MK仔,可以點形容,紅金藍紫四色,一人染一隻色。 

佢地個樣好似不可一世咁,串到好想毒打佢地一身,可惜對方有四個人。 

四個人,今次跟佢地個髮色分佢地啦。 

金:「小姐,你仲未話我知你叫我咩名喎,我真係好想好好認識你。」 

紅:「你兩位都咁靚,簡直就好似天上派黎既仙子咁。」 



藍:「或者一陣煙花我地可以一齊睇,有你係我身邊D煙花一定會更加靚。 」 

認真架?MK仔係咁撩人架?媽呀我覺得咁好撚柒吖。 

Ellen:「我頭先已經講左,我地兩個都已經有男朋友,係男朋友,所以我覺得無必要話你地知我地叫咩名。」 

Ellen好強調「男朋友」呢三個字,我覺得係特別話俾我聽,想我做D野。 

坐係我旁邊既Sarah亦都拍左我大脾一下,仲要係好大力果種。 



得啦我收到啦,我去啦咁得未呀。 

我企左起身,整理一下D衫之後就轉身行去Ellen旁邊。 

我:「係咪有乜事?」 

紫:「你係呢位小姐既保鏢?黎得岩啦,話俾我知你地兩位小姐叫咩名。」 

屌你吖話我係保鏢?咩態度呀?命令我咁話? 



保鏢呢個字一出,唔只其餘三個MK仔笑,連我身後既果班女人我都feel到佢地係度笑。 

屌,俾人話我係保鏢搞到我而家好撚嬲添。 

我:「玩夠未吖你地呢班四色戰隊,個頭染到咁都唔知搏乜,人地都話左唔話你地知叫咩名囉,仲唔知難而退?」 

聽到我咁講之後四個MK都擘大對眼望住我,應該好嬲。 

金:「你知唔知自己同緊邊個講野?區區保鏢夠膽咁串? 」 

我:「我可以同你講,呢兩位小姐講既男朋友就係我,我係佢地兩個既男朋友。 」 

我講既時候仲突登拉哂Ellen同Ellie佢地兩個埋我身邊,希望增強說服力。 

可惜,事與願違。
自以為好型咁講完之後對方就會知難而退,但現實卻只係換黎對方既嘲笑。 



紅:「你想笑死我咩你係呢兩位小姐既男朋友?就憑你?」 

藍:「自量下少少啦好唔好?居然夠膽話自己同時係兩位咁靚既小姐既女朋友?」 

金:「人唔笑狗都吠啦。」 

紫:「快d同我縮開你隻臭手。」 

聽到佢地四個咁講,我不自覺咁震左一下,仲有一刻真係想放開隻手。 

不過都只係一刻,呢個念頭好快就被打破,因為Ellie突然緊緊咁捉住我放係佢膊頭上既手。 

Ellie:「佢無講錯,我同我家姐都係佢女朋友,所以你地都係走啦。」 



佢捉住我隻手呢下,我真係有d感動,唔識去解釋點解,總知就係好感動。 

Ellie,多謝你,我唔可以再咁廢柴,應該要拎D氣勢出黎。 

金:「哈哈,呢位成個保鏢相咁既廢柴有乜好吖,小姐你不如跟我走啦,我肯定我各方面都好過呢條友,連果方面都… 」 

果個金髮既MK仔突然行左上前,仲伸隻手去Ellie度,好似想帶走Ellie咁。 

我睇準機會,一下就捉住佢隻手,仲突登用手指公大大力咁按落去,搞到個mk仔呱呱叫。

我:「頭先你講既野,我可唔可以視為性騷擾?希望你可以尊重一下自己。 」 

金:「好痛吖你個衰人快D放開我!你知唔知道我阿爸係邊個! 」 

唉…又係呢D成日開口埋口提自己老豆既人… 



我:「咁你老豆而家可唔可以黎救你先? 」 

金:「放開我吖!」 

四色戰隊其餘三個見到咁既情況都開始行埋黎,試圖分開我地,我亦見好就收,放開左佢。 

佢一直捉住自己隻手不停係度捽,我諗應該真係好痛下。 

我係咪唔應該出手呢…二家姐之前都有叫過我要打醒十二分精神。 

不過我唔後悔,暫時我都認為自己無做錯野。 

佢騷擾我女朋友喎,呢種程度既教訓已經便宜左佢啦,以前阿偉打到我豬頭咁吖。 



紅:「衰人你打我朋友?我要教訓你!」 

紫:「唔可以放過你! 」 

唔係吖?仲黎?喂我唔係葉問我唔可以一打十架! 

其餘既四色戰隊開始步步進逼,不過一個人既說話令佢地三個人停左落黎。 

Sarah:「請你地幾位自重下同埋尊重一下場合,再係咁我就叫保安黎架啦。」 

佢地幾個既表情突然黎個大轉變,由好嬲變到好驚,個口仲震震下咁。 

係Sarah話叫保安黎令佢地咁驚吖,定係另有原因?表情居然變得咁快?換面具都無可能咁快啦!

紅:「喂果個女仔好似係…」 

紫:「係李俊偉以前女朋友Sarah…」 

佢地識Sarah?所以先咁驚?Sarah有乜野令佢地咁驚? 

Sarah:「我都係呢位呢位靚仔既好女朋友,你地四位係咪對我地既男朋友有咩意見? 」 

Ellen:「我地男朋友勁過你地四條友多多聲吖,自量下先學人溝女啦。 」 

金:「你話呢條友…呢位先生都係你既男朋友..?我想問下先生你叫咩名… 」 

嘩,態度突然好左咁多既,轉得快過魯芬喎。 

我:「我叫陳煒明,未請教。 」 

紫:「喂陳煒明咪係果個…」 

藍:「搞到阿傑同李家二孫李俊偉失勢果個… 」 

佢地四個開始自己圍內傾,無視左我地四個一段時間。 

好快佢地就傾完,四個人一字排開咁面對我地。 

四色:「唔好意思騷擾到你地幾位,好對唔住我地而家即刻走。 」 

都未等到我俾反應,四色戰隊就已經好似一支箭咁跑走左,留低左一大堆問號比我。 

我:「搞咩呀佢地,明明頭先仲好似一定要問到你地叫咩名咁,而家居然又走得咁快。」 

Sarah:「吓阿明你聽唔到佢地講乜咩? 」 

我:「聽得唔係咁清楚呀佢地講野咁細聲加上呢度又嘈。 」 

Ellen:「佢地係因為…」 

「請各位返回座位,祝酒儀式馬上就要開始。」 

啊,搞左咁耐終於要開始喇,等到我幾乎想死。 

我:「好喇好喇有乜野一陣再講啦,而家返埋位先喇。 」 

我一邊講一邊拍佢地膊頭,開始慢慢咁返埋位。 

Ellen同Ellie理所當然咁坐係佢地媽咪旁邊,哇三母女都咁靚。 

咦咪住先,點解Auntie Venus望我既眼神好似有D怪咁既 

「恭喜發財!新年快樂! 」 

台上突然傳黎MC既聲音,我身邊既人都拎起左杯開始乾杯,我亦跟住做。 

音樂聲,乾杯聲同埋人既歡呼聲都充斥住成個會場。 

就咁睇,都同一般飲宴無乜分別啫。 

就咁睇的話。

祝酒之後就係上菜,一碟碟佳餚放左係我地既面前,但係成檯人都無人郁手夾餸。 

大家既表情都無咩尷尬,應該唔係等緊咩邊個出手夾餸先,而似係等緊人黎多d。 

我望一望圍檯淨低既兩張空櫈,哦係喎Uncle同埋Ellen佢地既Daddy都未返黎。 

啊就講就到,兩個阿叔搭哂膊頭咁行返去,望落好似好friend咁。 

Uncle:「唔好意思吖要你地等,起筷啦我地。 」 

陳生:「唔係唔係,大家都係飲杯先啦。 」 

Uncle:「哈哈老陳你講得岩,飲杯飲杯。 」 

為左遷就呢兩個阿叔,我地成檯人再一次碰杯。 

之後大家就開始食野,至於呢兩個阿叔就猶如一見如故咁傾個不停。 

我就一於少理,肚餓,食野先。 

食到咁上下,會場入面都開始動起來,好似開席前咁周圍行搵人吹水。 

大家都知道我係呢個圈子入面既朋友十隻手指數得哂,所以我都係留係自己位度飲下野算。 

費事變到那年十八,我校舞會,站著如嘍囉咁啦係咪先。 

我地果檯既所有大人都出哂去,就連大家姐二家姐都跟埋Uncle出埋去見人,得返我地堆90後。 

我:「啊~好無聊呀,呢D場合果然唔適合我。」 

講完我就一口氣飲埋剩低既半杯fruit punch。 

Ellen:「係咁架喇D大人想打好關係就係靠呢D場合,就連我地既未來都係。」 

我:「未來? 」 

Ellie:「絕大多數大人會透過新年晚會呢個年度重頭節目去為佢地既仔女鋪好路,打好關係。」 

哦,咁講又係,睇電視都有提過D有錢人既仔女係會透過D酒會去互相認識。 

車,不過都唔關我事架啦,要打關係都唔係我打啦,係大家姐佢地打。 

Anna:「喂,傻仔明。 」 

咦Anna幾時行左過黎架。 

我:「Hello靚女,咁多人我都搵唔到你添。 」 

Anna:「搵唔到定無搵吖你個衰人,算啦你睇我帶左咩人黎搵你。 」 

咩人?哇屌!! 

我嚇到即刻彈左起身,因為Anna帶左黎既人係佢父母,仲有果個好恐怖既保鏢阿標。