二家姐既事雖然令人在意,但我都無時間去深究呢件事住,有更重要既事等住我去做。 

不過反正二家姐本來就係咁難捉摸架啦,想去知道佢點諗係一件十分困難既事。 

而家就專心過左呢個情人節先啦。 

啊好緊張呀真係,毒撚第一次有女過情人節。 

我甚至係十三號晚緊張到訓唔到,眼光光等天光咁迎接情人節既到來。 



第朝十點,佢地五個都齊集左係我屋企。 

Anna:「點呀阿明,你想帶我地去咩地方?」 

Ellen:「一定要係要D好玩既地方架,如果唔係我唔會收貨。」 

我:「係係,今日包你地話好玩,所以唔洗擔心,你地準備好未先?」 

Sarah:「一早準備好啦,你話係咪啊Yui。」 



Yui:「係…」 

Ellie:「Yui唔洗咁拘緊架喎,我地而家都只係阿明既女朋友,無分別架。」 

都係Ellie醒,一下就睇得出Yui因乜事會咁唔自然。 

我:「好啦唔好講咁多啦,我地行啦。」 

Anna:「你仲未答我我地到底要去邊喎,你唔講清楚我唔會行架,點知你會唔會帶我去賣架。」 



Ellen:「係囉快d講唔好要我地估估下啦阿明。」 

「烏。溪。沙。」 

我拋低呢三隻字,之後就轉身背向佢地咁行左出大門口。 

今日陽光普照,又唔算特別凍,係約會既絕好天氣。 

好,開始喇,我同佢地五個既情人節。
Anna:「烏溪沙?離呢度好遠喎,就算阿鏢車我地去都要至少一個鐘。」 

Anna知道邊度係烏溪沙?犀利喎,我第一次聽呢個名既時候真係完全唔知邊度黎。 

Ellen:「吓點解要去到咁遠?阿明你想做乜呀? 」 



我:「唔好問咁多,跟我行就岩了,仲有今日我地唔會用司機,我地要靠自己去。 」 

Ellen:「吓~~咁麻煩,司機車我地去咪好,唔洗煩。 」 

Ellie:「唔係吖家姐,咁樣都幾得意吖,唔通拍拖都要靠司機車出車入咩。 」 

Ellen:「唔…Ellie你都講得岩,好啦! 阿明我地坐的士定係坐Uber去?」 

我:「eh…兩樣都唔係 ,我地會…」 

Sarah:「我地坐地鐵去!係咪啊阿明? 」 

我:「無錯,真係醒目。 」 

Ellen:「地鐵啊…」 



Anna:「坐乜都無所謂啦,最緊要係去到架啫,快d行啦唔好再係度浪費時間。 」 

Anna一句說話控制哂全場,大家都無再講d乜。 

之後我地六個人就慢慢咁行去地鐵站,佢地五個沿途仲有講有笑,講埋哂D白癡好笑野。 

我就一支公行係前面,好似個保鏣咁幫佢地開路,同時亦係度想像下一陣會有既情況。 

行啊行,用左四個字時間,我地六個人終於行到去地鐵站。 

我:「好,我估你地都無八達通架啦,去買飛先啦,Yui你教Ellen佢地去買飛啦。」 

Yui:「我…? 」 



我:「係吖拜託你啦。 」
之所以叫Yui教Ellen佢地買飛,係因為我注意到Yui佢到而家都仲係好緊張。 

頭先行黎地鐵站個陣,我甚少聽到Yui出聲,有時擰轉身望下佢地五個果陣仲見到Yui企到離行離勒咁。 

佢應該仲係拘泥於身份喇我估,所以我先叫佢教買飛,等佢可以融入。 

Yui:「首先㨂要去邊…之後咁樣咁樣,最後就係俾錢。」 

Ellen:「我有卡!我黎俾! 」 

Ellen拎左信用卡出黎,搞到我差d忍唔住笑左出黎。 

Yui:「呢部機只係收現金…」 

Ellen:「咁啊…唔緊要!我都有Cash! 」 



今次,Ellen拎左張一千蚊紙出黎。 

呢個情境,我有印象。 

我:「Sarah你覺唔覺得呢一幕似曾相識。 」 

Sarah:「唔好再提啦衰人,我唔想再記起d樣衰野吖。 」 

我:「哈哈,原來時間過得真係好快。我黎俾啦。」 

我拎出一張五十蚊紙交俾Yui,Yui接過之後就一手放左入部機度,幾張飛就咁跌左出黎。 

Ellen:「哇Yui你好犀利吖!㩒幾個掣就跌左D飛出黎! 」 

Yui:「邊係呢…」 

Ellie:「比起家姐黎講,Yui你已經係好勁架啦。」 

Ellen:「你講咩啊Ellie!」 

Ellie:「咁係吖嘛,買地鐵飛都唔識。 」 

Ellen:「咁你又識咩唔通! 」 

我:「喂唔好嘈啦…買完咪算囉..」 

「我識吖,我仲有八達通添。 」 

咩話!? 

我擰轉頭,見到Ellie谷起塊臉,拎住張八達通。 

Ellie真係成日都會俾到驚喜我…我完全無諗過佢會有八達通。 

屌,明明一個普通香港人有八達通係一件好正常既事,點解我會咁驚訝。  

睇黎我都開始融入左佢地個圈子。
買完飛之後當然就係入閘坐地鐵啦,由屋企最近既地鐵站去烏溪沙都頗遠,要轉幾次車。 

途中Ellen一直捉住Yui係咁問好多關於地鐵既野,仲不停讚Yui好叻,氹到Yui好開心。 

見到Yui同Ellen傾得咁開心,我就放心喇。 

Anna:「見到Yui咁你安樂哂啦明哥仔。 」 

我:「我唔係好明你講咩喎Anna姐。 」 

Sarah:「我地唔係傻架阿明~我地都知你諗乜架,你擔心Yui自卑吖嘛。」 

咁你都知? 

Ellie:「放心啦阿明,我地會幫Yui搵返自信架啦,你唔需要太擔心。」 

我:「咁就靠哂你地架啦,你三個真係抵錫,黎,錫啖先。」 

「列車已到達終點站…」 

屌,阻鳩住哂,車都燒左你吖嗱。 

轉左咁多次車,原來我地終於到左烏溪沙站。 

不過,問題亦開始出現。 

我唔識去間村屋。  

之前去間屋果陣係華叔車我同大家姐佢地黎,車到去門口。同自己坐地鐵黎係兩回事。 

我居然會唔記得左呢一點,搞到唔記得上網search定點行過去添。 

屌啦,係個出口望過去我印象中所在既位置居然係一片密林,望唔到d屋。 

唉死就死啦,事到如今都無辦法,反正我都知道間村屋就係係果個方向,一定會搵到既。 

我滿懷希望咁帶住佢地由港鐵站出發,去尋找我地今日要去既屋。 

不過,最後我都係蕩失左路,企左係度唔知點算。 

屌,點解呢d事成Q日發生係我身上?我特別好蝦? 

Yui:「阿明..係咪有咩事? 」

我:「我…一時搵唔到我地要去既地方係邊…」 

Yui:「咁點算好…」 

我:「我都唔知啊,不過一定係堆密林後面架啦,只要我地搵到路穿過去我就會識行。」 

Yui:「咁啊…咁我地一齊去搵路啦…」 

咩話?我有無聽錯?嘩!!! 

Yui居然主動拖我!!! 

Yui:「行喇阿明,我地去搵路啦。」 

一時之間我唔知點俾反應好,只係哦左兩聲。 

雖然我一直都係想Yui可以好似而家咁樣開開心心,只不過一時之間我自己好似都係未適應到。 

而且有樣野好奇怪,其餘四個女人見到Yui拖我竟然一D表示都無,仲笑笑口咁係我地身邊行過。 

明明平時佢地是旦一個拖下我掂下我其餘既都會鬼哂咁嘈,今次居然咩都無講? 

Sarah:「好喇好喇~我地快D搵路過去喇~」 

Ellen:「贊成~我都行到攰啦~唔好浪費時間啦~」 

Anna:「好似要行隧道先過到去喎?Ellie我地一齊行過去睇下路先?」 

Ellie:「好,我地行啦。」 

佢地四個好似無視左我同Yui咁,四個一直係我地前面行,幫我地搵路。 

行下又搵下咁樣慢慢行,我地又用左唔知幾耐終於行到去條村,原來一開始就行錯路,樹林果邊係無路既。 

一去到條村我就認得返d路,轉多幾個圈就到左間屋。 

我:「唔好意思搞左咁耐先到,呢度就係我地今日既屋企。」 

Ellen:「屋企?咩意思吖阿明?」 

我:「等等先再解釋,我地入去放低D野先。」 

我拎出二家姐交比我既鎖鑰,打開左道門俾佢地入去。 

「哇好靚吖!」 

「白雪雪感覺好乾淨啵。」 

「不過好似咁細既?呢度就係容廳?」 

哈哈…我都估到佢地會有咁既反應架啦… 

呢度比起平時既屋企的確係細左少少既,對佢地黎講應該覺得呢度頂盡係書房大小小。 

無辦法啦,體驗平凡啊。 

我:「咳咳,大家集合先,我有野要講。」 

佢地五個聽到之後就坐哂係梳化,望到我實一實。 

我:「今日我地會係度過,所有野都要靠我地自己,包括煮飯。」
Ellen:「吓~~即係話我地全日都留係呢間屋?呢度有乜好玩啊?有無大富翁? 」 

Ellie:「黎到呢度仲玩咩大富翁啫家姐…平時阿明屋企都有大富翁喇…」 

Sarah:「係囉阿明話過今日包我地話好玩架嘛,一定唔會只係留係度既。 」 

Anna:「啊好頸渴,有無野飲架呢度? 」 

Yui:「我去幫你睇下。 」 

Anna:「喂唔洗啦我同你一齊去睇 ,Sarah你地飲唔飲野?」 

Sarah:「我想飲可樂~平時無乜機會飲~」 

Ellen:「我想飲水,有無礦泉水?」 

Ellie:「我就唔洗啦唔該你地。 」 

啊啊…完全無視左我,自己傾起上黎嗱…無所謂啦,反正你地一陣就會主動搵我。 

「阿明!!! 」 

嗱,都話左架啦。 

Anna:「點解雪櫃咩都無架??咁我地今日點算吖!! 」 

Sarah:「唔係掛!! 」 

Ellen:「點算好吖Ellie我地會唔會餓死架! 」 

屌,又陷入左一片混亂,我又搵唔到位講野啦,唉唔理了插嘴啦唯有。 

我:「咳咳…我想問我可以講野未呢..」 

「無錯啦,就好似你地見到既咁,而家呢間屋係乜食物都無既,我地需要自己買返黎。」 

「同埋,我地唔會成日都留係呢度既,我地一陣係會出去玩既,大家可以放心。 」 

「今日既主題係平凡情人節,我會帶你地呢班不知世事既公主睇下呢個世界。」 

「我既五位公主,情人節快樂吖,希望你地會鐘意我一陣落黎為你地準備既野啦。 」