行行下街，突然撞返前度: 章節五

「但係……都咁夜啦，下次先啦。」

「咪啱囉，返你屋企瞓麻。」

「吓！」呢下嘅驚叫，吸引住街上所有人嘅注意。如果平時存在感低嘅人大可一試，但請先有被拉入青山嘅準備。

「但……之前一齊個陣，你明明唔可以唔返屋企架……」

「個陣幾歲，而家幾歲呀先生。」



「吓……我……嗯……不如下次先啦。」

「唔得呀，而家行啦！」

就係咁，我俾阿靜拖住（捉住）返我屋企。

係地鐵上面，我試圖勸服阿靜打消嚟我屋企嘅念頭，但佢完全將我嘅說話無視咗，仲話去到第一時間要探下佢最愛嘅公仔……

阿靜啊，到底你想點呀……



返到屋企，當我爸見到阿靜嘅時候，先係露出一個好驚訝嘅表情，但好快就將視線轉返去電視到。頂，而家你個仔我帶女仔返屋企，你咁冷靜嘅。

之後阿靜自己走入我間房，仲由房叫出廳問：「喂呀，隻公仔呢？」

「得，你冷靜啲先，我拎俾你。」我真係好怕我再唔拎出嚟，佢會將我間房反轉。

阿靜嘟起個嘴錫隻公仔，仲係咁問隻公仔我有冇蝦佢……嗚呀，我而家想做隻公仔呀。

「邊敢蝦你隻嘢啫，個主人咁惡！」



阿靜聽到之後，裝作好嬲咁谷起臉頰，仲即刻拎隻公仔打我，一邊打一邊話：「你講多次！邊個惡話！」

「冷靜啲先，邊個話要好好對個隻嘢架？而家仲拎佢嚟打人？冇天理呀！」下一秒，空氣中要響起我嘅哀嚎，阿靜捉住我隻手，之後咬落嚟。嗚呀～～～好痛呀……點解個個女仔都鍾意咬自己男友隻手。

男友？啊，係喎，我今日係阿靜男友……

我一手將阿靜抱入懷中，深情對望咗幾秒後，我哋嘅嘴唇不知不覺咁貼上。經歷咗10幾分鐘嘅熱吻之後，阿靜話想沖涼，但我怕屋企人亂諗，就話等佢哋瞓哂先沖。

但係呢個時候，我爸叫咗我出去。

爸：「嗱，袋住佢啦，小心啲呀。」

我一望，屌，condom？你而家當我係咩人呀？我係你個仔嚟架呀爸！！！！

我：「吓，唔洗啦，唔會用架。」



爸：「袋住冇死嘅，拎住啦，我瞓啦，你同阿靜都唔好咁夜瞓啦。」講完仲要奸笑咗下，頂，真係好邪惡呀！！

我：「你仲記得阿靜……？」

爸：「你咁大個仔，第一次帶女仔返嚟就係阿靜啦，都幾年冇見啦喎，佢都冇乜點變呀。嗱，唔好玩咁夜啦，嘈住我同你呀媽瞓呀！」

我：「嗯……」

頂，阿爸呢刻真係好比一隻魔鬼，不停咁去引誘我同阿靜……