「續寫」無啦啦多左幾個家姐同阿妺: 戀愛
三個人，開開心心咁樣返到屋企。
沿途有講有笑，無deadair過。
我諗，呢D就係戀愛？
Sarah仲時不時講返細個既好笑野，而Yui就講大家姐既蝦碌野，笑到咔咔聲。
原來大家姐試過飲醉酒返到屋企直接除衫除剩under跳左落泳池。
真係諗起個畫面都想扯，一定好正。
不過講起泳池，我就諗起二家姐，佢尋晚係池邊踼水幾撚正。
咦，咪住先，飲醉酒我又諗起D野。
之前二家姐都試過飲醉酒，仲口upup話咩媽咪，唔知Sarah佢地知唔知咩事呢？
我：「二家姐佢呢..係咪好愛佢媽咪?
」 一講完「媽咪」兩個字，Yui同Sarah都即刻望住我，望到實一實。
Sarah：「阿明，你千奇唔好係二家姐面前提起媽咪，千奇唔好。」
我：「點解？
」 Yui：「阿明，唔好講，我地到啦。」
咦，原來已經返到去啦。
返到入屋，見到Ellen佢地兩姐妹坐左係梳化。
我：「咦你地做乜黎左既。」
Ellen：「我問你地做乜三個做乜自私出街唔叫埋我地就真吖！
」 唉，始終都係穿左煲。
我：「無呀我都係即興出去啫，怕你地有野做咪無叫你地囉..」
扮死狗！應該work!
Ellen：「我唔理吖！你下次都要單獨同我出街！
」 我：「好啦好啦，同埋Ellie。」
Ellen：「唔得！只係同我！兩個人！
」 我真係唔識應付呢d類型，只好舉手投降。
你睇下Ellie幾好！人地只係坐係梳化上面笑住咁飲茶，咩都無講。
「阿明，有野要同你講，跟我黎。」
正當我仲被Ellen哦緊果陣，二家姐係樓梯果邊叫我。
Yes，甩難了！
我：「係既，即到。」
我：「嗱你聽到啦Ellen，我二家姐叫我喇。」
Ellen聽到二家姐先肯放我走，證明二家姐威力幾勁。
我無放過呢個機會，即刻跟左二家姐上去。
話傾野，但二家姐無帶我去佢間房，而係帶左我去書房。
書房入面仲有大家姐，佢坐左係書檯。
大家姐：「返黎嗱？玩得開唔開心吖？」
我：「係啊返左黎啦，玩得好開心，你地搵我有乜事？」
大家姐：「eh…係咁既，我地岩岩收到張邀請卡，係七星寄黎。」
我：「七星？咩黎架？咁即係又要去party？」
大家姐：「係吖無錯「又」要去party喇我地，七星係指七大家族吖，不過你都唔洗點理架。」
七大家族？咁似d動漫情節既。
我：「咁，叫我黎做乜？」
二家姐：「我地成家都要出席，但今次場合比較特別，你有兩個選擇。」
你可以用Sarah男朋友身份出席，二，你暫時跟我地姓曹先。」
我：「吓點解要咁麻煩，上次陳家個宴會..」
係喎，上次我係以Anna既parther身份去喎。
大家姐：「因為今次係好特別好重要，所以先要咁，Sorry吖阿明。」
我：「咁呀…」
二家姐：「若然你用陳呢個姓出席的話，人地可能會有閒話，話入左黎仲唔改姓之類。」
啊，又係喎。
我：「咁我明白喇，我到時會話自己姓曹架啦。」
大家姐：「嗯，委屈你啦阿明。」
我：「無事，唔委屈，咁無事的話我出返去嗱。」
大家姐：「嗯，出去玩啦，個party聽晚就係啦，我已經叫左人幫你準備好衫架啦。」
我：「好，唔該大家姐。」
我講完就出返去順手閂門，閂果下仲見到大家姐同二家姐講緊野。
其實正常都應該要改姓架啦，係Uncle一直太就我由我㨂啫。
只係一個姓，無乜大不了啫。
好快又過左一日，尋晚同Ellen佢地玩大富翁玩到十一點幾佢地都唔肯走，幾攰。
唔明點解佢地咁鬼鐘意玩大富翁，明明本身自己已經咁有錢。
玩既途中我地都有傾關於「七星」Party既事，原來Ellen佢兩姐妹都要去。
咁我緊係打蛇隨棍上，問下「七星」既詳細野啦。
原來「七星」指既七大家族係全香港最有影響力既家族，可以係高官吖，富商之類。
佢地會藉著呢個Party傾下生意之類，難聽D講就係勾結，操控香港。
呢d野就交俾大人做，而佢地既子女即係我地呢，就會藉此互相認識，為日後合作鋪定路咁。
即係話，今次既氣氛會比起上次Ellen Ellie佢地既生日Party更加嚴肅。
應該係咁掛..
希望我唔會失禮啦。
「阿明，我黎拎衫比你啦。」
咦，Yui把聲wor，乜已經夠鐘喇咩？
我：「入黎啦，我無鎖門。」
Yui慢慢推開門，哇，佢著住一身黑色晚裝，好靚，將自己既優點放大哂。
我講緊乜，你明架。
Yui：「唔好咁望住人地啦..
」 屌，一時望到入哂神添。
我：「哈哈因為你真係好靚
，呢套就係我今晚要著既衫？」 一套黑色西裝啊..
我好快就係廁所換左，但硬係好似唔知點咁，個人好扭擰。
我：「我咁著好唔好睇..？」
估唔到我都會問D咁港女既問題。
Yui：「好睇吖，好有型。」
Yui既微笑，令我有返少少自信。
之後我就同Yui一齊落去，所有人都已經係哂度，個個都著得好靚。
之後我地一行六人就出發去唔知邊間酒店，去到發現已經有好多人到左。
每個人一睇就知道係有錢人，有種氣。
Ellen同Ellie都已經到左，一見到我就走左埋黎搵我。
不過，呢D都唔重要。
重要既係我見到佢，Anna。
佢挽住另一個男仔既手係眾人面前入左會場。
我好似聽到玻璃碎左既聲，由我心入面發出。
我當時想即刻走埋去Anna度，但被人拉住左。
我即刻擰轉頭睇係邊個拉住我，原來係二家姐，佢擰哂頭咁，好似想叫我唔好亂黎咁。
雖然好唔甘心，但我知道呢個Party好重要，唔可以亂黎，所以我只好忍。
當我望返過去果陣，Anna已經唔見左人。
個心硬係好似無左一忽咁..
再呆企左一陣，我地就被安排去一個包廂坐低，係果度可以由上望哂成個會場。
坐低無耐就有人送左一杯又一杯既野飲黎，我唔理三七廿一全部都飲哂佢，搞到佢地都望住我。
Sarah：「阿明..」
我：「我無事，唔洗擔心我。」
Sarah：「但係…」
我：「真係無事，我自己坐下靜下就得。」
個腦好亂，無辦法好好咁諗野。
滿腦子都係頭先Anna同個男仔一齊入黎個幕。
點解會係咁..Anna佢唔係..
二家姐：「有D野錯過左個timing就會無架啦，人地又唔一定會等你一世。」
二家姐揸住杯果汁望住下面個會場講左一句，之後就同大家姐行左去，留低我地四個。
我錯過左timing?
係喎…明明之前有咁多次既機會..但我都無同Anna講到..
人地放棄我都好正常啫..
更何況人地一直以黎都無話過鐘意過我，只係我一廂情願以為人地鐘意我啫。
千百萬個理由拋左出黎，但我個心仍然好痛。
我坐係一角，咩都唔想做。
就算Ellen佢地過埋黎玩，我都無乜反應。
我咁樣都唔知維持左幾耐，我只係知道自己而家咩都諗唔到，只係不停係度諗一樣野。
佢到底係幾時開始對我死心？
我搵唔到答案，直至佢出現係我面前。
Anna。
Anna：「阿明。」
Anna！！
我好似一個搵返媽媽既小朋友，雙眼重燃希望，因為佢自己一個人黎。
「咦Anna？見到朋友呀？」
我個心緊左一緊，因為講野既係一把男聲。
唔好係佢！唔好係佢唔該你！
Anna：「啊係呀..佢係..」
頭先個男仔係Anna背後出現，仲一臉笑容。
唔知係咪出於主觀既問題，佢笑得好乞我憎。
男：「咦？你咪學生會會長阿明？」
佢識我？係聖所羅王既人？
我：「你係？」
男：「我係Form5A既阿傑吖！
」 「同時都係Anna既男朋友。
」 兩句說話，但唔同既語氣。
前一句仲好nice好charm咁，第二句就好似即時黑化左咁。
呢個人，有D古怪。