好嗎？
我：唔係ｄ野唔岩食，而係我依然覺得自己．．
未準備好，未諗到點樣對一段關係，旨我到頭黎傷害左你．．
阿欣聽到我咁講之後，原本以為佢一定會好唔耐煩．．
點知．．原本坐係我對面既阿欣，
起身坐左埋黎我旁邊，雙手捉緊我隻手，
同我講：樂，你諗野諗得太過複雜啦，
每次都要諗到咁周全先去做任何事點得架？
況且感情呢樣野有咁多變數，諗咁多都冇用啦，
你比咁大壓力自己點會開心呢？
阿欣將雙手移去我面頰：望住我。
因為太過面紅既關係，我依然冇望。
阿欣溫柔ｄ再講：望住我雙眼先啦。
我望向佢深邃既眼眸，
透澈既眼珠就好似一面拱形既鏡片一樣。
而我果時既魂魄就好似被吸走左一樣，令我呆呆咁定係住望住。
當我被佢眼神吸引之際，
回神時阿欣既面頰已經慚慚貼近我嘴沿，
輕輕係我嘴唇點上一記香印。
我們接吻了。
那零點幾秒鐘既觸電反應，
令到全身肌肉變得酥麻，
鈍化我每一吋神經觸覺。
接吻完後我望一望旁邊，
原來有個病人望住我地，
令我更加難為情。
阿欣：咁而家你應該冇咁大壓力啦？
唔好諗過去，亦唔好諗將來啦，
活在當下已經足夠。
我對你有信心喎！
阿欣繼續話：拿，唔好愁眉苦臉咁既樣啦，
見你都算係一個病人，
餵你食一啖又點話。
於是便隨手夾起一舊咕嚕雞球．．
真係好撚難食．．．
不過果時既我，成個人都軟化，
好似咩煩惱都已經消失。
彷彿，阿欣既吻，就能溶化我心中所有疑問。
阿欣呢一個女仔，
情緒起伏上我到而家都未猜得透，
時而溫柔備至，
時而思想古怪，
時而稀奇有趣，
時而惡得似母夜叉，
時而小鳥依人．．．．
實在令我非常之驚喜，但有時有好頭痛，束手無策。
果種感覺，就好似玩俄羅斯輪盤咁，
永遠未到果一刻都唔知自己會唔會中彈，
正如我每日都唔知阿欣既心情係點一樣。
但有一點我可以肯定既係，我竟然會愛上呢種感覺，
呢一種令人怦然心動既冒險感覺。
縱然，阿欣既情緒就好似天氣一樣反反覆覆，
但心思上卻非常容易明白，好易估到佢諗咩野。
我：係就係冇咩壓力，
但頭先錫完比個老野咁望住就好大壓力啦。
阿欣：嘻，咁駛唔駛轉去另一張台呀？
我：唔駛唔駛。
果時我依然回味住幾分鐘前接吻既感覺，
彷彿對上一次接吻就好似上世紀前。
對我黎講呢一個吻，
感覺有如久逢甘露，
滋潤著我早已涸乾縫裂既雙唇，
以及我枯竭無生機既心境。
慶幸既係，
果種初戀有既接吻感覺：
緊張，酥麻，軟化，乏力，
通通都可以尋回，
而且依然強烈。
如果連感覺都麻醉或者被磨蝕，
咁真係一ｄ意思都冇啦．．．
初戀既戀愛就係咁，
一個擁抱，一個接吻，
都可以令你自己係發生過後，
再一，再二甚至再三回味。
回味發生時既細節，發生時既感覺，
自己係點樣怕羞，點樣心跳加速，點樣感受住電流流過全身，
對方既嘴唇係點樣溫暖，點樣濕潤，
甚至接吻方式點樣無懈可擊。
所以，我唔敢輕易愛上一個人，
怕感覺已冇當初咁黎得透徹，強烈，令人怦然心動。
當你自己發覺有一刻，
接吻過後感覺已經全失，
唔會再去回憶任何細節，覺得係兵家常事，
那，咁樣既愛情已經少左好多樂趣。
冇錯，愛情閱歷多會令人成長，
但同樣會鈍化人既感覺，
有得有失。
我：係呢，你係咪話有地方想去呀？
阿欣：係呀，我想出一出旺角呀，
陪我好嗎？
我：冇問題，去做咩呢？
阿欣：我想買相機．．
我：嗯？相機？
阿欣點點頭，一邊用手攪拌住杯中既檸茶：用黎影低你同我既回憶嘛。
我：哈，你就係特登買部相機為左影低我？
阿欣支頤展顏：嘻，一半一半啦。
最初既目的係買黎帶去美國，
橫掂去到果邊點都會周圍旅遊一下。
我：哦？咁事不而遲啦。
見而家冇落雨，我地行咯。
說畢，我地欠身離坐，
我微微對阿欣笑住話：拖住我，唔好走失呀麻。
因為，係果一刻，
我實在唔想你離開我任何一秒鐘，
甚至唔想你同我之間有著數公分既距離。
阿欣：你隻手好凍，
幫你搓暖佢啦。
雖然，身體係凍，
但內心早已經更勝肉體，
暖得好似沐浴於日光係一樣。
我輕輕心裡暗唸：
阿欣，多謝你係呢個時候安慰我，
真係好多謝你。
出到醫院正門，
消毒藥水氣味亦隨之散去。
我自然反應咁望向天空，
原本陰霾黯淡既天色初露一抹陽光，
彷彿為我剛才澆水過後既心境，
更添一份生機。
我：嗯，終於感受到盛夏既氣息。
去到旺角之後，
一邊物色去邊一家電器鋪買相機既途中，
我不時問問阿欣：
喂，移民真係好麻煩啊可？
有好多野又要特登買，
又要執屋睇下帶咩過去。
消費一定唔少吧？
阿欣：咁當然啦，
都係靠我媽咪一直以黎儲開既積蓄。
好彩之前我地屋企有一部分既錢都係
媽咪keep住，唔係既話．．實比我老豆拎晒去賭．．
我：你．．
憎你老豆嗎？
阿欣係果時冇出聲，
我見佢咁，個心應該唔多唔少傷透，
或者仲滿有介懷，我亦費事強迫落去。
我有Ｄ後悔問錯問題：對唔住，
如果你覺得唔舒服就唔好講落去。
阿欣搖搖頭：我知你都係關心我先咁問，又點會介意。
我：我只係想你多Ｄ同我分享下你既心底說話或者感覺，
唔好成日屈住屈住嘛。
我都唔想你變成苦瓜乾架。
阿欣：傻佬黎。成日板起塊面既好似係你呢！
其實憎又有咩用，都改變唔倒事實，
與其話憎，不如話對佢好失望吧．．
家人又唔理，只係顧住錢同酒，點樣賭，
慶幸冇加埋係出面識女人，唔係就真係樣樣齊啦。
我安慰話：要係我有一個咁靚咁乖咁識諗既女，
我真係先唔會日日掛住賭錢飲酒呢，
係都花多Ｄ時間陪你啦。
阿欣由衷咁笑起黎：哈哈，把口浪過油喎今日，
講！係咪成日都咁哄女仔！（突然心情又變了）
我即刻猛搖頭話：冇呀冇呀，真心，真心。
阿欣：嘻，算你啦！
我：係啦，臨走前搵日約Amy，阿力出黎食個飯，
當係送行好嗎？應該冇異議掛。
阿欣：嗯嗯，冇問題．．
但．．
我：嗯？
阿欣欲言又止：都係冇野啦．．
我：講啦，盲既都知你有野隱瞞！
阿欣：駛唔駛．．約埋阿紫？
聽到阿紫呢個名，
心跳就好似落空左一下一樣。
係朋友角度上，係好應該邀約埋佢既，
不過，果時既我，實在唔想咁快再見佢住。
一黎會再次擾亂我既心情，打亂我既思緒，
二黎我覺得果時既氣氛會搞到好唔自然，
我實在唔想見到自己因為前度既關係，
破壞左阿欣呢個送別會。
阿欣：樂．．你冇事嗎？
做咩唔出聲架？
我：嗯，都係唔好約佢啦。
我短期內都唔想見佢住，
況且佢都未必出到黎啦。
阿欣爽快話：嗯，咁算啦。
我：Sorry呀阿欣，你唔介意少人ｄ氣氛冇咁熱鬧呀麻？
阿欣：點會呢？仲重要既人係你呀麻！
有你係度咪夠晒熱鬧囉。
阿紫，我電話同佢講好啦。
我：嗯嗯。
阿欣拉一拉我隻手：
喂喂，去呢間睇睇呀，
行啦快ｄ。
然後，我就比阿欣用武力強行拉左入去一家電器鋪。
阿欣一入到去，
就直接行埋去sales服務櫃位旁，
同個sales講：我想買數碼相機呀，你將你地有既所有牌子都拎晒出黎呀！
我聽完阿欣咁講即刻呆左，
個sales都呆左咁定係到。
頂！邊有人咁樣買野架！梗係睇岩或者問下先架啦！
一下叫人拎晒全部機出黎都有既！
果種語氣，就好似入銀行明刀明槍咁同佢銀行經理講：
喂！打劫呀！拎晒你地所有錢出黎！！！
阿欣係咪睇太多電視劇，痴上腦．．．
我細細聲係佢耳邊：．．阿欣．．．．
與其叫人擺出黎，倒不如叫佢介紹，
或者你有咩需求同佢講吧啦．．
你叫人放晒出黎人地好難做．．
阿欣：點知姐，我好少買電子野呀麻，
咁拎晒出黎慢慢揀梗係方便好多啦！
然後佢對住職員講：你話係唔係啦？
職員好唔好意思咁話：Er....都岩既，不過拎晒出黎需時，
不如你講下你想要點樣既一部數碼相機啦，
等我介紹比你好嗎？
阿欣：冇架，易用，多花式，影出黎相靚就ok架啦。
職員皺一皺眉：多花式．．？（果下我都皺眉）
我連忙解話啦梗係：Er....應該係多花款．．
影相模式方面．．
阿欣：嘻，阿樂你真係叻，知我想講咩．．
我：你係咪想死呀！成日對花式咁有情意結呀．．
阿欣：點知姐，我又未用過．．
職員：就呢款啦，智能auto模式夠易用，
又多相機mode，上幾個月先出架咋，
質素至好係佢，同埋輕身呀麻夠。
阿欣拎上手舞左兩舞，
其實佢對相機根本一無所知，
而我果時只係略知一二，
屋企用緊果隻更加係菲林機，
不過我見D模式應該幾好用同幾易用，
價錢又唔太貴，就叫阿欣自行決定。
我：你決定啦，要買果個係你。
阿欣：嗯，我鍾意輕身，
就呢部啦唔駛煩。
最緊要阿樂你都鍾意呢部呀麻。
我：做咩要扯到我身上呢．．．
一陣唔岩用唔好賴我呀！
阿欣：好野，有相機就可以影我地啦。
呢一部相機，雖然投資係我地兩人身上既快門唔多，
但的而且確為我地紀錄低多多少少既回憶，
亦因為咁，我先可以送到本”短期租約”比阿欣。
對我黎講相機發明真係相當之偉大，
就好似魔法一樣，張美好既時間定格。
如果人生可以定格既話，我又會想去返邊一個時光呢？
阿紫？阿欣？
當時既我，當然係揀返阿欣，
起碼再冇父母既反對，家境既阻力。
有人曾經問我：
有冇後悔過當初同阿紫一齊先，而唔係阿欣？
我好直接答佢：冇。
雖然我同阿紫最後都係分開，
但過程中我的的確確感受過前所未有既初戀感覺，
加上我同阿紫唔單單係愛情上既經歷咁簡單，
未到戀人之前既曖昧期，都係一段非常值得難忘既回憶。
後悔倒曾沒有後悔過，只怪timing不合，地利不合，
畢竟令到我地分手既係佢屋企，並唔係阿紫。
無論阿紫又好阿欣又好，
兩個人係我心目中都同樣係一個非常重要既角色，
冇佢地我既人生根本唔會咁精彩過（縱然而家都唔係好大），
更加唔會係呢度打倒呢篇故。
買完相機之後，阿欣興味盎然咁望住我：
嘻，買自己鍾意既野，仲要同自己鍾意既人一齊，
原來都幾開心。
我：小心唔好變成購物狂。
阿欣：唔會既唔會既，有你睇住阿嘛。
然後，我地就係旺角隨便行行。
阿欣：係啦，下一兩日我都要係屋企幫媽咪手
執下野，可能見唔倒面LU。
我：駛唔駛黎幫下手？
阿欣聽到我咁講，
用出奇既眼神望住我：噯？你黎幫我手？
我：嗯，橫掂冇野做，
最緊要既係，可以把握時間見下你阿麻。
阿欣面泛紅絲，甜甜咁笑住話：
嘻，好呀，阿樂你最抵錫。
講完就錫左我面頰一小啖。
阿欣繼續話：到時介紹你比我媽咪識。
就係呢次機會，我認識左阿欣既媽咪，
正如係機場時阿欣媽咪知道我叫阿樂一樣。
經過小食攤時，阿欣望住一串串野唔停，
果時已經知佢想食。
我：岩岩食過野冇耐，
又想食野？
阿欣：嘻，冇人話你知女仔正餐一個胃，零食一個胃，
甜品一個胃架咩？
我不禁搖搖頭：咁又何苦呢．．
阿欣：一齊掃下街囉。
然後就拖住我呢度食果度食。
情侶之間，你一口，我一口咁食住串燒既感覺真係好，
野食廉價得黎氣氛又不乏溫馨，對吧？
我：喂，你食到咀都有醬汁啦，
我幫你抹抹佢。
然後我就拎左張紙巾出黎，
輕輕咁幫佢擦一擦。
阿欣：阿樂，你真係溫柔架姐。
你可唔可以對我呢世都咁細心？
縱然我知道冇可能，
但我都輕輕點頭：當然可以，
現時除左你之外，我仲可以對邊個細心呢。
阿欣：哈，係咪真架？
我：盡量既話，我都唔會講大話既。
阿欣：嘻，知啦知啦。
咁聽日約定你過黎執野啦喎？
你識黎嗎？我係樓下接你。
我：識，到左果陣打比你吧。
今日既阿欣變得比平日豁然開朗，
大概佢都應該感受到戀愛既感覺吧，
見到今日呢一個阿欣，
其實我幾開心，
就好似見住佢回復返當初昔日既佢一樣。
佢每一個絲毫動作我都幾乎細心留意，
彷彿唔想錯過同佢一齊既任何回憶，
唔想好似一幅唔完整既砌圖一樣，令人婉惜。
見到今日既阿欣，我好似更加喜歡佢一點了。
行完街各自回家既途中，
褲袋既手提電話震動起黎，
打開一望底下，收到一個短訊，
係阿欣傳送過黎既。
內容大致上係話：
樂，多謝你今日陪我買相機，
又應承我聽日過黎幫我手執屋，
我真係好耐都未試過今日咁開心啦，
只要有你陪住既每一日，
我相信一定可以好幸福，
最愛你既阿欣。
又係既，今日既佢，的確比平時有魅力多。
阿欣係一個比我想像中易滿足既女仔，
所以同佢一齊既時候，其實冇咩壓力，
想去邊就去邊，想食咩就食咩，唔會介懷呢樣果樣。
而我對佢既感情當中，有一部分係比佢呢一份隨性吸引。
兩人相處最緊要氣氛來得自然，舒適，
而同佢一齊既時候，正正就有呢一種感覺。
大家唔駛忌諱太多，說話同舉止都無需只局限於一股正經，
比倒雙方空間做返最原本，最真實既自己，
先至係自己本能既魅力所在。
下下要係女仔面前搬弄自己有幾博學，
幾有文學修養，幾有才華，衣著幾有品味，用黎交換得
人地對你既印象稍為提高一點點，呢ｄ對我黎講都唔係屬於咩魅力，
並非咩吸引人之處，亦非內涵，自問見呢類人唔少。
真正既魅力，冇錯係本於個人，但同樣出於自然，
係人地感受，而唔係你自己刻意去表達，去營造，
至少定義上對我黎講係咁。
而我同阿欣各自都感受到對方既魅力所在，
所以先能夠好好相處，先能夠令對方幸福，不是嗎？
冇幾耐，阿欣又傳多一個短訊比我。
內容係話：喂，好應該係你手機通訊錄上將我既稱呼改一改吧。
唔準再叫阿欣，我地已經係情侶啦。
我見到之後，諗左好一陣，應該點稱呼至係呀。
我回覆佢：叫欣欣好嗎？（這令我聯想起欣欣杯了）（唔係飛機杯既一種）
佢答唔制，太過幼稚同肉麻，要再諗。
我實在冇好氣，都係一個稱呼姐。
搞到咁撚麻煩，我索性回覆佢：叫”喂！”咪算啦，唔駛煩。
簡單直接，乾淨利落，又不失霸氣，幾撚爽口。
而佢亦都冇應我．．．
結果，第二日．．．
我黎到佢樓下，見唔到佢落黎接我。
咁就打電話比佢：
喂！做咩唔落黎架，等左你好一陣啦。
阿欣：哎呀，仲叫喂喎！
我：叫喂幾好呀，夠爽呀麻，
你唔覺得講出黎好爽口架咩！？
喂！喂！（我前後喂了幾次）
阿欣：咁你係我樓下自己慢慢爽啦！
我：唔好唔好，都係一個稱呼姐。
阿欣：哼，總之你唔諗好我就唔落黎。
我：咁樣唔好咁樣唔好，
你落黎先，落左黎就有個好答案架啦。
阿欣：係咪架？
我：嗯嗯，落黎先啦。
果時我心諗：呢個阿欣，又會無啦啦變得咁細路女都有。
見上黎附近有間七仔，
就走左過去睇下有咩買啦！
買完之後，已經見阿欣係樓下等緊，
見狀況不妙，就拿拿林跑過去。
阿欣見到我之後，
有點唔滿意咁話：
死人頭！又叫人地落黎，
落完黎又唔見你，係咪玩野呀！
點呀！諗到未？
阿欣留意到我背後手收埋住ｄ野，
就話：你背後收埋ｄ咩野，好拎出黎啦喎！
結果未等我拎出黎阿欣已經主動行去我後邊裝裝下，
然後話：哦！你個死人頭，都算衰啦，
為左走去買甜筒要我等你！
我微微笑住話：欣，唔好咁火啦，
甜筒係我特登買黎比你食架。
阿欣：得一杯，你點講都得啦。
我：就係得一杯，先可以兩份share阿，係咪？
一齊食先sweet麻。
然後我就慢慢掛開包裝，我：拿，喂你食又點話。
阿欣好甜咁細細啖係雪糕上咬左一下，
我：夠甜呀可？
咁唔好嬲啦，知天氣熱買雪糕比你都算抵鍚啦掛。
阿欣面紅紅話：算你啦。下次講聲呀麻，傻佬。
我：咁．．有冇獎勵呢？
阿欣：好啦，錫啖你啦，
不過食緊雪糕喎。
我：你驚？
阿欣：嘻，我先唔會比你呢ｄ激將法影響倒。
想鍚既，捉到我咪比你錫囉。救命呀～～
然後阿欣就即刻轉身跑入去大廈大堂，
而我都毫不讓步即刻追佢。
只見阿欣不斷講笑話叫救命，有變態佬捉佢咁話，
我地兩個就係咁，吵吵鬧鬧亂衝亂撞咁上去啦。
入到屋當然要叫人啦，禮節上既野我都識做。
我點一點頭：伯母你好，我係你幫你地手架。
阿欣媽咪：你就係阿樂呀可？
阿欣已經話左我知佢會帶男朋友上黎幫手。
一聽之下我已經反應唔切，
估唔到阿欣媽咪咁快已經知到我同阿欣既關係．．．
果時我實在好尷尬。
我：Er.....哈哈...阿欣佢，果然夠坦白．．
阿欣向我單單眼：嘻，駛咩講，我同媽咪咩都講既。
我心諗：咁真係仆街啦，以後想亂黎都難。
阿欣媽咪：麻煩倒你真係唔好意思，
上黎都口渴呀可？黎，坐低飲杯凍水先。
我：嗯，麻煩晒。
然後我就坐左係凳度，
阿欣係我背後輕輕捏捏我膊頭，
然後低頭係我耳邊話：放鬆ｄ啦，唔駛咁拘謹架喎。
我媽咪又唔會食左你既。
兩分鐘後，見阿欣媽咪拎住杯水，
我都唔好意思坐係度，就拿拿林上前接過：唔該晒。
阿欣媽咪：唔好意思呀，屋企笠笠亂，
冇咩地方比你坐。
我：傻啦伯母，打搞到你係我唔好意思就真。
我唔駛點坐架啦，我黎幫手架麻。
講完之後，只見阿欣同佢媽咪都互相對望住，
然後大家微微笑咁，唔知佢地心入面究竟交流緊ｄ咩呢？
眼見阿欣既媽咪，其實唔駛太老，身材亦都保持得勻稱，
雙眼同阿欣一樣咁明亮，難怪阿欣遺傳到一對咁令人動心既眼睛。
而佢比我既感覺，相比起阿紫既媽咪，
實在和藹友善得多，氣氛比較融和溫暖，
同阿紫媽咪冷冰冰般既語氣簡直大相逕庭。
我亦打從心底覺得，
呢度，先係一個家應有既感覺。
我亦主動開聲：伯母，我有咩可以幫手架？
阿欣媽咪：你可以幫我將果類唔要既野全部放入
一個紙皮箱嗎？
我爽口答：冇問題。
阿欣主動埋黎話：傻佬，我幫你。
我：嘻，求之不得。
然後我地亦正式將物件分類，
再將一ｄ唔要既野放入一個紙皮箱，
要既野就放入行李箱，
地下有既垃圾，塵等都要掃一掃等。
兩個鐘頭後，廳既野都幾乎執得妥妥當當，
阿欣就叫我去佢間房幫手執執。
佢係自己一個人訓一間房既，
所以除左自己本身D衫褲要處理外，
仲有書櫃呀，櫃筒果ｄ野要清理。
以一個女仔房黎講，
阿欣間房算叫簡潔，冇咩多餘花巧既野。
一張雙人床，被鋪，枕頭同床褥驟眼睇已經知係一套，
款色花紋都係一樣以淺藍色，白色，深藍色為主。
床上有幾個cushion之多，一個人攬咁多做咩呢．．
床旁邊自然係一張書台，深啡色做主，
仲記得櫃筒有四個。
書台上有電腦，筆座，幾本小說等等，
並冇多餘既雜物。
書台斜對面係衣櫃，再多幾步便是一個小書櫃，
裝左中學書，小說等書籍，仲有唔少files。
而整個房間，就有估獨有既花香味，
阿欣話係香薰黎。
我：ｄ衫褲果ｄ私人野你自己執啦，
我幫你清下書櫃算。
阿欣：樂，你辛唔辛苦呀？
攰既可以坐係度抖陣先喎。
我：唔會呀，你攰唔攰就真。
我幫你執先啦，你坐係床度抖陣吧。
阿欣：嘻，又好。
多謝你今日黎幫我地手先執得咁快咋，
媽咪都偷偷地讚你耶。
我：哈，又唔係ｄ咩，舉手之勞姐，
幫得咪幫囉。係啦，呢ｄ書唔要架啦可？
阿欣搖搖頭：唔要架啦唔該。
因為要執書既關係，當時我係背向阿欣，
而書櫃既位置唔係房門邊，所以廳出面根本望唔到
入黎果個位。
就係果時，阿欣突然從背後攬一攬住我，
而我亦比佢呢個動作稍稍嚇親，雙手停低任何動作．．
雖然我倆身體都隔住一件薄薄既短袖衫，
但我仍可以隱約感受到佢胸前既觸感。
我：阿．．欣．．？
阿欣：樂，你知唔知呀？
攬住你背脊既感覺真係好舒服，
好有一份可以依靠既感覺，
呢ｄ．．係咪叫安全感．．？
我緊張到唔知講咩好：嗯，應該．．係吧．．
阿欣由原本雙手攬住我前方腰間位置，
慢慢咁挪動手指，輕輕向上方移動．．．．
手指指尖雖然唔係直接觸及到肌膚，
但從阿欣指尖傳送過黎既電流感依然對我既心跳造成
極具影響既力量，令我心臟不斷急劇加快跳動，
而且每一下既躍動都咁震動人心，就好似挑戰緊我
心臟最大既跳動幅度同極限一樣。
加埋係果個環境下，
如果阿欣媽咪入到黎，我地兩個咪斷正？
我唔想再好似阿紫果次咁，差ｄ心臟停頓咁就一世．．．．
一諗到果個情況我心跳就以幾何級數上升。
然而係呢個極危險既情況下，
阿欣依然冇停低佢手上既動作。
咪住咪住！阿欣應該唔會同左佢媽咪講佢一陣會做呢ｄ野，
叫佢媽咪唔好入黎吧．．．嗯．．冇可能冇可能．．
果時，阿欣雙手已經移到我胸膛既位置，
然後停低落黎，
同我講：嘻，阿樂你個心跳得咁快既？
我：下．．冇呀．．邊有．．
阿欣：係咩？明明”瀑瀑瀑瀑瀑”咁跳啦喎，
仲話冇，我感覺得好清楚哦。
（拜託，再挑逗我真的不行鳥）
我：都係．．咁岩姐．．
阿欣：你拎過黎比我聽清楚Ｄ。
然後，我就拎過去，
佢用帶點挑逗既語氣輕聲細語：
你，好緊張咩？
我：．．．．．．．
果時既我，呼吸已經急促得好似一隻字都吐唔出口，
彷彿阿欣既迫近好似頓然將四周圍既氧氣都消失一樣．．
阿欣：嘻，阿樂你真係純情架姐。
最鍾意見你怕醜個樣．．．
果時阿欣終於離開我身邊，坐返係床上面。
我面紅紅：邊有人會鍾意Ｄ咁既野，
我開始懷疑你係咪有Ｄ變態。
一陣你媽咪入黎咁點算呢．．
阿欣：嘻，你睇下你你睇下你，
我做女既都未咁緊張。
（你梗係唔緊張啦，要斬都斬我先）
阿欣：見你咁純情，就獎勵你，
比Ｄ野你睇啦。
果時，阿欣由再慢慢咁向我靠近。
而我依然企係書櫃前既位置原封不動，
就好似全身神經都唔再連接住一樣，
身體無法再做任何動作。
阿欣細細聲講：合埋雙眼。
可能就係因為雙眼合緊既情況，
係黑幕籠罩既視野下，
彷彿身體對觸感既探測比起張開眼睛時更為敏感，更為強烈。
令我可以清楚感受到阿欣既吐息，
佢既熱能，佢咀唇柔軟水潤既觸感，
以及肌膚既溫暖。
今次接吻既感覺，比起上一次既更為震撼，
令我久久無法抗拒呢一股強烈而奇幻既刺激感。
然而張開雙眼之後，
阿欣手上已經拎住本書，
預期係話一本書，不如話係相簿吧！
果時我先發覺，原來我比阿欣鍚緊既同時，
佢已經伸手向我後面既書櫃底層同時拎左本相簿．．
今日既阿欣．．變得鬼馬起黎。
阿欣輕輕拖我隻手埋床邊，
兩人對望而坐，
佢：呢本就係我細個時既相簿，
冇人睇過架，見你咁乖，
就獎勵比你睇啦。
我逐頁逐頁咁細心欣賞住佢細個時既相，
真係幾可愛，到今依然個樣係輪廓上冇咩大既轉變，
只係髮型唔同左，同身材比例勻稱左。
正正因為咁，我先至唔咁相信，
一個咁靚既女仔，竟然會鍾意一個咁平庸既自己，
而係果一刻，我就眼定定咁望住阿欣，
有如稀世奇珍一樣。
阿欣輕輕伏係我膊頭上：
點呀？係咪好可愛呢？
我：當然可愛啦，
以前係，而家都係。
阿欣聽到我咁講之後，
微微咁昂首望住我，
窗口所瀉下既太陽光線，
正好為阿欣臉頰鍍上一層光膜，
令到膚色睇起黎更加紅潤，
更有少女雛肌既亮澤，
就好似岩岩經細心琢磨好既鑽石一樣。
果一刻既阿欣，
加上果一刻既光景，
自然構成左一幅極唯美既畫像，
如果我係畫家，
絕對絕對唔會放過果一刻，
將佢動筆成畫。
果時既我，身體按奈不住咁，
輕輕係阿欣額頭上錫左一啖。
話就話自己克制住自己，
但心入面依然有一頭野獸般既衝動，
令我好想即刻將阿欣推低，
然後除晒佢ｄ衫褲係打開房門既情況下
同佢大幹幾回，必定令到伯母目定口呆，
甚至會加入，但諗清楚一層呢ｄ野只會係睇
AV既情節下出現，都係唔好試較好，
冷靜Ｄ，冷靜Ｄ。
當然到最後梗係大家安然無恙咁各自執返野啦，
唔經唔覺執完晒七七八八時都已經黃昏。
出返客廳時，
阿欣媽咪埋黎同我講：
樂，你幫左成半日手，不如係度食餐飯好嗎？
我：下．．好似好打攪咁．．
唔係幾好意思。
阿欣媽咪微微笑話：
唔打攪唔打攪，Ｄ餸又唔係Ｄ咩貴野，
只係家常便飯黎。加上你又出力幫忙，
冇理由咁就走架嘛。一於咁話啦！
阿欣：係囉，阿樂，當係陪我食晚飯囉。
我見佢咁好客，我都費事再推了。
我：咁我唔客氣啦，多謝伯母先。
阿欣媽咪：咁我落去買一買餸先，
你就係度坐陣啦！阿欣，唔好只係坐係度啦，
快Ｄ斟杯水比人飲先得架麻。
阿欣：哦。
就係咁，阿欣媽咪就落去買餸加料，
而我同阿欣倆人，就留係屋企等食。
我：你地兩個感情好好呢。
阿欣：我同媽咪？
係呀，大家有咩都同大家講既。
媽咪得我呢個依靠，而我又得媽咪呢個依靠，
大家互相關心，互相照顧。
我：嗯，真係好羨慕，我完全感受到你地倆人之間既家庭溫暖。
阿欣：嘻，駛咩羨慕喎。
不過而家呢．．
我：嗯？
阿欣由衷咁話：依家有多一個依靠啦，
果個人就係阿樂你。
我微微笑住話：傻瓜。
然而阿欣媽咪落去既時間雖然唔太長唔太短，
但係果段時間之間，我同阿欣又再發生一次
怦然心動既甜蜜回憶．．．
想知咩事？聽日再睇吧！
阿欣媽咪離開左之後，
我就依舊好拘束咁坐係梳化上，
果時我再仔細留意一下執拾過後既客廳，
只見一箱箱滿滿等住拋棄既紙皮盒，
以及兩個比較大型既行李箱。
眼見呢一切一切，再對比番以前黎阿欣屋企時既光景，
心入面難免感到有ｄ傷感同落寞．．
阿欣佢，真係要走啦，真係要移民啦，
從一箱箱沉重既紙皮盒就係鐵一般既見證，
亦都係鐵一般既事實，任何人任何人，
都改變唔倒，更何況渺小既我？
哎，老毛病又黎，阿欣唔係已經安慰左我
唔好諗咁多將來架咩？將來會發生ｄ咩根本冇人知，
只要活好現在，把握而家既一切，珍惜手上所擁有既野就得啦。
離別唔係無機會重遇既，無人清楚既野，自己又何必諗太多？
我只係知，而家係我眼前視線見到既，就只有阿欣一個，係實實在在既佢。
阿欣遞一遞杯凍水比我，然後坐過黎我身邊，輕輕伏係我手臂上。
果時既我，心入面係度諗：
雖然阿欣並無同講出口，但我其實好清楚感受到，佢好鍾意伏係我身上，
無論膊頭又好，手臂又好，大脾都好，所以我好明白阿欣實在好需要安全感，
好需要一個寄託，因為佢實在經歷得太多太多，我諗佢內心都已經好攰，
早已經傷痕滿佈。縱然阿欣係輕輕挨係我側邊，但我可以感受到佢內心既
沉重同負擔都向住我呢邊卸下，彷彿從身體上擱下一個大擔子一樣。
阿欣並冇出聲，靜靜咁享受住我同佢既呢一刻，
我亦輕輕用手繞過佢腰間，係側邊從後攬住佢，
果時既我，就覺得佢既身體係一個易碎既花瓶一樣，
所以我攬得比較輕手，想保護佢弱小既心靈。
同時用手輕輕撫摸住佢柔順帶微花香既秀髮。
果時既世界，我覺得係最簡單，最平靜，而且係最美好，
實在冇其他野可以媲美，呢個完美既世界，我可以
永永遠遠處身係入面嗎？可以永遠都唔會末日消失嗎？
阿欣，你知道嘛．．
係我心境幾乎已經殘破不堪既時候，
一度我認為自己心入面再無生機既時候，
你出現了，你實實質質咁出現了，不斷向我伸出援手。
果時，我終於可以係正面臨淪陷，所有野都倒塌緊既灰色世界下，
搵到一個可以令我安然入睡既避難所。
入面並無其他避難者，只有傷痕纍纍既我，同埋如天使般出現既你。
我知道你都攰啦阿欣，
而家好應該輪到我照顧返你，
我係唔會再將你丟低一個令你獨自承擔痛苦。
我：欣。
只要你有任何一刻需要我，
想要我係你身邊陪你又好，聽你訴苦又好，
靜靜地好似而家咁伏係我度都好，
無論關係係點，我都唔會推搪。
呢個係我對你永遠，永遠既承諾．．
阿欣聽到之後，冇應我，
我以為佢訓著左啦，咁我就刻意去望下佢啦，
點知先發覺佢身體有好輕微既抖動，
初時以為佢凍，但又唔似係，
原來一睇之下阿欣雙眼已經有ｄ濕濕地。
（估唔到，我會令到佢濕左．．）
我有Ｄ不知所措，事關我真係好怕好怕女仔喊。
我：對唔住．．我唔係有心整喊你．．
我只係想你如果有唔開心既話．．
可以無時無刻都搵我。
阿欣：我聽到你果句之後，
再諗返起之前Ｄ野，
所以先忍唔住．．
我：SORRY呀，我唔係特登令你諗返之前．．
（唉，我做錯左嗎？）
阿欣搖搖頭：嗯，唔關事呀，
阿樂你呢番說話令我有Ｄ感動，
我知道而家既野得黎不易，
所以先．．
我用手指輕輕抹過佢眼眶外圍既淚水，
然後係佢額前錫左一啖，
一邊摸住佢柔軟既臉頰一邊話：
放心啦，只要你需要我果陣，
我無時無刻都會企係你身邊。
好啦，唔好喊啦，
一陣比你媽咪返黎見到就弊。
我繼續講笑咁話：不過就算佢唔知，
你都會直接同佢講架啦，係咪？
阿欣噗嗤一聲笑起黎，
然後話：樂，我愛你．．．
跟住，我地就不自覺．．擁吻起黎．．．（返黎再補）
吻著吻著，
由最初嘴唇慢慢細嚐對方既柔軟感，
慚慚隨住倆人既默契稍稍將節奏加快起黎。
吻，亦變得深，變得激烈，
激烈得心跳加快，激烈得將周圍既氧氣都燃燒起黎，
令到倆人既呼吸變得急促，身體起伏更大，
邊吻著既同時以上既野我都可以清楚感受到。
可能因為擁吻既同時，
雙方更加深刻感受到大家濃濃既愛意，
當我微微張開眼既時候，
發覺阿欣雖然緊緊合閉住雙眼，
但卻留意到佢面頰已經激動得流左一行眼淚。
係果時為左安撫阿欣多一點，
我唔再吻著佢既嘴唇，
輕輕將雙唇慢慢咁移去佢淚痕既位置，
彷彿撫慰住佢心靈既傷痕一樣，
然後漸漸再將吻移到去佢緊合既眼睛。
阿欣既呼吸並冇舒緩，
可能係佢既情緒有ｄ激動所致吧！
不過唔緊要，我會盡自己既一切能力去彌補
妳心靈上既傷口。
阿欣用手緊緊攬住我，佢既手不知不覺間
亦捉緊左我背脊既衫領位置，唔想我同佢之間
有任何空隙，任何距離，甚至任何隔閡。
我地果時，冇用任何說話溝通，
因為肢體語言，就係最赤裸裸最真誠既表達。
我雙手亦不聽身體使喚，
好似自己有生命咁係阿欣既背脊上輕輕撫摸住，
身體亦慢慢咁沿住梳化背訓低，
阿欣相對地整個身壓左係我上面。
我用最溫柔既方式親吻住阿欣耳珠既敏感帶，
果時既佢身體好似通過電流咁震左一震，
令我切切底底明白原來人真係導電體黎。
佢雙手環抱住我個頭既位置，並不斷上下撫摸我既頭髮。
然後係我耳邊低聲話：樂，攬實一Ｄ好嗎？
呢個說話係果時聽起黎，
實在喚起左我心底入面既衝動，
我同阿欣再次錫起黎。
舌頭開始互相交疊，纏弄著，
我對手已經忍唔住伸手入去佢背脊並用
指尖上下咁係暖而平滑既肌膚上遊走
阿欣亦敏感地稍稍扭動左一下身體。
正當我想將手移去佢腹間既位置時，
佢係我耳邊再溫柔咁講：
樂，留返下次吧，媽咪已經就返。
果時既我，先意識到原來時間已經不知不覺
過左半粒鐘，佢媽咪亦應該就快返，
比佢見到就痾撚啦！
我頭腦慢慢變清醒起黎，
倆人就回歸返最初時既姿勢。
無幾耐，阿欣媽咪返黎，
雙手拎住一袋二袋既餸，
然後同我講：
阿樂，你食魚架呵？
其實我份人真係冇咩唔食，
但就偏偏唔撚鍾意食魚，特別係
有腥味果種，我就至驚。
果時既我都唔知點答好，但人地
一場買埋魚我話唔食又唔係咁好．．
我：都食既．．．嗯．．食少少咁．．
阿欣：得唔得架你？唔得唔好死頂喎。
我：冇問題既．．．（希望唔好蒸就得啦，煎既起碼冇咁易有腥味呀麻）
阿欣媽咪：岩啦，條魚咁生猛，
你一定要食多ｄ呀！一陣半條，你既！
聽到呢句之後，未食我已經成個人開始打冷震。
半條！？平時我食一兩啖．．．．．．．．．就已經想嘔。
一陣都係快ｄ食晒ｄ飯佢然後話飽，咁就唔駛食咁多啦！
嗯！！一於咁話。
我：伯母有ｄ咩我可以幫手呀？
阿欣媽咪笑住問我：哈哈，你食煮野食咩？
我：識少少咁啦，洗下米都得既。
阿欣媽咪：唔駛啦，話晒都係客人，
今日你又幫左咁大忙，你開住電視坐定定得啦。
阿欣，快ｄ過黎幫媽咪手，如果唔係有排搞都冇得食。
然後阿欣就對住我講：
樂，咁你坐住先啦喎，我去幫媽咪手。
我有ｄ好奇咁問：你都識整野食咩？
阿欣叉叉腰咁話：你咁講咩意思先！
即係睇死我一定唔識煮野先啦！
係咪？
我猛搖頭：唔係唔係，
絕對冇呢個意思，只係．．有ｄ驚訝姐。
阿欣：車！驚訝驚訝！女仔識煮野食有咩好驚訝！
睇住黎啦，我煮野食不知幾拿手呀，
今日有得食你真係執到。
我：係既係既，執到，執到．．．．
大概一個鐘頭後，
所有野都已經煮得七七八八，
咁我梗係主動幫下手開下台，
拎下碗碟筷子唔好只係坐係度啦。
飯餸多係三餸一湯，
湯係花旗參雞，至於餸就有蒸魚（SHIT!）
，菜心炒牛肉同埋瑞士雞翼。
雖然簡簡單單，但水準真係有返咁上下，
牛肉唔會太硬，雞翼又夠入味。
我：係呢，邊碟餸係阿欣整？
阿欣媽咪：冇呀，佢幫手洗米同洗菜咋。
我即刻藐左一藐阿欣：又話煮拿手野．．？
阿欣：諗諗下都係唔好比你個傻佬咁快食到，
如果唔係唔韾香架啦！咩都比晒你既話。
我心諗：呢ｄ咩道理黎，有好野當然要show出黎架啦！
阿欣用狡猾既眼神望住我，然後不斷親自夾野比我：
樂，食菜心呀。
我：嗯嗯，唔該唔該。
阿欣：樂，食牛肉呀。
我：哦哦，唔該唔該。
阿欣：樂，雞翼要襯熱食架，拿。
我：係既係既．．．
阿欣：樂，食魚呀。（果時我個心開始知不妙）
一分鐘後．．．
阿欣：樂，食魚呀。（又夾魚過黎！？）
一分鐘後．．．．
阿欣：樂，食魚呀。（屌！！！）
我心入面真係忍唔住，頂唔順就係咁食快我會嘔。
親佢媽咪行入廚房裝湯時，
我細細聲係佢耳邊講：阿欣，你係咪玩野呀！比咁多魚我，
真係多舊魚呀！
阿欣：咩喎，人地諗住你食得肥肥白白呀麻。
我：我白你個頭呀！幫我食ｄ啦。
然後伯母已經出返黎，
見到我滿飯碗都係魚肉，就話：
阿樂，你真係好鍾意食魚咁喎，
唔急唔急，慢慢黎，成條比晒你。
果時塊面已經食到變成紫色．．
阿欣你真係好撚狼，竟然咁對我！
就係咁，餐飯就係好唔輕鬆既情況下食完，
不過期間大家都有講有笑，
好似一家人咁，溫暖得黎又融洽，
有個咁好客友善既媽咪，同對我咁好既阿欣，
時間如果可以再長一ｄ，你話幾好呢．．？
食完晚飯後，
我想主動幫手洗洗碗碟，
就同伯母提出呢個請求，
心裡實在唔想麻煩倒人地太多。
阿欣見我咁講，就順便幫下我口：
係囉媽咪，你今日都忙左一輪辛苦架啦，
碗碟就由我同阿樂兩個人洗啦，
你去沖個涼抖下。
伯母見我地咁誠意拳拳，都唔好意思再婉拒我。
我同阿欣就夾手夾腳收拾好台上面既碗筷，
清理唔要既餸，就將ｄ碗碟一次過洗。
拎晒所有野入廚房之後，
我：不如，我負責洗，你負責抹，好嗎？
阿欣：點解既？
我：你對手咁滑，一陣皺晒皮點算？我實在唔忍心啊！
阿欣一邊點頭邊笑著：傻佬，洗潔精係下面個櫃入面。
於是，我就仔細用洗碗布將碟上既油漬捽走，
過過冷水，然後遞比阿欣抹乾，重覆又重覆。
阿欣邊抹邊話：樂呀，我下次親自煮野比你食好唔好呀？
我：嗯嗯．．（一邊忙著洗碗，邊有聽咁多）
阿欣：哎呀，做咩應得咁冷淡架，你唔想咩．．？
我：聽住先啦，你唔係話咁快show晒d quali就唔馨香啦咩？
阿欣伸伸俐：嘻，其實我講下笑架咋，
見你對我咁好，唔對你好ｄ點得喎。
我：哦？知我好啦咩？
阿欣：睇下你，讚你一讚就開始囂張起黎啦。
我下意識洗完個碗之後，就用右手遞比佢，
我等左一等心諗點解佢唔拎去抹，
望望佢之際發現唔見左人，
我再擰一擰轉身，原來佢係我後面，
接住就係從後攬住我。
我溫柔咁話：點呀你，咁唔安守本份既？
阿欣：不過呢，不過呢，
今日既阿樂係抵讚既，就比你囂一次啦。
我：哈哈，只係今日咋咩？
阿欣：今日特別ｄ，但日日都抵錫。
我：咁快ｄ錫啖啦，唔係冇力量洗碗啦。
然後佢就好聽話咁錫左。
阿欣繼續攬住我講：你覺唔覺我地而家好似
老公老婆咁呀？大家一齊
做家務，你洗碗，我抹，你唔覺得氣氛
好溫馨，好幸福咩？
果時，我腦海入面，的確憧憬住，渴望住將來我同阿欣既婚姻生活。
雖然我知道幻想總比現實黎得完美，
雖然我知道呢一個現實前面只能加上”如果”，
那，加上”如果”既現實又係咪現實？我相信大家都深知道答案。
然而對我黎講，我有機會去憧憬，有機會去幻想，已經好心滿意足。
我微微笑：咁你願意做我未來既老婆大人嗎？
阿欣：哈哈，睇你乖唔乖先啦，
唔咁快應承你住。
我：仲掛住講，拿，呢堆碗碟你抹既。
阿欣見到一幢幢高既碗碟，
就扁扁咀，扮晒嬌嗲咁話：阿樂～～～幫我～～
我實在冇好氣：得得得，唔好發姣ok?
怕左你。
我繼續話：不過呢，我又冇晒力量啦．．．
阿欣知我想點，然後就百厭咁話：
哈哈，冇喎，你今日既quota用完啦，
明天請早啦，拜拜。
然後就一支箭咁跑左出廚房，留低比我執手尾。
搞掂好晒之後，都係時候走，
同伯母講聲再見之後，阿欣就送我去搭車。
我話自己走就得，阿欣死都要痴住我，
仲一路係後面攬住我唔放，真係傻。
我見唔係太夜，就同阿欣講：不如去七仔飲杯野？唔想咁早走住。
阿欣：知你唔捨得我架啦，行啦。
入到七仔，阿欣話請我飲野，飲咩就佢話事喎，
叫我企定定係張台等就得。
然後佢就一路係我面前用手揚住：
樂，朱古力奶呀，好耐冇飲啦可？你最鍾意架。
手上接過呢盒凍朱古力奶後，縱然我好耐冇飲，
但無論盒既包裝，顏色，字型都一一無變，感覺
就好似時間停滯左兩年一樣。兩年前，我每日都幾乎
對住呢個熟悉既飲品，熟悉既名字，熟悉既味道，以及，
熟悉既”她”。”她”是誰人？大家有共識吧。
失去之後，我已經好耐都冇接觸朱古力奶。當然係刻意咁避開。
你問我點解既話．．一黎飲品本身既味道會令我再次陷入回憶既
泥沼，再次令我諗起”她”。二黎我覺得，自己買比自己飲既話，已經
再冇意思，再冇意義可言。
我定左神，久久都未掂盒奶，只係將佢放係台面，
佢就好似完全抵受唔住從凍櫃走出黎既氣溫一樣，
盒身不斷冒出水珠，然後滴下，而我卻將佢睇成淚水。
今日，呢盒奶再次呈現係我眼前，請我飲既人已經不復再，
而係眼前既阿欣，令我不禁對人生既奇妙感慨起黎。
阿欣見我唔出聲，成個人出神，就話：樂，你做咩呀？係咪有咩事？
我：唔係，之不過實在太多回憶．．．一時又湧現起黎．．
阿欣斷斷續續：其實你．．同阿紫係因咩原因．．而分開．．？
我坦白答：我同佢．．到後期．．先發覺大家根本係兩個世界既人。
佢屋企有既一切一切，遠遠駕馭係我地微弱既感情之上，
就算果時唔分開，我相信只係時間既問題．．．．
阿欣係果時捉緊我隻手，然後用佢極有生命力既眼神望住我：
樂，過去已經過去啦，最緊要既係，你唔再係自己孤身一個，
你仲有我嘛。我唔會比你再沉溺係果往既回憶，我會同你建立
而家我地兩個既世界。
呢句說話，我聽到之後，其實真係幾感動，
更加感動既係，阿欣永遠可以係正確既時合，講出正確既說話。
阿欣：喂喂，你睇下我都飲完啦，你仲一ｄ都未掂過，
係咪唔捨得我成咁先。
我：唔係唔係，我拎出去邊走邊飲啦，都夜啦。
果時，手上拎住既朱古力奶，已經唔再冰冷，
飲落心頭既時候，更加有一絲絲既暖意蕩漾住，
果份熟悉既味道，已經令我唔再回憶以前既某人，
而係而家呢份活在當下既愛情，同埋，
實實在在係我眼前既 － 阿欣。