有一晚一個來電外傳: 第五章 - 餘暉 (上)
八月初，正值炎夏。
走過街道，只見好多路人紛紛躲到遮蓋陽光既位置，特別係女生。
我從來唔迴避太陽，有時自身幾鍾意果種直接帶黎既刺熱感，
係一種活著既證明。
公園旁松樹上，夏蟬一直長鳴，一副誓將樹汁一飲而盡既姿態。
夏蟬白日先出沒，夜晚咁又去邊？
既然本身都係棲息係樹上，夜晚卻從來冇咩點聽過蟬鳴，
多聽到既都係果ｄ可惡既蟋蟀。
邊走，邊聽著，腦海不斷沉醉返小一至小三既日子。
小一至小三既暑假，
係我有記憶而且有知覺既童年裡面，
聽得最多蟬鳴既夏天。
果時家窮，住既係臨時安置區，
面積非常細，但鄰里關係非常好，
成日互相照應，唔似得而家淡薄得多了。
果陣時邊有o靚仔只係伏埋屋企睇電視，
亦變似得而家d o靚仔成日係屋企玩遊戲機，上網打機果ｄ。
我地既娛樂，就係同隔離屋ｄo靚仔係大熱天時，
出公園玩。
公園雖小，但係一個玩極都玩唔厭既地方。
由踢波，玩閃避球到"何仔公"，”埋洲”，
以及係乒乓波台上玩"捉雞腳"．．．．．．
係夏蟬伴隨底下，流過無數汗水，
跌損過無數次手腳，然後比我老母屌過無數次老母。
玩到冇野玩時，再去捉金龜，捉甲蟲然後係腳度綁上繩當風箏咁飛。
入埋男廁偷睇人痾屎，之後扔埋水彈入去，
然後再係屋企玩飛行棋，波子棋等。
我非常之佩服當時對環境同心態上既適應能力，
果頭睇完人痾屎扔埋水彈，果頭就係屋企用冷靜既頭腦同人捉象棋。
仲記得果時最初代既gameboy，
係我喊左成日叫我老母先肯買，
n64，係要去我朋友屋企先有得玩。
對我黎講，呢ｄ先係”童年”。
而家時代唔同，而家既家庭只係迫ｄ細既去學琴學畫畫，
又或者只顧用電腦，錯過左好多一班人無憂無慮果種笑容同歡樂。
現時卻只能回味，成年人已經唔可以再返璞歸真，
你試下叫你地同事係lunch time陪你玩”埋洲"，睇下有冇人理你？
搬到公屋後，無論讀緊小學定升初中，
多數留係屋企做做暑期作業，睇睇電視，
特別係酷愛卡通片：
為食龍少爺，亂馬，四驅兄弟，數碼暴龍，
婚紗小天使，聖女貞德等等等等（最鍾意就睇有得換衫既卡通片）
，間唔中先用用電腦上網。
比起以前，已甚少出街．．．．．．
夏蟬初鳴既聲音亦再冇係耳邊切切實實咁聽到。
失落幾年後，令我再多聽到蟬鳴既人，係阿欣。
因為暑假有佢一直陪住。
一齊半個月以黎大家既感情都發展得異常地快，
但性格上亦異常地合襯。
無奈，日子不斷倒數，倒數。
我冇戴開錶，亦都一直唔太鍾意戴。
說到底，我怕，
我怕望住秒針一秒一秒咁移動，
我怕再望時時針已經過左幾個鐘。
令自己知道時間既流逝，
對我黎講，係一種殘忍。
但刻意忽略既話，時間就偏偏走得愈快。
八月初啦，
剩餘既時間真係冇多。
我唔係出身於有錢家庭，
唔係上班一族，
我只係一個讀緊中三既平凡人。
我冇錢同阿欣去一次短線旅行，
係佢陪伴之下一齊勇闖陌生國度；
我亦冇錢同佢一齊去美國留學，
係學業上互相扶持，生活上互相關照。
我，只係一個讀緊中三既平凡人。
不過，對我同阿欣黎講，
係我地平凡既愛情之間，
已經有著超脫平凡既經歷同感情。
我應該慶幸，應該知足嗎？
不，我一ｄ都唔知足，
因為我想留住呢一份愛，呢一份感情。
我停低腳步，
望望四周既環境，
望望呢一個，阿欣快將係呢度消失既環境。
失去佢之後，大概我應該唔會再黎，
途人唔會再認得我，管理員唔會再見到我送佢返屋企。
我放眼想好好望清楚呢一度，
我亦將焦點放近，
好好望清楚眼前向我行緊埋黎既阿欣，
一個紮身t-shirt，短裙，長頭髮，清秀面孔既女仔。
阿欣行埋黎拖住我：
等左好耐呀？
我：唔係，都係岩岩到。
阿欣：都叫左你唔駛特登黎接我架啦。
我：我想多見你呀嘛，心急呀。
阿欣：哈哈，咁心急做咩，
又唔係聽日就走。
佢唔明白，時間快到好似佢聽日就要走一樣，
我先想把握把握再把握時間。
餘下既日子，我地就好似普通情侶一樣，
做普通情侶會做既野。（唔好諗邪 ）
我拖住阿欣，逛過無數次情侶逛過既街。
入過時裝鋪，
去男裝部時，佢會幫我揀衫，放係我上身仔細打量，
邊一款襯我，邊一款唔襯，價錢適合就買。
相反去女裝部時，我會仔細欣賞阿欣既品味，
仔細欣賞佢襯唔同衫時既樣，
盡顯佢百搭既性格，
由可愛風格，清新風格，少女風格，試到成熟風格。
縱然係window shopping，我地有過既唔係物質上，
而係心靈上既愉快，心靈上既滿足。
行到攰，行到肚餓，
我地就隨便揀一家餐廳食，
有時兩個人share一個食物，
你一口，我一口，互相餵住大家。
我亦懶得理會果時旁人既眼光，
眼前雙眸見到既，只係”珍惜”呢兩個字。
基本上，每日我地都盡量試唔同國家既菜色，
由中菜試到西式，中東式，印度菜，泰式等，
雖然唔能夠用腳踏進異國國度，
但卻可以用咀巴嚐盡各國風情。
吃進肚子裡既，
無不是一茶匙又一茶匙既溫馨與甜蜜。
逛夠食夠，
就去電影院挑一場戲睇。
我將外套披上阿欣脆弱既身驅，
然後攬住佢條腰，盡量將距離拉近一點一點再一點。
黑幕下既影院，
佢雙眼依然似電影屏幕般明亮，醉人。
每當佢發現我定神望佢時，
佢都會定定凝望返我，
大家雙眼就化為對方既電影屏幕一樣，
各自交流住大家對大家既愛，
係一齣無聲既默劇。
阿欣：點呀，傻佬？
你買飛入黎望我，定睇戲先。
我：如果買飛可以一直望住你，
咁我願意一世都買。
甜甜既眼神，甜甜既微笑，
我地係電影院播放既時候，
不自覺親吻起黎。
我地幾乎日日都出去，
日日由中午相處到夜晚，
每日都相愛夠十小時。
每晚送到佢家門口外，
送到連管理員都認得我。
每次都係佢屋企門外吻別夠，
相擁夠，先捨得比佢拎起鎖匙開門入屋。
我地到過宜家傢俬，
一齊幻想過我地將來既新居究竟應該點樣佈置，
一齊花心思過挑選家具，
由梳化，衣櫃，大床，書台，飯桌，書櫃，廚櫃，
到碗碗碟碟枱燈擺設，一絲不苟。
阿欣：我呢，第時我要我地屋企需要大大張雙人床。
我：哈，要咁大做咩？
阿欣：我要攬住你一路碌落床。
我瞇瞇嘴：傻瓜。
果時既我，一直都憧憬住未來既生活究竟係點。
只知道，佢，係令我想快ｄ變成大人
以及將大家塑造既新居現實化既原因。
我恨不得可以快ｄ讀完書，快ｄ賺錢而去同佢一齊生活。
餘下既日子，
我地生活亦離不開運動。
一齊打過羽毛球，打過乒乓球，睇住個波兩邊走。
亦相約過踩單車，
由沙田慢慢踩入大尾督篤，
兩人將愛化成一滴又一滴既汗水，
用力踩著踏腳係愛情公路上一同前進。
踩到攰了，倦了，
我地就坐埋一旁休息，
拎紙巾幫佢抹抹身上既汗水，
飲埋同一樽寶礦力。
一邊欣賞住日落斜暉既海景，
一邊背靠背依偎大家，
默默渡過仲夏壯麗既晚霞。
仲記得，還過單車後，
我地拖住手，一路走到城門河邊，
欣賞一下果邊既夜色。
城門河我並唔係成日去，
感覺好新鮮。
果一晚，走近河邊，
心境寧靜得很，
整個人就好似被拋身係沉寂既太空中。
夜晚比日照感覺舒服好多，
風既溫度正好適中，
頻率亦恰到好處。
聽住樹葉有節奏搖曳著，
加上對岸既萬家燈火，
令到氣氛更加浪漫一點。
係蟲鳴既陪伴下，
阿欣望住我：
樂，要清楚了解一個人，
其實真係同食橙冇咩分別。
我聽到後有ｄ好奇：哦？點解咁講？
阿欣：正如我識你一樣。
首先識既係最表面既你，
初時就覺得你份人傻傻更更，斯斯文文咁，
同埋覺得你有時真係好蠢，特別係數學上。
佢繼續話：其後識耐左，
就覺得你對人好好，好關心人，好幫朋友，
夠真誠。
我唔好意思咁話：我都唔知自己原來有咁多優點．．
佢：直至而家，而家一齊過後，
更加發現你對人細心，溫柔，體貼。
然後微微笑話：咁唔係好似食橙咁咩？
首先要搣左最外層果皮，
然後食到果肉，最後就係最核心既種子。
佢呢個比喻，倒令我覺得有趣。
我回應：其實呢，到要愛一個人既時候，係剛剛相反。
阿欣：嗯？點解既？
我：你認識到最內層之後，
就要用返粒核，埋係泥土，
每日花時間澆水，吸收陽光，
呢段愛情先能夠開花，能夠結果。
道理同愛一個人一樣，
要有結果，要嚐到愛情果實既甜蜜，
大家都要花心機澆水啊。
阿欣：嘻，你份人都幾有趣喎，咁都可以掉返轉諗。
佢有點茫然咁話：剩底日子唔多啦，聽日做咩好？
我諗左好一陣，然後話：想遠離一點市區，過二人獨處既世界嗎？
佢點點頭。
我：我地聽日就去。
熟睡當中，
手提電話係耳邊響起。
朦朦朧朧底下我一手拎過電話就話：
訓緊覺呀！有咩事留返拜山先講啦！
然後，我掛了線。
無幾耐，幾分鐘後，電話又再響起。
老老豆豆，我就最憎人嘈我訓覺既，
正當我想拎起電話屌鳩佢果時，
耳邊聽筒傳黎一陣大叫聲：
喂～～～～～～！！！！
把聲尖到我突然咩睡意都冇晒，
我：作死咩．．喊驚咁．．
阿欣：作死你就真呀！一大朝早咁無禮貌！
我：哈哈，我唔知係你黎呀麻．．
阿欣：藉口就藉口啦，懶訓樂起身啦！
我：尋晚搞到好攰呀，比我訓多陣啦。
阿欣：哦！你尋晚搞咩黎，快ｄ從實招來！
我：我尋晚打左幾次．．．．
我都未講完，阿欣又大叫：呀～～～！！唔聽你ｄ咸濕野呀！
我：．．．．我都未講完．．我話我打左幾次拳得唔得先？
阿欣：你會打拳架咩？
我：唔會．．
阿欣：超，咁咪係囉，仲話唔係講咸濕野！
我：咁我繼續訓啦．．
阿欣：喂，死人樂，你又話應承我帶我出去，
而家又唔制！你係咪男人黎架！
我：而家幾點？
阿欣：十二點啦中午。
我：嗯。
阿欣：嗯你個頭呀！你係咪尋晚食甜品食short左！？
快ｄ同我起身。
我：你過黎叫我起身啦．．
阿欣：哼！你當我係咩呀，呼之則來揮之則去呀！
我：我當你係我既白馬王子，而家白雪公主要你錫先起到身架。
阿欣：哈哈，又掉轉黎講都有。
快ｄ啦，唔好扮抵ｂ仔啦！
我：係既係既。
其實你點都要過一過黎先架啦，
我有野想同你做左先去，
況且我呢度去近過你果邊。
阿欣：有咩同我做呀？
我：過到黎咪知囉．．
阿欣：唔會係變態野呀？
我：係呀，我已經買定左長鞭係屋企等你。
阿欣：哈哈．．！
拿你講架，我而家過黎睇。
我：．．．．．（果刻我極度懷疑佢係好變態野既女仔）
我：惠康等。
起身梳洗，
食個面包，飲杯牛奶後，
就拿拿林去超市門口等佢。
見到佢後，
佢就行埋黎撓過我手臂：
樂，今日去邊呀？
我同佢一路行入超市，
一路話：嗯，你話想過二人世界呀嘛。
我地今晚入石澳睇星。
阿欣聽完之後，好開心咁話：
好喎，我咁大個女都未試過睇星架，
果度睇倒架咩？
我：唔知架，今日個天都算清，應該ｏｋ既。
天上有冇星星冇咩所謂啦，最緊要既，
你永遠係我眼入面最燦爛果粒咪得囉。
阿欣有點難為情：口甜舌滑呀有人，
嘻，唔知醜。
佢繼續話：係呢，咁而家我地要做咩？
我：我諗住夜晚同你食燭光晚餐嘛。
阿欣：燭光晚餐？咁咪好貴囉？
唔好咁破費啦。
我搖搖頭：我地唔係去餐廳食。
阿欣：咁去邊度食？
我：我諗過架啦，我去地野餐，一黎平好多，
二黎我地可以一路睇住個夜空，
三黎又唔會有人趕我地走呀麻，食完慢慢坐。
咁而家呢，我地就煮定ｄ野食，然後放入飯盒入面，
一陣就帶過去食。
阿欣：嗯嗯，一於咁話啦。
估唔到你傻下傻下，都有ｄ計仔喎。
我：有心就得啦。
然後，我地就係超市買左ｄ日本醋，
紫菜，蟹柳，青瓜等壽司材料，買左一包黑椒雞翼，
洋蔥豬扒，幾罐可樂，幾包薯片等。
比完晒錢後，
阿欣眼仔碌碌咁問我：樂，駛唔駛買爉燭？
我：嘻，我屋企有呀，仲有埋枱紙墊野食添。
阿欣雀躍咁話：哦，好細心喎，咁快ｄ返去煮啦。
阿欣一入門口，
就用鬼馬既口吻問我：樂，又話有長鞭既？
我：嗯．．．長鞭呢．．
長鞭就同我不可分離既．．．
阿欣係我身上摸一摸褲袋：
邊度有呀。
然後我冇回應佢，只係望住佢，
佢靜左落黎諗一諗，get倒我指咩野，然後大笑住話：
哈哈，阿樂你真係好cheap！我未見過人兜個圈咁讚自己囉。
我：哈哈，承讓承讓！
然後佢拍一拍我pat pat，
同我講話快ｄ一齊煮。
我地首先係整左壽司先既，
因為考慮到整完仲要拎去雪櫃雪一雪。
所以我地就分好工，洗米煮飯，
然後落壽司醋，大家一齊用手去搓，
互相餵大家試味，再將蟹柳果ｄ放入去，
整成屬於大家既結晶品。
然後將剩餘既飯，
整熟ｄ雞翼同豬扒後就放入飯盒裡面。
過程之中發覺，
情侶之間一齊煮野食實在好有意思。
一路整既時候，
大家整蠱下大家，
將ｄ壽司飯整落大家塊面度，
有趣得不得了。
無論整既過程，或者到完成果一刻，
都有一份奇妙般既甜蜜感，
一直慢慢咁蘊釀著，畢竟大家都有將愛注入食物裡面。
呢一切一切，都比出街食好得多。
但當自己一個既時候，
每每煮一次，卻有著強烈既反差，
果時我只感受到一種落寞感，
我亦害怕呢種感受。
一切都準備好後，
我地亦正式出發去石澳。
兩人依舊拖住手，糖痴豆，
乘過地鐵，坐過小巴。
正灘比較多人，
我地都想有多一點私人空間，
所以大家都同意去後灘果度比較好。
我地從落車慢慢步行過去，
不消十數分鐘已經到達。
果時已達黃昏，晚霞將至，
石澳遠離煩囂，東邊一遍綠蔭，
環境怡人，空氣清新。
黃昏淡黃而親切既光線下，
更為呢度添上幾份美感。
加上日落配美人，
係我眼底裡就只有眼前既阿欣。
我地踏著細碎既腳步，
步入後灘。
果然，呢度人真係唔多，
因為冇救生員冇沖身地點，
ｄ人就更加唔會係度游水。
阿欣撓過我，
同我一齊沿海岸邊，
一路聽住海浪起伏有序既聲音，
邊感受迎面而黎既海風。
斜陽光線為阿欣既面孔包上一屠光膜，
我時而放眼遠望美不勝收既海景，
時而收近焦距望住呢一位甜美頤人既可人兒，
實在令我目不暇給。
彷彿呢個世界裡，只有我同阿欣共存一樣。
有時我會不其然，
呆呆咁怔住，靜靜咁望住阿欣，
望住佢帶點茫然既雙瞳，
望住微帶誘惑既雙唇，
望住白晢透紅既肌膚，
以及一直係空氣中迴盪既髮香，
就好似一位不食人間煙火既天使。
因為我知道，時間再唔容許我有太多機會
可以將佢個樣牢牢咁烙印係腦海入面。
我知道，腦海始終唔及相機，
快門過後印象會無限期地清晰保留。
我亦知道，記憶會因為時間而磨滅，
阿欣既面孔會一日比一日褪色，
就好似舊膠卷菲林曝於光線中一樣，
最後化作一團空白。
我望住天空幾縷如煙般既白雲，
不禁心入面產生一股茫然。
我地係沙灘上留過足印，
四人既足印，愛過既證明。
不久，我回望既時候，
已被海水漸漸帶走。
果時我心諗：
我地愛過既痕跡，都會因為時間被沖走得一乾二淨嗎？
我的確很用心去愛，很勇敢去愛，很筆直去愛。
妳，知道嗎？真的知道嗎？
阿欣同我並肩而走，
我留意佢既步伐同我係一致。
我：我覺得呢．．
阿欣：嗯？
我：拍拖就好似兩個人玩二人三足一樣，
要好似我地而家咁，兩個人步伐要一致先可以順利去到終點。
如果一個人走得快ｄ，又或者一個人走得慢ｄ，
就會大家一齊跌倒，兩方一齊受到傷害．．
阿欣：咁阿樂你覺得，我地到最後會唔會受到傷害？
我：嗯，呢樣我真係唔清楚。
不過至少，我會記得我曾經同天使一齊相愛過。
佢聽完之後，就係後面攬住我。
我停低腳步，默默咁感受住佢雙手帶黎既觸感。
呢種夢幻般既電流感，心跳感，
或許再過多一個星期後就冇機會再感受到。
大局已定，即使一星期後，事情都唔會有轉機，
除非所有航空公司倒閉。
我微微笑：快ｄ鋪枱墊搵個位食野啦，
你應該都肚餓。
我地是但搵左個位，坐低。
天色已暗，果度燈火稀少，
將野食拎出黎後，
我點上爉燭放左幾個係枱墊上。
（果ｄ爉燭係類似宜家傢俬有底下有蓋果種，唔見爉滴出黎）
並係枱墊前方少少位置，
用爉燭圍上心心，中間寫住我同佢個名。
燭光既閃爍下，
浪漫感亦倍增唔少，
而阿欣佢就甜甜咁望住心心良久。
我開左兩罐可樂，
然後話：cheers！
阿欣：cheers！呢度既夜景真係好舒服。
我：嗯，簡直想係度訓埋添。
阿欣：係呢，不如下一兩日約阿力amy出黎囉，
仲有一個星期就要走。
講完之後，佢好似一隻小貓咁挨住我。
我：當然好啦，佢地一定好唔捨得你。
阿欣：嗯，我都好唔捨得你地。
時間愈少，個心就愈驚，愈有ｄ唔舒服。
我：唔好諗咁多呢ｄ啦，
難得今日個天咁清。
食緊野既途中，阿欣忽然同我講左一句說話．．．
阿欣忽然同我講左一句：
樂，如果．．
我：如果咩野？
佢：如果我去到美國之後，
你遇到心儀既女仔，
你一定要去拍拖啊知嗎？
千祈唔好．．唔好傻傻咁等我。
要把握住每一段適合你自己既愛情。
我聽完之後，冇出聲。
縱然我知道表面上係一份租約，
但我心入面早已經唔係一份租約，
而係一條緊緊連繫住兩個心既紅繩。
我知道我唔可以輕易再交個心出黎比第二個住，
我亦唔想。
我未試過異地戀，
但我知道冇咩可能維繫，
縱然我心底暗處一直期待住
可能我同阿欣係例外既一對都唔定。
阿欣：阿樂．．．
我：你愛我嗎？
阿欣有ｄ眼濕濕：
愛，非常之愛。
我：你相信緣份嗎？
如果有緣既，我地始終能夠一齊。
縱然擺明係一條兜兜轉轉既路，
但我相信最終可以殊途同歸。
我微微笑話：笑下啦，唔好苦瓜乾咁。
果一刻，我知道自己唔可以係阿欣面前脆弱，
我只係想佢放開懷抱面對黎緊面臨既一切。
食完野，稍稍清理現場後，
我就訓係阿欣大髀上面，
一路睇住漆黑既夜空。
阿欣：阿樂，真係見到星星啊，
真係好靚。
我：嗯，估唔到係香港都可以望到咁靚既星星。
阿欣：你睇下果粒，好光啊，見唔見到？
我：見到啊！
阿欣：點解星星之間都會保持住一定既距離既？
唔會兩個痴埋一齊。
比阿欣咁講，我倒冇諗過星星點解會保持一定既距離。
我：係喎，你唔講我都唔會去留意。
可能每一粒星星都有佢想守護既人，想守護既區域，
保持距離可以令被守護既人都清楚睇倒，唔會混淆。
我繼續話：我相信，一定有一粒星星係守護住我同你。
阿欣：嗯，可能我係美國見到既星星，同你香港望到既係同一粒呢。
我：嘻，有可能有可能！
阿欣：不過呢，計我話，
我最大既守護星，在係係我身邊既阿樂。
然後佢就烏低少少身攬住我。
我：你都係我既守護天使啊。
之後，
我地都默默沉醉地，
沐浴係星海之中。
望住夜空一點點星光，
一點點餘暉，就好似話我知，
我地既愛情已經達到最光最亮既位置。
冇人會知道呢一顆星星，
到最後會唔會殞落，
我亦無辦法清楚。
或者到最後，
呢一顆星星，會一直指引著我，
一直帶領住我，令我同阿欣再重遇都未定。
我地一直默默咁，係果度聽住海風，聽住海浪，
直到近夜晚十一點，我地再次係星光既守護下離開。
暑假放左咁耐，
都冇咩點見過同班既好友，
真係名副其實既有異性冇人性。
我早一日已經約左ａｍｙ同阿力，
大家夜晚食餐飯聚一聚舊。
值得一提既係，其實佢地唔知道我同阿欣拍拖，
亦唔知道阿欣佢月尾就走，所以我地打算比個驚喜佢地，
同埋想知道佢地既反應係點。
晚餐我地想食耐一ｄ，
所以就揀左去食火鍋。
到現時為止，一班人聚舊始終都係食火鍋個feel最正，
大家圍埋一齊淥野食，一齊舉杯暢飲既感覺真係無得比。
阿欣佢同媽咪有ｄ野要做，
所以叫我自己去先，無耐佢就會過黎join我地。
咁多日都同阿欣一齊出街，一齊坐車，
突然冇左佢陪伴底下，
心裡總係有一ｄ唔自然。
我就一個人聽住音樂，去到旺角。
地鐵站一如既往地人來人往。
我去到既時候，佢地仲未黎到。
突如其來既震動，原來係有短訊，係阿欣。
佢話：我就快搞掂架啦，你地拎左位先啦。
我就忍唔住回覆佢一句：快ｄ過黎，我好掛住你。
阿欣接著：有幾掛先？
我：連內臟都掛晒出黎啦．．．
阿欣：咦！好核突呀你。
我都好掛住你呀，
我一搞掂就會飛身撲去你度架啦。好快好快！
我正想再打短訊過去時，
有人已經撲過黎搭住我膊頭．．．．
阿力：喂！死仔成個暑假唔見人，叫你打波又唔去。
而家仲捉唔到你！打短訊比邊個呀？
我：屌，又關你事喎。
阿力：先屌我即係冇晒事啦！
自從你散左之後，好耐都冇咁屌過我。
我：哈，說話就唔好亂講呀，
我地冇可能架啦。
阿力：係囉！成個人開心返就好啦！
遲下多ｄ一齊出黎啦！
我有點無奈咁話：嗯．．我相信以後會多ｄ時間．．．
阿力：拿！你話架！約實你啦！死仔唔好又唔出黎！
我：得啦！有撚排啦。
阿力：喂！冇見你一排好似又高左咁既，
咁唔撚係路喎！我日日打波都高唔過你。
我：哈哈，你冇得再發育架啦！
你操得太行！你打波勁左咁多，一定溝唔少女啦？
阿力：邊有呀！波場得阿伯睇我，旗都扯唔起啦。
行啦，我地去攞位先。
我：唔等埋amy？
阿力：佢要遲一陣呀。
阿欣呢？
我：佢都要遲一陣．．．．
阿力：屌，搞埋ｄ女仔咁鍾意遲到，
唔通同一日黎m？
我：我幫你一陣問下amy。
見返好朋友既感覺真係好，
一黎就有好多話題可以講，
心情亦輕鬆唔少。
冇阿欣陪住既時候，
只要有佢地，我諗日子應該會好過一點吧！
嗯，惟有咁樣安慰自己好了。
我地去到之後，拎埋位，
入去坐低左，順便睇下餐單有咩野食，
同埋叫咩湯底。
阿力：喂，阿樂，食唔食麻辣湯底？
我考慮到阿欣同amy兩個女仔，然後話：
唔好啦，佢地未必食得辣，叫普通湯底算。
阿力：wow，好識為人著想喎。
我：屌你．．
正當我專心睇緊有咩食果陣，
突然間．．．
突然又有人從後大力拍我膊頭，
嚇到我成個人彈左起身。
Amy：哈哈，仲嚇唔倒你！
我：頂你amy，冇見一排又肥左喎！
佢聽到我咁講即刻搣鳩我手臂，
力度比阿欣差好幾倍．．．
Amy：你話你係咪犯賤，咁耐冇見都要比我打下先安樂！
我：駛唔駛加多張凳比你座呀！
Amy：唔駛囉唔該！我對我既身型不知幾滿意。
我：有古代思想既觀念係好既．．．
阿力：哈哈，頂你阿樂！
你兩個真係，無論見幾多次面都會嘈交。
我：Amy，你係咪ｍ到？咁遲既？
Amy：食啦你！我過黎呢度遠呀嘛！
我：哦，唔關我事呀！係阿力關心你。
阿力：哈哈，唔好講咁多啦，快ｄ睇下有咩食啦amy！
Amy：係喎，阿欣呢？
我：佢黎緊。
Amy：嗯，可能係佢ｍ到都未定。
我：哈哈，女仔既第六感嗎？
係呢amy，你暑假做過ｄ咩黎？
Amy：冇呀，都係幫我媽咪手睇鋪。
你呢？
我：嗯，一陣話你知。
Amy：超，懶神秘咁！
阿力你唔駛講九成日日走開打波啦！
阿力：唉，唔係咁有咩做呢？
又冇女。
我：嘿，咪遠在天邊，近在眼前囉！
然後眼神直指amy。
阿力：無福消受。
我：嗯，的確，要消化係幾難．．．
Amy：喂喂，你地唔好以為我聽唔倒。
我：邊係呢，我地都唔係指緊你，
係你後面岩岩行過果個女仔咋嘛！
比Amy過完目之後，我見張餐單紙差唔多有三分二既食物
tick晒咁濟，我即刻o左咀話：嘩．．amy，你食唔食得晒架．．
Amy：咩我呀，係我地。一場黎到梗係要食多ｄ啦．．
咁我就勉為其難交張紙比阿姐啦，然後就係等食既時間。
突然間，我見到Amy向住我後方招手，我就不其然擰轉後面，
原來阿欣已經到。
Amy雀躍咁話：喂，阿欣！好耐冇見啦！
阿欣見到佢亦好開心：Amy，好耐冇見啦，見到你真係好呀！
Amy條粉人報串話：你知唔知阿樂阿力佢地幾衰呀．．．
阿欣：做咩？
Amy：佢地話你黎m搞到遲到。
果時我同阿力你眼望我眼，各自都好愕然，
屌！好似係你自己講架囉！
阿欣即刻用帶點怒氣既眼神厲一厲我，
然後坐係我旁邊，即刻又用手搣我：
係咩阿樂！咩我係因為呢個原因遲咩！
我：哈哈．．哈哈．．．
唔係唔係．．小人知錯，小人知錯。
（頂你個amy，我一定唔會比你好過）
阿欣：都話左你變態架啦，仲唔比我捉倒你痛腳！
遲ｄ你就知味道。嘻，快ｄ揀野食啦！
我心諗：又會態度變得咁快，真係女人心，海底針．．．
阿力：喂，你地好似好親暱咁喎！
Amy：係呢，我岩岩都想講！
我同阿欣互相對望住．．
然後就向大家宣怖結果．．．
佢地兩個都同一時間大大聲反應：
咩話！你地拍緊拖！？
我：Er...哈哈．．係呀．．
阿力即刻撲過黎撓住我條頸：
頂你個死仔！原來成個暑假唔出黎就係度溝女！
你都對得我地住啦！
Amy都搖搖頭嘆嘆氣：阿欣，我真係唔明，你咁靚，
點會揀左呢件狗頭架！真係晒晒！
阿力：係囉，真係晒晒！
阿欣：哈哈，唔係呀！阿樂佢幾錫我架。
我即刻得戚：聽到未呀amy！
Amy：見到你個得戚樣就想打你！
阿欣：不過呢，今次約大家出黎，仲有另一樣野想講架。
然後，阿欣望一望我，眼神帶點恍惚，欲言又止。
果時，我就捉緊佢左手，比勇氣佢，支持佢。
阿欣：我呢，八月底就會移民過美國啦．．
講完之後，阿力同amy個樣都好驚訝，
佢地既眼神話我知道，佢地唔敢相信呢個係現實咁。
阿欣有ｄ失落話：
所以呢．．今次應該係我最後一次．．見你地．．
繼續又保持返微笑話：
今晚我地要開心ｄ，唔好因為呢件事搞到咩氣氛都冇晒，
當幫我送行好嗎？
阿力：當然好啦．．只係我地都會好唔捨得你．．．
阿欣：嗯，我都非常唔捨得你地呢！
一有機會既話，希望可以返黎香港探大家。
Amy：好呀，我地幾時都歡迎你架！
咁但係．．你走左．．阿樂咪．．
Amy道出左故事既重點同難題，
呢一個問題即使係我地，到而家都未能夠
有一個完美既解決方法。
又或者，愛情上根本係無完美既，我只能夠無奈嘆息，
卻毫無還擊之力。
阿欣：嗯，我地都未有實質既答案呢．．
我唔想再令阿欣難做：嘿，今日既主角唔係我地，係阿欣先岩。
就開開心心幫佢好好慶祝啦！你睇下，
野食到啦！快ｄ淥野食啦！
然後，我地就開始食野。
我食火鍋最鍾意就係飲可樂，
唔知點解特別match，唔知有冇巴打一樣呢？
一路食，我地就一路傾下大家既近況，
中學既趣事，我同阿欣既感情生活等等．．
大家都樂此不疲，興之所至。
講到中學趣事時，大家都傾得哈哈大笑，
講下老師既花名，老師既壞話，中史堂出貓事件，
bio堂不省人士事件，上堂偷食，睇咸濕小說，全校何仔公等等。
簡直亂柒咁黎到不得了，不過就係因為有呢ｄ生活，先叫多姿多彩。
中學一定要一班人on鳩鳩咁先好玩！
阿欣聽得入神：真係好懷念之前中學返學既日子啊！
去到果邊應該唔會好似而家咁開心。
你地呢班同學都好似幾盞鬼，如果我可以
遲兩年出世，同你地一班就好啦！