同二家姐關係好返,最後一塊卡係心入面既野終於都拔埋出黎啦,成個人都舒服哂。 

七星無野搞,我可以開始同佢地專注係準備開放日,終於可以做返d輕鬆野喇。 

仲有一個月左右就係開放日喇,學生會都終於重新開始忙起上黎。 

因為今次係第一次搞開放日,所以特別多野要做,同學校傾細節例如有野可以做之類,又要同D學會仲有班會傾預算。 

總知就係好撚多野做,好耐都無試過咁撚多文件堆係學生會室。 



雖然大家把口都屌哂鬼咁話點解會咁多野做,不過表情卻係笑緊。 

我估大家都應該係好期待個開放日,想努力搞好佢既。 

點解我講得咁輕鬆?因為我其實係無野做架囉。 

我係主席,D野唔輪到我做,Ellen,Anna仲有阿威都幫我處理哂對內對外既所有野。 

我就只係得閒去買個下午茶比佢地,學十二道鋒味條友咁,我係荼水部主管。 



Anna:「痴線架4B班要申請經費去買爆谷機?完左部爆谷機歸邊個呀咁? 」 

Ellen:「會出席既嘉賓名單我整好喇,Ellie你幫我確認多次我怕有錯。」 

阿威:「我同足球學會岩岩傾好喇,佢地會係體育場有表演。」 

嗱,都講左架啦,邊洗我做啫。 

唉,慰勞下佢地啦,我去買下午茶先。 



我出左去出面,買左d野食例如多士啊紅豆冰之類比佢地。 

不過唔知點解返到去學生會室我選擇左過門而不入,而係放低左D野食係門口,自己拎左杯凍檸荼走左上天台。 

呢個時候涼涼地,係天台吹風,望住個咸蛋黃真係好寫意,不經不覺我就已經沉醉係呢片景色入面。 

「你一個人係呢度搞乜啊? 」

原來係Sarah。 


嘩… 

黃昏加上涼風吹動佢既頭髮,搞到成個畫面都好靚,我有一刻直頭以為自己係睇緊日本動畫。 

我:「哦…無…上黎偷下懶啫。」 



我一邊講一邊坐返直個人,Sarah亦係呢個時候坐低係我旁邊。 

「啊唔係喎,我本身係入面都無野做,咁我都應該唔算係偷懶啦。 」 

借呢個機會訴下苦先,唔知Sarah聽唔聽得明。 

Sarah:「係囉,大家都好叻,咩都可以自己做哂,我就無野做,好似完全幫唔到大家手咁。」 

我:「乜…Sarah你都係咁諗? 」 

Sarah:「我知道你諗緊乜架阿明,你覺得自己無用,係咪?」 

我係咪真係咁易睇穿?好似個個都知道我諗緊乜咁既。 



不過事實的確如此,我覺得自己係入面好無用,個個都有野忙,係得我無。 

果種感覺其實都真係幾難受,會feel到自己好似零作用,垃圾一般咁。 

但係估唔到Sarah都係咁? 

Sarah:「大家咁努力都係想為件事好啫,阿明你都知架。」 

我:「係…我都明白,但係…」 

Sarah:「仲有大家都係為左你無咁大壓力先幫你做哂d野咋~大家都知你唔受得壓。」 

「一個七星已經搞到你呼天叫地,再加多個開放日都唔知你會唔會跳樓呀! 」 

Sarah講完就搣左我個鼻一下,仲做左個鬼臉,好可愛。 



「係可以依靠其他人既時候就盡情依靠人,係仲可以休息同放鬆下既時候就休息喇…」 

「未來會發生咩事,我地無人會知架…」 

佢講完就挨左係我膊頭度,同我一齊望住個咸蛋黃。 

係可以依靠其他人既時候就盡情依靠人,係仲可以休息同放鬆下既時候就休息啊… 

大家原來都係為左我唔洗咁大壓力先… 

佢地真係傻,不過我先係最傻,居然將人地既善意解讀成自己無用… 

有呢班朋友,真係開心,有佢地我真係可以毫無顧忌咁交哂所有野比佢地。