係青山醫院做看更幾年，見盡曬香港既痴線佬: 第一章
係香港，我拼搏左十幾年，最後都係得個吉，到左30歲尾啦，都係一事無成。
係我後生既時候，姐係20幾歲啦，有個女仔跟住我，果陣我地一齊拼搏，去計劃我地將來，但係我30歲頭既時候，佢走左，跟左個有錢仔，無幾耐仲結婚。
個女仔叫chissy，我無怪過佢，怪就怪自己無能力，俾到好既生活佢，始終正係得愛情無面包，都會唔飽架嘛。
好似我呢D軟林林既人，就算好俾心機去做野，都係無用，升唔到職，上唔到位，做左咁耐都係得果雞碎咁多既人工。
應對完D開支，都儲到少少錢，但唔多囉。
係香港地呢個社會，儲到少少錢有鬼用咩，閃下個眼就唔見左啦。
咁多年感情，以為無咩野，就算個有錢仔埋身，我果陣時覺得，佢點會走得出我隻中指先得架？
但係我錯了，最尾係人地隻中指長過我，當果一日佢同我攤開黎講既時候，我先知所有野都無彎轉。
人走左唔緊要，我可以再搵既。男人最精彩既時間就係30歲頭，實好多女埋身，成熟又有金。
但我又錯了，人地只係睇你有無金，而唔係睇你成唔成熟。可惜我無金。
我將自己成幅心機放落份工度，但最尾呢？
識搞心計，惡既人就上曬份，我呢D無咩所謂，唔識心計既綿羊仔，就咁樣俾人踩住上。
到左公司既景唔好啦，資金不足，要栽員啦，佢地又唔好意思栽走我呢個老屎忽，就同我講話要減人工，佢都講到咁囉，唔通我仲唔識做咩？
「林伯，我知你為公司付出左好多，但你都知啦，公司呢排個景唔好，所以黎緊會減你既薪金，你點睇呢？」
又係呢一種官腔，算啦，社會係現實嫁啦。
「我明白公司既困境，所以我會去搵第二份工。」
「既然你明白就最好，公司會好感激你咁多年黎既犧牲。」
成班高層坐曬係我前面，呢種壓迫感都唔係講笑，我份人又做唔出D落人面，發人脾氣既事，只好將成肚氣收曬落肚。
講完我就出去執野走人，離開左我奮鬥十年既地方，但我無咩傷感，我感受到人情既冷暖。
無做野之後，我做左半年既廢青，日日無所事，靠住自己之前既錢過下日子。
都努力十幾年啦，一路由讀書開始到做野，都奮鬥左廿幾年啦，做下半年既廢青，都唔係好過份姐。
係呢半年入面，我日日都係煲劇打機，得閒叫個外賣呀，食下杯面咁。無必要都唔會出街啦，反正都無人約架啦。
但係呢一種生活真係好無營養，用黎當過渡期係無問題，但長期咁樣落去都唔係辦法架嘛。
所以我都開始搵工，睇下報紙呀，上網搵下資料。
有寄過cv出去，但好多都無回音。
咁我咪一邊做廢青一邊搵工囉，屋企家用方面，我不嬲都俾得唔多，老母話，「你有錢留返俾自己用啦，我地照顧到自己架。」
但我都係過唔到自己果關，都每個月俾錢屋企，就算依家做緊廢青，都係住屋企食屋企既。
有一日下就，我去樓下商場既M記度買lunch，返黎既時候，見到燈柱度有個街招，上面寫住「誠徵看更一名，月入＿＿K，哇，個數字我見到都嚇親，係我之前份工既兩倍。
雖然唔係好多，對比起出面，但對我黎講已經好好啦，平時洗費又唔係大，已經儲到俾依家多3倍既錢，我覺得係個機會，於是就save低左個電話。
返到屋企即刻打電話過去，話自己有興趣見工呀咁樣。
對答都好流暢，跟住我問佢，「咁係邊度返工嫁？」
佢跟手同我講左個地址，我拿拿林抄低佢啦，抄完之後我睇一睇，我正係認得屯門，後面果D我都唔知邊度黎既。
由我屋企去屯門都有一段距離，睇黎我返工有排返。
但我係做看更，只係返夜晚，放工就係朝早黎既，咁樣好似輕鬆D喎。
電話入面果個似係D經理呀咁樣，佢叫我過幾日10點返工，要同我講解下果邊既運作。
「係做D咩嫁？」咁做看更都有分好多類型既。
「咪就係看更囉，張宣傳單寫得好清楚呀。」佢既意思姐係話我on9，咁都要問。
「好啦，唔該曬。」跟住佢連byebye都無講就收左我線。
我心諗，咁鬼無禮貌既。
我果陣時唔知，呢份工係惡夢既開始。
到我果日返工，我搵左勁耐，都搵唔到係邊。
我已經提早左時間出門口，我google間野係邊啦，佢要我行成半個鐘，係山頭果邊。
我仲要係返夜晚，人生路不熟，夜媽媽係山頭搵路會驚架嘛。
於是我搭的士啦，無辦法啦，趕時間返工，唔想第一日就遲到。
如果俾多少少時間我問下人既話，我應該搵到點去既。
咁我上到的士，「司機大哥，我想去呢個地址。」跟手我將個地址遞左俾佢。
佢望一望個地址，再轉頭望一望我，用奇異既目光啤住我。
「你去果度做咩呀？」做咩咁問呢？
我又唔係未搭過的士，正常的士都唔會咁八卦啦下話？
「返工呀。」我廢事講咁多。
司機無再講野，就開左車。
一路上我好專心咁玩手機，但我越玩就覺得越奇怪。
因為我感覺到有人望住我，於是我抬起頭睇下個司機，我見到個司機係倒後鏡度望住我。
我地既視線對望左一下，係覺得奇怪嫁啦我，但係我都無理到。
但跟住佢又繼續望喎，無停到，搞咩呢心諗。
到左落車我先知咩事。
個司機同我講，「到左啦先生。」
「唔該曬司機大佬。」我俾左錢佢之後就落車。
我一落車睇，我呆左。
因為我係正青山醫院門口！
我一路都唔知我原來係要黎青山醫院返工，我以為我係做D大廈或者係屋園既看更。
點知一落到車，我第一時間諗，係咪個地址錯左呢？
我行埋去睇下「青山醫院」個牌附近有無寫地址，無喔。
咁門口出面有個亭既，應該就係看更亭，但出面係有度閘，我又睇唔清楚入面有無人。
於是我就大嗌：「有無人呀？」
我真係驚有人以為我係痴線跟手捉左我入去。
我嗌完一次就唔敢再嗌，係度等囉，唔知有無人聽到嫁。
過左一陣，無人聲，無人出黎。
做咩呀？青山放緊假呀？
「喂，有無人呀？」我細細問，真係好輕聲咁問。
因為你就咁等人黎又唔係路，大聲嗌又怕係痴線佬。
突然間，無啦啦，失驚無神，係閘門口後面彈左條友出黎，真係嚇撚死我。
「邊個呀？」話口未完，佢就拎左個電筒出黎照我，真係閃親我。
係個同我差唔多年齡層既男人，姐係呀伯。
「唔好意思呀，請問呢度係咪松觀路15號呀？」雖然我唔鋸佢咁樣對我，但我都保持住我應有既禮貌對佢。
「係呀，咩事呀？」佢依舊好唔耐煩咁同我講野。
「無，我係之前打電話求職既林生，今日係黎返工既。」我臉帶笑容，但其實佢個電筒照到我隻眼鬼死咁痛。
「係？咁你入黎啦。」佢拉開左度閘俾我入黎。
「唔該曬。」
佢帶左我入警衛室，叫我係度坐陣，佢去叫負責人過黎。
咁我就係度坐左一陣啦，事關入面有凳既，佢安排我坐，我就坐啦。
咁我就拎部手機出黎玩，我又無人搵，又點會覆到msg呀？
就係我碌下fb，ig之際，我突然間聽到有人慘叫。
係真係好慘果隻，學子華男神所形容，係生仔都無叫得咁悽厲。
夜深人靜，真係俾呢種叫聲嚇拎死，我手機都差D拎唔穩。
我以為係咪有人打交呀，強姦之類既野發生。
於是急急腳去搵返岩岩果條友。一出間警衛室，係轉角位就見到頭先果位呀伯同另一位未見過既女人。
「做咩事呀？」佢見我個樣有D唔對路。
「我岩岩聽到有人慘叫，真係好慘果隻呀，我驚佢出左D咩事。」
「咪玩啦，成日都有架啦，呢度精神病院黎架，D人無精神病都唔會黎呢度啦下話？普通醫院你就應該驚啦，呢度係青山。」個呀伯又講得幾岩喎。
「坐低啦。」個呀伯D語氣都唔方好得去邊。
「你就係林生啦，係咪？」企係佢側邊既女人開口問道。
「係呀。」佢語氣又幾好喎，睇黎都幾有學識。
「麻煩請你跟我過黎呀。」語畢，就徑自走左出去。
咁我唯有跟住佢去啦，臨出去前，我同個呀伯對望左一眼，我好似感覺到D不詳既預感。
咁我跟住佢行啦，沿途都見到D病房，但我見入面都熄曬燈，似係度瞓緊覺，咁做咩野無啦啦有人係度鳩嗌呢？
然後佢就帶到佢間房，我估啦，因為間房成間校長室咁，好大間又豪華。
我入到去，真係覺得幾豪華，牆壁掛住好多畫，又有D古董花瓶，我又唔知係真定係假既。
佢坐係佢既專屬座位度，「請坐。」佢用手指一指前面兩張凳既其中一張。
咁我都唔客氣咁坐左落黎，一坐落去，就同果個女人打左個照面。
就咁睇個女人起碼30歲尾嫁啦，但又唔算好老，可能保養得好，至少無皺紋啦，五官同輪廓都幾深，長得幾精緻，後生既時候一定係女神級。
可惜都係敵唔過歲月神偷。
佢身穿白色袍，好似D醫生咁，我估佢既職位實好高啦。
「你好，我係呢間精神病院既院長，我叫hellen。」
「你清楚自己係應聘咩職位嫁呵？」佢反問返我。
「Sure。」同一句野，用英文講，真心D呀嘛。
「岩岩你見到果位呀伯呢，佢叫權叔，佢係度返左好多年嫁啦，但因為屋企有D事，所以諗住做多陣就唔做，果陣時我地就請人，權叔都應承我地，做到我地揾到看更頂替佢既位。」佢拎起佢枱上面既水，飲左一啖，然後再繼續講。
「一陣你去搵權叔，佢會交代你應該要做D咩，交代完之後佢就會走嫁啦。」
「你有無咩問題想問？」佢都係循例咁問下我。
「如果有咩突發狀況既話，我應該點搵你，或者我應該搵邊個？」
如果D精神病人突然暴亂，我一個人頂唔住嫁喔，呢樣係我最驚既事。
「呢個問題問得好呀，你可以打我呢個電話。」佢俾左張卡片我。
「你除左可以搵我之外，你仲可以搵呀英姐，佢依家收左工，你遲D就有機會見到佢嫁啦。」
「仲有無其他問題？」佢既眼神真係好凌厲下，難怪既，如果唔係點震住D病人？
「暫時無啦，有事會再你嫁嘛。」
「咁你出返去啦，你識返出去嫁呵？」呢度都幾大下，我岩岩行入黎既時候都見到成個迷宮咁，睇黎我要花D時間去熟習呢度。
「識呀，岩岩有記住D路。」其實我都唔係記得好清楚。
「咁就好啦，自己小心D啦。」佢叮嚀我。
我沿路走返出去個看更亭，權叔坐係入面睇緊報紙。
「權叔。」我禮貌咁打聲招呼。
「過黎坐呀。」佢拍一拍佢身邊既位置。
咁我就埋去坐，係有D俾佢既氣勢嚇一嚇既，如果俾著係以前既我，可能我會淆曬青既。
係依家呀叔叔我，人生高低潮都經歷過，都無咩好怕嫁啦。
「你食唔食煙嫁？」佢放低佢手頭上既報紙，拎左包煙俾我。
「唔食嫁我，一向都無呢個習慣既。」
佢聞言，就自己拎左一支黎抽。
「你係度做呢，咩奇怪事都發生，唔好用正常既邏輯去諗呢度既事。」
佢吸一吸口煙，然後輕輕咁將煙吐出黎，
慢慢轉個頭望住我，然後語重心長咁講。
「如果唔係，變痴線果個係你。」