有一晚一個來電外傳: 最終章 - 離別
餘暉散盡，剩下只有回憶，只有接受。
長洲兩日一夜，我地既感情跨越一大步，
將感覺好不容易推到另一個層次。
呢一段愛情，對我黎講，
本應該有著前所未有既憧憬，未來。
相愛過後，我的確覺得我同阿欣係比較合得黎既一對。
第一段愛，最為青澀，最為童話。
第二段愛，最為觸動，最為踏實。
戀夏四十日，
令我地來得及珍惜對方，
卻來不及深愛對方。
上天點解成日要比考驗我？
第一段愛既考驗，
我毫無防備，毫無反擊能力被打沉，
我徹底咁輸，徹底咁沉淪。
果時，耳邊有人話鍾意我，係阿欣。
我心態未準備好，未能接受，
但心底一直慶幸著有一個女仔會主動說愛我。
而家，我準備好，我真真正正準備好。
上天卻又再比考驗我。
果時，耳邊有人話要出國，亦係阿欣。
我唔想要時，上天比我；
我想要時，上天剝奪。
呢ｄ係叫考驗，定係叫天意弄人？
對於一對出自真心，互相尊重，互相體諒既情侶，
點解仲要諸多刁難？
點解唔可以係我人生鋪下一條筆直既路？
係愛到濃時要自己忍痛割斷
當初一針一血去編織既紅繩，
真係好好玩嗎？
第二日回程既時候，
我地坐回渡輪漸漸由夢境回到現實，
夢境係美好，現實係殘酷。
船每駛近海港一點，
夢就會逐漸腐爛，
現實既紗布向我揭開。
我同阿欣吹著海風，
望著前方維多利亞港既佢，
開口話：
樂，唔知香港既維港，
日後會點變呢？
我：我係唔會講你知架．．
阿欣苦苦口面：點解呀？
我：講左比你知，你仲駛返黎睇既？
所以我係唔會講．．
我沉默左一陣，
然後語重心長咁講一句：欣，要返黎呀。
佢點點頭，向我展顏微笑。
微笑，係代表承諾，定係善意既謊言？
佢究竟，會唔會再返黎？
阿欣向我提出一個請求：
樂，不如聽日大家唔好見面。
後日你先送我機吧！
我：你怕．．？
阿欣：我想要時間去調整心態對呢一段感情。
我：你肯定咁樣係最好？
阿欣：嗯．．．
所以，今日係最後拍拖既一日。
我：只要你鍾意，我都會遷就你。
阿欣將目光移到我身上：
我知道，所以我一直都愛你。
我凝望住佢雙眼：
你呢一雙眼，你呢副笑容，
我唔知要幾多年之後先可以再見呢！
阿欣笑住話：所以今日你要好好望個夠啦。
我：咁你想去邊？最後一日拍拖。
阿欣：嗯，海旁走走好嗎？
我想多睇下尖沙咀既維港。
佢突然開口問一句：
樂，你有冇諗過，
如果我去到外國有一日發覺自己唔再愛你，
你會點樣？
我：你係指識到男朋友？
阿欣：嗯，未必識到男朋友既，
係怕感覺會隨著日子沖淡。
我每晚訓覺時，都一直諗住呢個問題。
我實在無辦法接受睇住一段濃濃既愛被日子
無聲無息去不斷稀釋，而自己到察覺時已經太遲。
我大膽地回答：
如果係咁，就有佢慢慢削弱，削弱得有幾淡得幾淡吧！
阿欣錯愕地望住我：
點解！？唔通你忍心放棄？
我搖搖頭：
唔係放棄，係我有信心再令你愛上我多一次。
如果你一直刻意保存或者停留著而家呢一份感覺，
到幾年後，大家唔多唔少都會改變，
無論性格上，或者大家既愛情觀。
若然你再用幾年後既愛情觀代入幾年前既感覺入面，
或者我對你黎講已經唔再適合。
我繼續話：要愛，就要愛當時既我，並唔係過去既我。
佢聽完之後個心亦安定落黎：
樂，我絕對相信你能夠令我再愛你多一次。
因為你對我黎講，已經係永恆。
佢甜甜咁話：
你講過架，
你講過就算老左都要照同我去拍拖。
如果你做唔到，
我一定用柺杖打到你變老人痴呆。
我：有個咁靚既阿婆陪我過人世，
真係隨時入土為安都濟呀！
阿欣：嘻，傻瓜，行啦！落船啦！
鐘樓，海旁，星光大道，文化中心，太空館等尖沙咀地標，
阿欣都一一拎起相機作為最後留念。
尖沙咀，再熟悉不過既地方。
最美既夜景，我曾經同深愛既人係度睇過。
最落寞既維港，我曾經自己一個係度逗留過。
甜蜜與苦澀，都係度經歷過。
阿欣抖動佢雙眼珠問我：
樂，你同阿紫，有黎過呢度望海嗎？
我微微點頭：嗯．．
果時．．佢就係坐緊你而家坐緊既位置。
而家係我身邊陪我再睇既，唔再係佢，而係你呢．．
阿欣挨著我膊頭：實在有ｄ不可思議啊可？
我：點解咁講？
阿欣：人類既感情真係複雜，真係多變。
美麗既景色依舊，坐係身邊既卻唔係以前深愛既一位。
唔通人類注定要不斷嘗試相愛，
然後分手去尋找一生中既真愛？
尋尋覓覓，跌跌碰碰，始終會有勞損既一日。
如果所有人一開始就可以搵到真愛，唔會開心快樂好多咩？
我望望阿欣：
如果照你咁講一開始已係真愛，我就唔可以同倒你一齊啦。
阿欣輕輕嘆息：咁又係．．
的確係我諗得太天真，太美好．．
我：並唔係呢．．
阿欣：嗯？
我：你會咁諗，係因為你經歷過太多改變，
所以先會想安定落黎，唔想將感情亂放。
阿欣撓撓我手臂：
都係你最明白我，有時連我自己都唔清楚自己想點，
好似係另一個陌生既自己主宰著思想咁，
我永遠冇辦法，冇信心去戰勝佢。
我：所以，你先成日冇安全感嘛．．
阿欣：嗯嗯。
不過有你係身邊就唔怕，因為你可以克服另一個陌生既我。
有你係度，佢就唔敢出黎打擾我啦！
我：我只係可以保護你多三十幾個鐘頭，
剩底既日子都要靠你自己呢。
阿欣：但我想一直痴住你身邊．．．
我：傻瓜，初初識你果時你唔係好堅強好惡架咩？
點解而家變成左一個痴身既小貓？
阿欣：因為有你既愛作為食糧，
我已經被你寵壞啦，
再無抵抗力去回復係大自然覓食既本能。
我只想永遠係你懷抱入面做一個小女人。
我：以你既條件，可以有更好，我只係平凡既男仔。
阿欣：平凡既你對我黎講係最好，永遠唔會出現再好。
我微微笑：我而家相信愛情真係可以使人”盲目”啦。
阿欣：嘻，一愛上你時已經盲左啦，
所以咪要痴住你囉。
食過晚飯後，
我送阿欣返到屋企樓下。
我：拐帶左你一日，
而家可以還返比你媽咪啦。
呢次，係最後一次我送你返屋企．．
阿欣攬住我好一陣，
然後係袋入面拎左張野比我：
呢一張租約，你keep住好嗎？
作為我愛過你既證明，要一直記住我啊．．
我答應佢，
跟住以最後一吻同佢道別。
昏黃既街燈，將我既影子拉得長長，
我回頭一望，身影只剩孤單一個。
阿欣臨走前一日，我地並無見面。
一整日流流長，我冇意欲出去，
只係留係間房，望住玻璃樽裡既紅豆，
望住果張租約發呆。
直至累了，我先上床稍稍休息，但冇帶比我睡意。
我試圖係枕頭上尋找阿欣既髮香，
卻找不著，氣味大概已經散盡。
我打過比阿欣，但佢無接到。
阿欣，我正在想你呢．．．
最後，我決定用我地一齊過既相片，
剪剪貼貼成一本屬於我地兩人既相簿，
每張相都寫低一ｄ感受，或者我想同佢講既說話。
然後寫上相簿名 － 短期租約，作為首尾呼應。
打過幾次比佢，都冇人聽，心入面開始擔心。
究竟你係度諗緊咩？我只想你有任何野都搵我講。
我係床上面蹍轉反側，心情久久無法安定落黎。
無幾耐，手提終於響起。
我：欣，你唔聽我電話架．．
阿欣嗚咽：樂，我做唔倒，我真係做唔倒．．
我唔可以放低你．．
一諗到聽日要離開你身邊，
離開你既愛，離開你雙手．．
眼淚就控制唔倒咁流落黎。
我：阿欣．．．
佢：我呃唔倒自己，我瞞唔過自己個心．．
離別之前原來真係最痛．．．
樂，我想要你陪呀．．我唔想自己一個．．
唔想．．．
我：好，我陪住你。
今晚我係你耳邊陪住你，
你就唔會覺得孤單，覺得難受。
唔好喊啦知嘛．．
阿欣：你而家係邊啊？
我：我係床上面訓緊囉。
阿欣：我都係床上面訓緊．．．
我：係咩，點解見你唔倒既？
阿欣：嘻，點會見到喎．．．．
我：得架，拿你只要合埋雙眼，
諗住我係你身邊，幫你蓋被，攬住你訓．．．
阿欣：就好似長洲果晚咁。
我：冇錯，就好似果一晚咁，
一直一直攬住你到天光都唔捨得放開手。
呢一晚，我同阿欣係床上面，
傾返我地由最初相識到拍拖既回憶，
直至凌晨三點幾．．
我：阿欣，你知道嗎？
一直以黎我都冇係口邊對你講出
我愛你呢三個字，係因為最初我
仲未清楚自己既感覺，但一齊拍拖
至中段日子，我就開始明白自己對你既感覺。
到而家，我更加可以有信心同你講，
阿欣，我真係好愛你．．好愛，好愛．．
我見佢冇反應，
就叫多佢幾聲：阿欣？你聽到嗎？
大概佢因為喊完，又傾左咁耐，
所以太攰唔覺意訓著左吧。
果時，我輕輕係耳筒邊講：
欣，早抖啦．．
我並冇收線，
只係將電話放係我旁邊，
陪伴佢一整晚。
送機果日，係八月份第二十五日，
我唔識就時間去機場，
所以比約定遲左十五分鐘。
去過星巴克，
送過禮物，
最後係離境大堂一直目送住阿欣離開。
阿欣既背影，再唔係我伸手可以觸及，
而係離我愈黎愈遠。
佢時不時有回頭望我，
最後一次望我時，佢對我做左一個口型，
大概係同我講：我愛你。
我握緊拳頭，握緊手心上阿欣殘留既餘溫，
忍住淚水，離開機場。
係巴士車廂中，我終於忍唔住喊左出黎。
眼淚就如一粒粒紅豆不斷落下．．．
阿欣佢已經離開左我，去美國生活。
係果個時候，我同阿欣正式步入
愛情公路上既分岔口，
我向著左走，佢向著右走。
我地無法估計幾時會再見，
或者會唔會係幾年後某一個街口重遇。
暑假最後一日，我帶著一粒紅豆，
去到阿欣屋企樓下既公園，
將佢埋左係花圃既沙堆中，
栽種著我滿滿既相思。
如果有緣份既話，
紅豆一定會發芽，
一定會茁壯，成為紅豆樹，
到時將呢一份相思送比阿欣。
開學之後，
理性強迫我適應自己一個既生活，
調整好心情面對學業。
因為美國同香港時差太大，
我同阿欣好少機會可以透過msn傾計。
一開始，一星期總有幾封email作交流，
大家交換近況，同大家講掛住大家。
日子耐左，學業開始繁忙，
email亦愈黎愈少，
兩星期幾封，數星期一封，一個月一封．．．
大概我同佢已經適應左，
開始各自既新生活了吧。
由果時開始，我地既愛正式跌到冰點，
完完整整咁冷藏著。
假期佢總係唔能夠返黎香港，
果邊要重新生活需要大量開支，
而佢要趁著假期打工賺錢交學費同生活。
雖然我心入面係失望，
因為自己真係好掛住佢，
但我亦唔能夠唔體諒佢既苦衷。
中五，面對會考，
我更加要努力去通過一生第一個關口。
陪伴我既，係一齊努力過既戰友，
同埋阿欣既打氣。
縱然溫習總係沉悶，刻苦，
但偶爾都會望一望玻璃樽裡既紅豆，
每次心入面總會甜甜的，
就好似阿欣親身整既紅豆湯圓一樣，
亦作為我溫書既動力來源。
會考關口通過，
順利升上中六，
認識到一位女仔，叫阿婷。
隨後發展成男女朋友，
係我同阿欣分開兩年幾後既下一段戀愛。
果時我係email中亦有提到我拍拖了，
阿欣回覆同我講恭喜，叫我好好去愛，
然而我知道佢心入面總會有ｄ介懷。
但大家依然係好好既密友。
我亦冇想到，我會再愛上另一個女仔。
我認為果時我同阿欣已經緣盡，
畢竟係我身邊既唔係佢，而係阿婷。
數年既感情我以為可以付託終生，
以為可以安定落黎。
點知．．原來事不如人意．．．
2011年一月開始，
因為工作非常忙碌，
大家無法成日傾電話，
返到屋企已經好夜，好攰。
我無法可以陪倒阿婷，
盡我做男朋友既責任，
我坦然係我因為掛住做野而忽略左佢，
令佢覺得佢係我心目中並唔係咁重要，
唔得到珍惜。
我心底入面其實唔係咁諗，
只係想將事情忙完先一次好好去愛，
而佢短訊上卻打上：愛也需要及時。
果時開始，就成日因為小事而嘈交，
我有時會將自己既壓抑同阿欣講，
佢都會表示體諒，支持，叫我加油。
有時聯絡唔倒阿欣，
我發覺自己既心情難以抒發，
所以把心一橫，決定到高登講故台，
寫下第一個回憶”有一晚一個來電”，
寄情於作文，令時間可以過得快一ｄ，
唔想有空間比自己亂諗野。
故事幸好有巴打支持，令我心情得以回復。
但係，到四月時，
阿婷終於忍唔住呢一段愛情，
最後同我講分手。
一貫認真對待感情既自己跌得肢離破碎，
數年既愛一夜幻滅。
我再次承受起分開既痛楚，
忍痛工作，忍痛生活。
我寄左一封email比阿欣，
同佢講我已經分手，
果時我只係想要人安一安慰，
害怕孤獨既折磨。
email發送過後既一個星期，
一個下雨天，我收到阿欣既回覆。
一開始佢一如既往地交代近況，
同埋話收到我email知我分左手，
並且講低一ｄ安慰既說話。
而將我注意力集中既一句說話係，
阿欣同我講可能會係一兩年之內返返黎香港生活。
只係一個好初步既決定，佢計劃緊。
我睇到之後，
心入面不禁驚訝，不禁難以置信起黎。
跨越八年離別既感情，
今日因為佢呢一句說話而令我再次燃起一絲絲既生機。
唔知道，相隔八年後既你，會變成點呢？
依然係長頭髮？依然係咁少女嗎？
我地最終，能夠走埋一齊嗎？
能夠係香港再次重遇嗎？
能夠再令你愛我嗎？
心底暗處一直冰封著既感情，
因為呢一封email，就好似解除左長年既封印一樣，
溫度開始慢慢，慢慢咁上升返，
等待融解既一日。
第二次傷痛，阿欣會唔會作第二次拯救？
呢個故事，我只能以"待續"作結，
事以至此，我亦無辦法清楚我同阿欣最後既結果。
一至兩年後，約定會否是約定，還是失約？
租約，能夠繼續嗎？
我實在唔知道，只能等阿欣繼續編寫落去。
我望住窗外陰霾細雨，
瞬間卻化作一顆又一顆既紅豆，
腦裡面不斷回憶住我同阿欣既殘片，
心裡不禁想起幾句說話：
新月曲如眉，未有團圞意
紅豆不堪看，滿眼相思淚
終日劈桃穰，人在心兒裏
兩朵隔牆花，早晚成連理...
最終章 ”待續”
各位，呢個故事正正式式係呢度完結，
多謝巴打一直以黎既支持，
希望我同阿欣既故事，
可以再次係度繼續。
各位有咩感受可以不妨係度講一講，
我盡力回應大家。