「續寫」無啦啦多左幾個家姐同阿妺: 王國

Anna：「阿明…」 

我錫完Anna之後佢已經淚流滿面。 

都係時候講喇…都拖左咁耐… 

我：「Anna..我..」 

Anna:「我可唔可以好似Sarah佢地咁..做你女朋友？  」 



屌！！俾佢搶先我一步添！！ 

老實講，我無諗過最後會係Anna自己主動講出黎。 

我仲以為佢會等我開口添。 

啊唔係喎，佢已經等左咁耐，可能佢覺得唔應該再等落去喇。 

屌，我又係度諗乜，人地都開到聲，我仲係度自己諗野？ 



我：「當然可以啦，你都講到出口囉，唔通我拒絕你咩傻。」 

我輕輕咁拍下佢個頭，佢即刻撲左上黎抱住我，仲笑得好開心咁。 

我好似好耐都無見到Anna咁樣笑，自從選完學生會之後。 

呼，太好啦，終於解決左一件一直放係心入面既大事。 

我都可以鬆一口氣喇。 



我：「好啦返去上堂喇，夠哂鐘喇Anna哥。」 

！？ 

我個肚突然食左一拳。 

Anna：「唔，准，加，個，哥，字。 」 

佢笑住咁講，但我feel到滿滿既殺氣。 

我：「乜你咁架，打男朋友都有既。  」 

Anna：「以後如果你只係掛住理Sarah佢地唔理我的話，我都會好似頭先咁打你架，知未？」 

我：「係係，我知道喇，返去啦。」 



咁先係我識既Anna架嘛。 

Anna：「記住呀，我唔係講笑架。 」 

佢講完就拖起我隻手，準備走人。 

但係一開學生會道門，大家都企左係度。 

個個都笑笑口咁，我就知道仆街了。 

我：「乜..咁人齊吖？大家唔洗上堂咩？」 

阿威：「為左睇某人終於可以真正出pool，走堂都值喇。」 



阿惠：「出pool飯！出pool飯！」 

Sarah：「真係好喇Anna你終於都開到口喇..」 

Anna：「嗯，我唔會輸比你架Sarah，我唔會比你地霸哂阿明。」 

咦？咩情況？Sarah好似一早就知咁？ 

我：「喂..」 

正當我想開口問下到底係咩事果陣，Ellie拉住我衫䄂。 

佢笑笑口咁擰擰頭，好似想同我講叫我唔好問咁。 

咁啊，唔好問囉。 



我地最後約左係學生會室食lunch兼開會，之後就返左各自既班房上堂。 

開咩會？梗係傾下點樣處理Form 5啦。

上晝既堂，唔經唔覺就上哂，時間真係過得快。 

每當我唔覺意望過去Anna果邊既時候，我發現佢總係望住我。 

佢好開心，笑住咁望住我。 

見到佢咁樣，唔知點解我都好開心。 

唔知講咩好，就係好開心。 



到放lunch果陣，我，阿威，阿惠仲有Anna就一齊行，準備去買飯。 

但係有一個人企左係門口，阿傑。 

阿傑：「我地一齊去食lunch啦Anna，我已經book好檯。」 


大鑊，計都未諗好敵人就已經出現，點算好。 

Anna：「唔好意思喎，我要同我班成員開會，我無時間應酬你呢d無謂人。」 

嘩，so cool。 

阿傑：「喂你..」 

阿傑想伸手去捉住Anna，但被阿威反過來捉住左手腕。 

呢種反應力好似係邊度見過？ 

阿傑對於阿威既驚人反應力非常驚訝，一時之間呆左，但好快就爭脫左。 

阿傑：「Anna你唔好唔記得你自己同我講過D乜！你係我..」 

Anna：「我咩都無同你講過，你亦唔係我邊個，唔好再煩住我唔該。」 

Anna講完之後就轉身走人，我地三個都即刻跟左上去，掉低阿傑一個係度。 

阿惠：「大鑊，我有唔好既預感。」 

其實我都有，Anna好似反面反得太快。 

我原先打算先下手為強，但而家Anna咁樣同佢攤牌，可能會激嬲阿傑，可能會搞d野都未定。 

不過都係可能啫，可能阿傑咩都唔會做都未定呢係咪先？唔好太過杞人憂天！ 

我咁同自己講，試下平伏一下不安既感覺。 

好快，我地Knight就係學生會室食完lunch開埋會，得出左一個結論。 

除左叫訓導多d巡下，捉下頭髮之外，我地咩都做唔到住。 

因為佢地實在太醒，無露出任何破綻。