「續寫」無啦啦多左幾個家姐同阿妺: 開始

哇真係好大.. 

我無諗過學生會室會係咁大，呢度大概有三間班房咁大？ 

「咁就交俾你地啦，鎖匙同數簿係呢度，加油啦。」 

原學生會既人講完就拍拍屁股走左去。 

「哇你話係咪誇張？大到咁，仲有會議檯！嘩正呀大班椅！呢張野我老豆都唔肯買比我吖！」 



阿惠好似個大細路咁係間周圍行周圍玩，無佢收。 

不過佢講得岩，呢間學生會室真係好誇張，與其話係學生會室，呢度更加似大公司既會議室。 

我之前去過藍洛晨佢地既學校，亦去過佢地既學生會買野，人地既學生會同我地既好唔同。 

人地既學生會堆滿左支裝水，原子筆之類賣比同學既貨，但我地既一樣都無。 

人地既學生會雖然細，但入面放既全部都係服務同學既野。 



我地？間房係大吖，但一樣可以服務同學既野我都見唔到。 

波檯，籃球機，電視，呢d唔應該出現係度既野居然有咁多係度，床都有一張係度吖。 

「唉。」 

呢下嘆氣並唔係我發出，而係Anna。 

Anna：「雖然我都大概估到，但都無諗過會誇張成咁。 」 



阿惠：「喂阿威，玩籃球機囉！Alex玩唔玩？ 」 

阿威：「好吖怕你麼！ 」 

Anna：「你！兩！個！ 」 

Anna好嬲咁打左阿惠同阿威個肚一下，兩條友即刻跪左係度，應該出手好重。 

Anna：「唔好哂時間啦！我地開會！ 」

開會？而家有乜好開？ 

不過見到Anna頭先出手既力度，都係唔係講咁多野好d。 

好快，九個人就坐低哂。 



Anna：「好啦我地而家就已經上左任啦，都應該儘快搞d活動比同學，大家同唔同意？」 

Ellen：「我同意吖，應該做返d野比人有個耳目一新既感覺。」 

我：「咁搞乜活動好？Runningman之類？」 

Ellie：「Runningman的話要用哂成間學校先夠好玩，我諗我地應該搞d比較輕鬆既活動贏個口碑先..」 

Ellen：「岩呀不如搞下勁食比賽？」 

Ellen D諗法真係… 

我：「勁食比賽好似唔係好岩中學生，不如用部籃球機搞下比賽？又慳錢又易搞。」 



仆街我係班有錢人面前話慳錢… 

Anna：「幾好吖就咁話啦，Alex同Ash你地準備下宣傳既野。」 

Alex：「知道，交俾我地啦。」 

我：「咁今日傾住咁多先？諗好一陣lunch食咩未？」 

Anna，Ellen：「咪住先，我有野想講。」 

兩個人同步咁講左出黎，大家都呆左一呆。 

Anna：「Ellen你講先。」 

Ellen：「唔該你Anna，其實我係想講關於訓導既事。」 



我留意到坐我對面既Anna係聽到「訓導」兩個字之後鄒左一下眉。 

Ellen：「唔知大家知唔知，以前訓導係跟住阿偉既意思去做野，校規其實可以話可有可無。」 

「我建議我地可以繼續控制訓導組，畢竟而家學校既情況都未算穩定，阿明有李Uncle支持班訓導應該肯。」 

Anna：「唔可以，我地唔可以做返阿偉做既事。」 

Ellen：「Anna你聽我講先，雖然做法一樣，但我係想慢慢扶返班訓導跟校規做野咋。」 

「而且我地提倡變革，變革前需要先站穩好我地既陣腳，訓導既幫手係有需要架。」 

Anna：「正正係因為我地提倡變革，我地更加唔應該用返以前既做法，如果唔係大家會對我地反感。」 



佢兩個爭議不斷，我直頭開始覺得房入面既溫度開始上升。 

正當我想起身去校下個冷氣果陣，Sarah突然開聲。 

Sarah：「不如問下主席意見..？」 

拋個波比我？ 

Ellie：「係囉得你兩個討論無乜意思，不如聽下阿明意見？」 

Ellie都係咁..睇黎我要圓滑d去處理.. 

我：「咳咳..其實你兩個都有道理既..」 

我一講完就見到佢兩個啤到我行一行，好似逼我揀一邊咁。 

我：「不過！好老實講學生去干預老師本身已經唔合理，所以都係算啦。」 

「若然之後有同學向我地投訴訓導既問題，我地再開個校政論壇咪得囉好無？」 

我：「傾住咁多先，係時候食lunch啦。」 


我拍拍手仲企左起身，Alex佢地都好配合我即刻起左身，唯獨Anna同Ellen兩個仲坐係度互啤。 

不過過左一分鐘左右佢兩個都起左身，雖然都仲係面阻阻。 

第一日已經搞成咁，睇黎唔係一個好開始添..