皇后酒店門口。
 
焦急萬分嘅阿強來回踱步,喺度等佢大佬返。
 
「吓…吓…吓…」
 
一個男人喘曬氣,慢慢跑過黎,跑到阿強面前停落黎,繼續喘氣。
 
阿強一睇,正正喺岑世英,不過由原本嘅灰色老西變咗套名貴野。
 




阿強睇到笑咗,問:「喂,做乜包到成個粽咁?」
 
岑世英睥咗阿強一眼,喘緊氣,抦唔到阿強。佢個身型明顯比平日大咗一圈,似乎著咗幾套衫。
 
「我要拎番啲證物返黎。」岑世英喘咗一陣氣先講到野。「但最出面要著番一套職員嘅衫,唔係好易畀人認到。好撚熱。」
 
佢一路講,一路除咗最長面嗰套西裝,露出入面嗰套老西,係廖家豪嗰套。岑世英為咗保護證物,入面又換咗件裇衫,有幾熱可想而知。佢一路除到最入面件裇衫,將換出嘅兩件交畀阿強。
 
阿強接過兩件衫,問:「大佬,頭先我走嗰陣已經聽到好多警車聲啦喎,班差佬冇見到你咩?」
 




岑世英喺條褲拎支煙出黎,點著咗食一啖,呼口煙出黎。佢瞇埋眼講:「有。」
 
呢個時候,已經接近天光,個天開始變到魚肚咁白。
 
佢開始講:「嗰時度門一下畀人踢開咗…」
 
*************************************************************************
 
「彭!」「服務器房」度門一下畀人踢開咗。
 




兩個全身武裝嘅法國警察緊接入黎,荷槍實彈、高度警惕。
 
佢地帶住防毒面罩,掃視間房,用嘅係瞄準器唔係肉眼。
 
一入「服務器房」係幾台電腦同一堆雜七雜八嘅文件,但呢間房唔止得一間房,反而似一個大堂,通向更入面嘅房。
 
現埸好似有人聲。
 
兩個法國警察向對方打個眼色,點點頭。
 
「颼」一聲。佢地持槍衝到「服務器房」中間。
 
只見到一個職員瞓咗喺地,只可以慢慢咁郁。職員嘴唇微微移動:“Help…me…”(救…我…)
 
法國警察唔敢大意,佢地慢慢移到個職員面前。一個繼續用槍對住個職員,一個烏低身睇個職員嘅傷勢。見到佢喺中國人樣,兩個警察斟咗幾句,之後其中一個警察將一個面罩畀咗個職員。




 
個職員戴咗個面罩,開始慢慢深呼吸,逐漸透順條氣。
 
“Thanks. I can walk out of here.”(唔該,我可以自己行出去。)職員對兩個警察講。
 
兩個警察又互相斟幾句,之後同個職員講:“Ok. Walk straight out of here. Don’t stay.”(直接行出去,唔好停留。)
 
職員點點頭,然後慢慢咁離開間房。兩個警察繼續巡查大使館,搵個恐怖分子。
 
不過個職員經正門而行出去之後,冇乖乖地同大使館其他人會合,而係混入人群之後消失喺大使區。
 
*************************************************************************
 
「就係咁,我一步都冇停過咁跑番黎。」岑世英講。
 




「大佬,幾驚你返唔到黎。」阿強鬆口氣。
 
「仆街!」岑世英突然好火滾咁dum咗地下一下。
 
阿強嚇到縮咗縮,問:「咩事?」一路睇岑世英係咪又想打佢。
 
岑世英一手拎住支煙,一路睇佢部手機,頭先情況危急,根本冇留意到原本關芷怡搵過佢。佢咬咬牙,講:「原來廖家豪而家根本唔喺巴黎。好彩冇戀戰,再留多陣肯定走唔到。」
 
阿強見岑世英冇打佢嘅意思,舒口氣,問:「咁佢喺邊度?」
 
「香港。」岑世英又食啖煙,講:「我地返香港。」
 
“Hey, you two Chinese?” (你地兩個係咪中國人?)
 
突然有把男聲出現,岑世英同阿強一睇,係幾個黑人,成六七個咁多。




 
岑世英又食啖煙,睥一睥班黑人,又唔理佢地。
 
頭先講野個黑人又高又大隻,見兩個人唔應佢,笑住講:“Yo it doesn’t matter. But here my friends and I need some money. And we know that Chinese are rich.” (你地係咪中國人都冇所謂。我同我幾個老友等錢洗,而我地知道中國人好有錢。)
 
“Yo Dawg!”岑世英呼一口煙出黎:“Why don’t you go fuck yourself?” (喂!不如你地收收皮啦柒頭。)
 
班黑人一個個聽到眼火爆,全部拎曬刀出黎,明顯有備而來。
 
帶頭個黑人講:“Now you gonna regret it.”  (你地今次仆街啦。)
 
*************************************************************************
 
長洲。張保仔洞,附近。
 




警察封鎖咗附近一帶。
 
一個長髮嘅男仔烏口烏面咁企喺一啲警察隔離。
 
「差人。發生過咩事?完整講一次單案。」張德明嚴肅咁講。
 
個長髮男仔一碌木咁冇反應。
 
「喂!阿sir問緊你野!」張德明燥燥地。
 
長髮男精神有啲彷彿,畀張德明嚇咗跳。
 
「係咪你報警?」張德明又問。
 
長髮男點點頭。
 
「你話你女朋友失咗蹤?」
 
長髮男又點點頭,依舊冇出聲。
 
*************************************************************************
 
五六點嘅巴黎街頭,瞓住六七個黑人喺度,一個二個畀打到一仆一碌,口腫鼻腫。
 
「大佬你冇事嘛?」阿強睇住地下瞓低嘅黑人,拍乾淨隻手。
 
「冇事。」岑世英拍拍件衫嘅塵。
 
「吔屎啦你!搶我?我有咩好搶?」岑世英對住瞓咗喺地嘅黑人又踢幾腳,然後點一支煙喺度食。
 
阿強執返頭先喺大使館拎嘅衫。
 
「大佬…我覺得我地應該返香港。」阿強突然講。
 
岑世英聽到呢句有啲驚訝,停咗停,望住阿強呢個肌肉發達、頭腦簡單嘅保鑣。望咗幾秒,佢先笑出聲:「估唔到你終於學叻,識得講啲咁嘅野。」
 
阿強冇笑到。
 
佢拎住部手機,睇住個熒幕,成個苦瓜乾咁。
 
岑世英覺得有啲奇怪:「咩事?」
 
阿強忍咗陣先講:「我…我阿媽入咗院。」