「續寫」無啦啦多左幾個家姐同阿妺: 別答應

見到佢地四姐妹感動既重逢，我都唔好意思同佢講份文件既事。

我自己一個默默咁拎住份野行返去自己房，閂埋房門睇呢份野。

屌…果然係為左咁…

呢個人係咪痴左線，為左對付我一個，連綁架都做得出？

呢份所謂文件，只有兩頁紙，短短幾段野。



第一頁係咁：

「一，退出七星。」

「二，退學，離開聖所羅王書院。」

「三，不得踏進聖所羅王書院二百米範圍。」

下面仲有一個底線位，好明顯係留比我簽名。



至於第二頁，係一段野，內容大概係話我簽完交去邊，唔簽又會點之類 D on9野。

老老實實，就咁睇呢段野真係同一封恐嚇信無分別，但佢寫簽完交去邊搞到份野變到學校通告回條咁，搞到我忍唔住笑左一下。

偏偏呢個時候屋企果兩個真正「大人」先去左環遊世界，搞到我無人可以問。

又唔想係而家呢個大家岩岩安穩返少少既時候去打擾大家姐佢地…

唉真係頭都痛埋，好想好想搵個人同佢商量一下呢件事我應該點做好。



我而家唯一確認到既野就係對方既目標係我呢個人，唔關咩我係七星事。

佢仲憎我憎到要我退學，要我唔可以出現係聖所羅王書院二百米內。

到底係邊個同我有咁大仇口？

「有咩諗唔通可以打電話比我架，唔好咩都自己黎。」

我個腦突然閃過Ellie今日講過既說話，係喎！搵Ellie啦！佢咁醒，一定可以俾到好多有用既意見我！

打鐵趁熱，我馬上就拎個電話出黎打比Ellie。

我：「喂Ellie？」

Ellie：「咩事呀阿明？係咪你二家姐果邊…」



我：「啊，唔係呢件事，二家姐果邊無事。」

Ellie佢唔講我都唔記得左今日下晝我仲係度煩緊二家姐既事添。

Ellie：「咁你打黎搵我係咩事..？唔會係只係搵我傾計掛？」

我：「哈哈，搵你傾計唔得架咩？」

Ellie：「唔係唔得，只係我覺得你咁樣打比我，唔會只係為左同我傾計咁簡單啫。」

真係聰明，Ellie真係聰明。

我：「Ellen佢係唔係你旁邊？呢件事我暫時唔係好想比其他人知住。」



Ellie：「家姐佢唔係度啊，你有咩事想同我講？」

我確保左Ellen唔係Ellie身邊之後就一五一十咁將羽晨件事，文件既事講哂俾Ellie知。

換黎既，係一片沉默，我直頭以為佢收左線，但電話仍然顯示通話中喎。

我：「Ellie？你係唔係度？」

Ellie：「啊，Sorry我係度架。咁你想我俾咩意見你？」

我：「你…覺得我應該點樣做先好？我應唔應承條友好？」

Ellie：「係我答你呢個問題之前，你內心其實係咪已經有一個答案？」

我突然覺得，一個女仔太醒目都係一個問題。



我：「我…eh…」

Ellie：「你其實係咪想應承對方？」

我：「嗯…」

Ellie：「可唔可以話比我知原因係咩？點解你肯放棄咁多你一直以來爭取返黎既野？」

我：「咁若然我肯投降，放棄呢D唔重要既野就可以令對方接受，以後唔再對付我的話，我覺得值得喎。」

「反正我由一開始就唔係真係想做七星既，而家有個咁好既下台階又點可以放過呢？」

「至於退學果邊，雖然係有D可惜，不過係邊度讀都係一樣架啦。」



Ellie：「你其實係怕唔應承的話，對方會做出一D比今次更嚴重既事，搞到你家姐佢地？」

唉Ellie…你咁聰明又何苦呢…

其實你要對付既人只係我一個，點解你要搞我身邊既人？點解唔敢光明正大行出黎？

我真係唔想佢地再有D咩事，反正自己已經有多好多人地無既野，放棄少少無傷大雅既野都無所謂啦。

我：「我無啦啦擁有既野，可能太多喇，都係時候放低D啦。」

Ellie：「點解你今次咁容易就放棄？你甘心咩？你要向一個連身份都唔知既人屈服？」

我：「但係我真係唔想連累到其他人，我自己就點都無所謂。」

Ellie：「咁若然對方要你放棄既係我地五個呢？你都會應承？」

我：「唔得！絕對唔得！」

Ellie：「咁咪係囉，你去相信一個唔知身份既人，放棄咁多野，若然之後佢反口要你放棄更多，你又會點？」

「倒不如唔好妥協，搵佢出黎，狠狠咁教訓佢！等佢以後都唔敢咁做！」

「軟弱解決唔到任何問題架阿明。」

我知道啊，但係我…我真係真係唔想再出D咩事啦。

「信我啦，對方係邊個我已經大概有頭緒啦。」