我地贏幾多票??五十幾票?? 

真係贏左?? 

「呀!!!!贏左啦我地!!! 」 

係我後面既阿惠突然大叫仲係咁搖我,將我拉返去現實。 

我:「暈啦暈啦唔好再搖啦! 」 



我擰轉面望下我身後既七個人,每一個人都笑到見唔到眼,有兩個都係度彈下彈下。 

唯獨一個人,同大家既反應有著極大既反差,好似頭先咁。 

相信大家都知道我係度講緊邊個,無錯就係Anna。 

不過今次佢唔再係黑口黑面,只係dup低頭喊,好似一個唔見左媽媽既細路女咁。 

我一直望住佢,視線離唔開佢。 



Sarah:「去氹下人啦阿明~ 」 

Sarah唔知幾時走左去我後面,輕輕力咁撞左我一下。 

呢個世界居然會有女仔叫自己男朋友去氹其他女仔都有既。 

不過…都係去氹下佢啦。 

我走埋去Anna前面,但佢好似睇唔到我咁繼續係度喊。 



我:「有咩好喊呀Anna姐,而家應該係值得開心架喎。」 

Anna:「阿明…我地贏左啦..」 

我:「係吖贏左啦,呢一個月辛苦你啦,所以笑下啦。」 

佢而家呢個樣令我諗返起之前佢病左個陣,又係一副弱不襟風既樣。 

Anna:「終於..贏左…」 

唉,睇唔過眼啦。 

我一下就緊緊抱住佢,抱到佢實一實。 

我:「唔好再喊啦,好多人望住架。」 



Anna:「嗯…」 

佢聽到我咁講先開始慢慢收聲。 

我:「咁先係架嘛,喊唔適合你架Anna姐。 」 

Anna:「知道啦,唔喊啦主席大人。 」 

應唔應該而家同佢講好呢…算啦都係唔好住,呢度太多人。 

秘書:「接任儀式將會於明天早會時進行,如果無乜特別事,今日既點票到此結束。」 

「再一次恭喜Knight既咁多位。」 



個學生會祕書講完就同點票既人一齊走左,票站又響起左一陣掌聲,D人就開始走。 

最後,票站只係得返九個人。 

我地Knight既八個人,仲有Ellen。 

Ellen佢坐左係地下,面無表情,目光空洞,好似死左咁。 

呢個時候,Ellie行左埋去Ellen度。

我地七個人無人敢出聲,個個都只係睇。 


雖然同佢兩個係有少少距離,但係呢度我地都可以好清楚咁聽到佢地既對話。 

Ellie:「家姐,所有野都完左啦。」 



Ellen:「唔應該會係咁架…點解會輸…明明我做左咁多野…」 

Ellie:「家姐。」 

Ellie:「我已經拉攏左咁多人,點解仲會輸..」 

「點解!點解李Uncle會撐你地!因為咁我先會輸!」 

佢咁講,我個心唔知點解痛左一下。 

我突然覺得投票比我地既人會唔會好似真係好似Ellen講既咁,係因為李氏主席撐先投我地。 

一諗到咁,個心就真係好唔舒服。 



「啪!」 

一下好響既掌摑聲突然傳出。 

Ellie:「你醒下啦好唔好!! 」 

唔只係Ellen,全部人都呆左咁望住Ellie。 

我識左Ellie咁耐,印象中未見過佢發咁大脾氣,咁大聲講野都係第一次見。 

Ellen掩住被打既半邊面,呆左咁望住Ellie。 

Ellie:「你唔好諗到所有人都係好似你咁用關係去攞到自己想要既野!」 

「李Uncle之所以支持阿明,係因為贊同佢既理念,唔係好似你咁靠Daddy係生意上既關係!」 

「點解輸左你都唔明?你以前明明唔係咁!你以前明明會為左想要既野而去努力爭取而唔係靠關係!」 

「醒下啦家姐,我想你變返以前咁呀!我鐘意既家姐唔係好似而家咁衰架!  」 

聽Ellie把聲,佢好似講到喊。 

唔知Ellen係咪接受唔到定點,Ellie講完之後就頭也不回咁跑左出去。 

最後,只剩低我地八個人。 

我:「好喇,雖然係好值得慶祝,但都唔急於一時啦,聽日接任完一次過慶祝啦,今日返去先啦大家。」 

大家對於我既提議無異議,各自歸去,我就同Sarah仲有Ellie一齊返左去。 

一入到門口,大家姐就衝左上黎撲向我。

大家姐:「點吖點吖結果係點吖阿明。」 


佢好似係問緊我野,但佢係咁塞我入佢個對巨乳入面,莫講話答佢,我幾乎連抖啖氣都做唔到。 

Sarah:「大家姐!你咁整到阿明好辛苦架! 」 

你岩呀Sarah,我係好辛苦,我好想抖氣,上下都想抖氣。 

不過,我不討厭唷。 

大家姐聽到咁之後終於肯放開我,呼,新鮮空氣。 

大家姐:「點啫結果係點呀?」 

我:「好唔小心咁贏左囉我。」 

我用一個好囂張既語氣咁講。 

大家姐:「叻仔!! 」 

佢又抱住我,我又食多次波餅,叔叔快不行了。 

之後我地好開心咁食左餐飯,但有兩個人無出現。 

Ellie同二家姐佢兩個無食到飯,選擇留係自己房。 

我好想去關心一下佢地睇下佢地咩事,特別係Ellie,但奈何我今日真係太攰。 

我食完飯就坐左係大廳既梳化,郁都唔想郁。 

Sarah,Yui坐左我左右兩邊,好似左右護法咁陪我睇電視。 

睇左唔知幾耐,我對眼好攰,好似吊左舊鉛咁。 

唔止對眼,我兩個膊頭好似被人放左兩個鉛球係上面咁。 

Sarah同Yui唔知係幾時開始就挨住我訓著左。 

我唔敢亂郁,怕會整醒佢兩個。 

慘啦聽朝會唔會連食早餐都無力架。 

我望住佢兩個訓既樣,兩個都訓得好甜好靚。 

如果有人嘈醒佢地既話我可能會殺左佢。 

「叮噹~」 

屌!邊個!我岩岩先講完! 

我好輕手咁安置好Sarah同Yui,確保無整親佢兩個,然後九秒九衝去開門。 

我唔想條友㩒第二次鐘,費事真係嘈醒佢兩個。 

不過我開門既第一個反應係:乜出面落雨咩? 

落雨既聲,我居然完全聽唔到,睇黎我太沉醉係愛情了。 

講返先,㩒鐘既人居然係Ellie,佢幾時出左去架? 

我:「幾時出左去架你?快d入黎沖涼換衫啦你成身濕哂。」 

「帶我去搵我個妹。」 

呢一刻,我先意識到,原來眼前呢個係Ellen而唔係Ellie。 

Holy shit認錯人真係好尷尬。 
我:「Sorry一時認錯人,入黎先講。 」 

佢好似接受左我既道歉,一支箭咁入左去我屋企。 

不過佢成身濕哂,個身不停滴水落地,搞到佢一入去我就要截停佢。 

我唔想佢搞到周地濕哂,所以我九秒九衝去拎毛巾比佢。 

我:「嗱,抹乾d個身帶你先去搵Ellie啦。」 

Ellen:「唔該,佢兩個係…」 

佢一邊抹自己個頭一邊指住訓係梳化上成隻死豬咁既Sarah同Yui。 

我:「你唔洗理啦,我帶你上去先。」 

Ellen:「哦..」 

沿途行去Ellie間房Ellen都無講過一句野,仲要頭dup dup,同平時係學校既佢完全相反。 

可能佢仲未接受到自己輸左呢件事啦。 

好快,我同佢就去到Ellie間房前面。 

我:「嗱呢度就係Ellie間房啦,你自己搞掂啦。」 

Ellen:「唔該你。」 

今日應該係我聽得最多唔該既一日。 

我無理到佢地兩姐妹,因為我而家仲有兩個女人要處理左先。 

雖然好唔情願,但始終都要叫醒佢地返入房訓。 

我:「起身啦你兩個爛訓豬,返入房訓啦。 」 

我一邊講一邊輕輕力咁拍佢兩個塊臉,但一D反應都無。 

唉,唯有咁做啦… 

我用公主抱抱起左Yui先,抱佢返佢房,再返去抱Sarah去佢房。 

唔好問我點解係Yui先,我得一對手,我無特別偏心邊個架。 

明明已經好攰,仲要搬多兩隻肥豬,簡直係百上加斤。 

返到去自己房個陣,我訓落張床都無一分鐘已經訓著左。