無品神探: 第九節

巴黎皇后酒店，近凌晨，大堂Wifi好極，啲人都需要瞓覺。而家大堂開始少人。
 
接待員無所事事執緊野，跟住拎起身個電話。佢一路打電話，一路偷偷地望過去岑世英同阿強度。岑世英同阿強望都冇望過接待員，只係低頭禁手機。
 
「唔好望呀，專心啲望手機，做低頭族。」岑世英望住部手機，同佢保鑣講。
 
阿強應：「哦。」
 
接待員喺度好嚴肅咁傾咗陣，岑世英佢地距離太遠，聽唔到佢講啲咩。
 




過咗陣，接待員傾完放低電話。
 
岑世英繼續喺度玩手機遊戲。
 
「大佬乜你仲玩doodle jump咁out架！」阿強「裝」岑世英部手機。
 
「挑，死靚仔唔識野。仲有，呢隻係新出架。」岑世英睥咗阿強一下。阿強只係笑笑口。
 
過咗十分鐘之後。
 




「行。」岑世英突然收好手機，起身講。
 
「去邊？」阿強有啲疑惑。
 
「中國大使館。」
 
*************************************************************************
 
尋日。和實集團會面室。
 




「有關陳耀華嘅野？幾有趣，講黎聽下。」岑世英開咗罐可樂，啜咗啖。
 
「我無意中聽到…陳生同第個人講嘅野，關於廖生…」Cindy講。
 
岑世英點點頭，冇出聲。
 
「呢件事係我喺廖生失蹤之前聽到嘅。嗰晚我本身經已收咗工，但因為我要趕一個project嘅文件留低咗喺公司，所以我又折返番公司拎野。」Cindy繼續。
 
「當時公司已經黑曬，我都以為啲人走曬。點知我又見到有間房仲著住燈，我有啲奇怪，雖然有啲驚，但最後我都行去睇咩事。行到過去，我見到有人喺陳生嘅辦公室傾野。」
 
「係陳耀華？」岑世英插嘴問。
 
「我見到兩個人，但我唔敢行入去。我聽到陳生把聲，同另一個唔知係邊個嘅男人，男人話：『個plan就係咁，我地等你支笛。』跟住陳生話『好！好快條友就畀我砌到一棟都冇，連CEO都冇得做！等佢收咗皮之後，大家都有獎賞。』跟住兩個人喺度大笑。」Cindy繼續講。
 
「跟住呢？」岑世英咬住支吸管。




 
「跟住我就走咗。我覺得呢啲野我唔應該知道得太多。我…我其實唔應該聽到呢啲…」Cindy咬咗咬嘴唇。
 
「唔，咁即係陳耀華同廖家豪嘅關係冇佢講咁好，仲密謀要對付佢？可唔可以咁講？」岑世英問。
 
Cindy點點頭。
 
「仲有。」岑世英突然講，個樣好嚴肅。
 
「唔？」Cindy個樣有啲疑惑。
 
「見你仲係咁緊張咁樣，不如等下一齊食個飯，認真討論一下？」
 
Cindy聽到滿面通紅。
 




*************************************************************************
 
凌晨三點。巴黎。中國駐法國大使館。
 
「準備好未？」岑世英問。
 
「準備好，大佬。做乜我又戴黑巾，又戴黑面罩，好似著到成個恐怖分子咁喎？」阿強望住自己問。
 
「就係要你似恐怖分子！我地黎製造混亂，然後乘亂入大使館。法國呢幾年有恐襲，等下製造假恐襲應該唔難搞。。」岑世英冇換裝，仲係著西裝，只係準備咗個防毒面罩。
 
「哦。咁點解黎呢度查？」阿強又問。
 
「頭先我地問完人，人地即刻打電話黎呢度。」岑世英見到佢保鑣疑惑個樣，又解釋，「你走開咗跟條法國佬個陣，我放咗個鏡頭喺個度。影低佢打嘅號碼。雖然我唔明法文，但知道號碼都夠。」
 
阿強舉個大姆指讚：「大佬今次幾醒喎！」




 
「一向都醒。」岑世英拎住個大背囊，講：「等下你電話一響，即刻講我教你嗰句野，掉個袋入大使館門口。掉完之後打電話通知我，搵個位燒咗套衫，然後返酒店等我消息。OK?」
 
************************************************************************
 
香港。晚上九點。關氏豪宅睡房。
 
Veronica喺睡房，啱啱沖完涼返房。部iPhone震咗震，好似有訊息，但佢拎緊個風筒吹頭，完全冇留意到。有用風筒啲人都知，風筒嘅聲唔算細。
 
*************************************************************************
 
中國駐法國大使館分三層，外面古雅，似法國舊式浪漫風格嘅建築。
 
阿強呢身裝束成個恐怖分子咁，雖然引人注目，但正如人地所講： “No one will see you if there is no one to see you.”街上面根本冇人，所以亦冇人去注目。佢好大聲咁大嗌岑世英教佢嗰句野： “Allahu akbar！” （真主萬歲），然後掉個大背囊入大使館門口。
 




個背囊掉到入去，即刻噴射出一陣陣霧氣，然後上面個計時器開始計時。
 
本身平靜嘅中國大使館即刻變得唔平靜，傳出一陣陣人聲。「媽的！快走！快走！」「有恐怖分子！」「有炸彈！」「從後門走！」入面炒到一鍋粥咁。
 
阿強見任務達成，即刻打電話畀岑世英。打完之後，佢即刻跑離呢個大使區。
 
*************************************************************************
 
關氏豪宅睡房。
 
Veronica吹完頭，突然見到手機有岑世英whatsapp：「關小姐，請幫手翻譯電話錄音。見字速覆，岑世英。」 附上嘅係阿強跟蹤皇后酒店個接待員而偷錄到嘅電話內容。
 
Veronica拎起部iPhone聽個錄音。
「吓？姓廖嘅男人？係咪講緊Derek？」Veronica聽完段錄音嚇咗跳。但佢好快回復鎮定，用whatsapp覆：「岑生，段錄音講『中國大使館已經將姓廖個男人送番香港。』。指嘅係咪Derek？關芷怡」
 
佢嘗試打whatsapp電話畀岑世英，但佢冇接聽。
 
「聽電話啦，點解唔聽電話！」Veronica有啲急，佢好想知道，段錄音講緊邊個。
 
*************************************************************************
 
「嗚嗚嗚嗚——」
 
大使區警笛響起，冇幾耐法國警察就會黎到。