「續寫」無啦啦多左幾個家姐同阿妺: 嫁禍
返到去屋企，我將自己收埋係房入面。
而家我咩都唔想做，咩都唔想諗。
個腦全部都係聽日應該要點做。
呢種感覺似曾相識，令我諗翻起上次阿偉話要同Sarah去旺角行街。
果次既前一晚，我又係咁樣收埋自己，不斷咁係腦入面預演。
而家諗翻，原來件事都已經過左幾個月，時間過得真係快，我仲以為只係早兩日發生既事添。
先係同藍洛晨一齊打波打贏仆街偉還Sarah自由，之後就同左Sarah仲有Yui一齊。
打完波第二日就見到Ellen同Anna話要選學生會，大家仲鬥餐死。
之後就唔知點解同左Ellen仲有Ellie一齊左，而家諗返起仲係覺得好莫名其妙。
跟住，就係到今次呢件事。
短短時間內我居然要面對咁多野，真係諗起都見攰。
不過，今次應該就係最後一次啦，只要搞掂埋佢就咩都OK了。
佢同仆街偉都一樣，令我重視既人覺得傷心難過，就係因為咁我絕對唔可以原諒。
比起阿偉，我更加憎阿傑，阿偉我都話有一刻可憐過佢，但阿傑我係完全無，我只係好想佢消失。
阿偉只係痴戀Sarah，但阿傑佢係當Anna好似玩具咁，想控制Anna。
佢無諗過Anna感受，仲當Anna係自己既工具咁拎去四圍揚，拎去威。
若然可以殺一個人的話，我一定會㨂佢。
佢係我見過既人入面性格最差既人，直頭唔應該叫佢做人。
「明哥哥~」
突然有人係我後面抱住我，我嚇左一嚇，差少少咬到自己條脷。
原來係羽晨。
我：「做乜呀羽晨~」
羽晨：「食飯啦!大家姐叫我黎捉你落去食飯吖！
」 我：「好好，咁你有無精靈球架？
」 羽晨：「無喎，咁你會唔會唔跟我行架？
」 佢即刻扁哂嘴咁，幾可愛，我忍唔住即刻抱起左佢轉左兩個圈，佢笑到咔咔聲。
之後同佢行左出房門，準備落去飯廳，但我比人截住左。
係二家姐。
羽晨：「二家姐？
」 二家姐：「乖，自己落去先啦羽晨，二家姐我好快就會同埋明哥哥一齊落黎架啦。
」 羽晨：「知道！咁一陣見喇~
」 羽晨講完就彈下彈下咁行落去，好似LOL入面既安妮咁。
真係好可愛。
可愛到我都唔記得我身邊仲有一個人。
二家姐：「阿明。」
我：「係！
」 我好似D軍人咁，聽到人叫自己個名就會自動立正。
二家姐：「唔洗咁緊張，我又唔係要鬧你。」
但如果你知道左我頭先一直諗緊羽晨的話，你肯定會打死我..
我：「咁，所為何事呢二家姐。」
二家姐：「我聽Sarah講左，你好似要同阿傑鬥？」
Sarah真係咩都會同二家姐講咁濟。
我：「係吖，決定左，因為佢真係唔可以原諒，我一定要趕佢出聖所羅王書院。」
二家姐：「點解。」
二家姐會問到咁詳細，我有少少愕然。
我：「因為..佢太過分，當其他人係棋咁用，完全唔尊重人。」
二家姐：「好，記住你而家講既野，阿傑唔易對付，自己小心。」
我：「知道，有心喇，今次同上次潮特唔同，我有朋友幫，所以一定唔會有問題。」
二家姐：「真係咁就好，行喇去食飯啦。」
二家姐講完就轉身行，不過行左兩步行又停左。
我：「二家姐？」
「好好睇下自己有咩卡係手先決定下一步，用得著既野就用，唔好死要臉。」
「仲有，唔好太搏命，有好多人關心你架，無人想見到你出事。」
講完呢兩句之後二家姐就行左去，留低我一個。
我需要少少時間消化下呢句野。
「用得著既野就用，唔好死要臉。」係想提我D乜..？
之後成餐飯二家姐都無同我講野，好似平時咁。
其他人都好似平時咁開開心心咁食飯，嘻嘻哈哈咁又一餐。
食完飯之後我留意到二家姐同大家姐行左去泳池傾野，內容好似好似係認真野，因為我見大家姐少有咁鄒眉。
點解我會咁留意二家姐？唔好問，多得佢頭先果句野囉。
Yui：「阿明..」
我：「做咩呀Yui？今晚唔玩大富翁啦我有d攰。」
Yui：「唔係啊..我想同你講你自己要小心..」
我：「小心？小心D咩啊？」
Sarah：「唔好意思吖阿明，我同左Yui仲有二家姐講吖..」
哦..原來又係因為呢件事。
我：「嗯，唔緊要啦你都係關心我啫，放心啦我會萬事小心架啦，話哂我都仲要同你地去街架嘛。」
「啊，講起去街，我仲要同Ellen去添，之前應承左佢哈哈。」
我見佢兩個既樣好似苦瓜咁所以懶輕鬆咁講下笑話，點知無效果，搞到我成個小丑咁。
唉，學下動畫咁啦唯有。
我伸出雙手，將佢兩個都收入懷裏，之後再好溫柔咁摸佢地個頭。
我：「無事既，之前我都做過類似既野架啦，咪又係無事，今次都會一樣。」
呢次果然萬試萬靈，佢地收起左佢地果塊苦瓜亁咁既樣，挨左係我兩個膊頭。
仆街喇今次，為左令身邊既人安心，我好似立左好多flag比自己添。
好快就到第二朝，終於都到。
雖然阿傑班人尋日搞事我今日就還拖好似係快左少少，不過我點都做，一定要挫下班人銳氣。
同時，今次都係一個宣戰，話比佢地知我地唔會比佢為所欲為。
阿威：「阿明。」
咦，係阿威同阿惠喎。
我：「早晨。」
阿惠：「早晨吖，Anna哥今朝打左比我話今日請左假，你知唔知？」