「續寫」無啦啦多左幾個家姐同阿妺: 背叛者

阿天：「哈哈！！你個傻仔！！提出呢D咁荒謬既動議！！連你個friend都唔撐你！！哈哈！！」

阿天呢個咁得戚既樣，令我陷入更深既困惑。

我：「阿威…點解你會…」

我好錯愕咁望住佢，但我始終都無同佢四目交投過，因為佢仍然係度望住部ipad。

阿雪：「阿明點解你會有咁既反應既？你唔係預左會咁架咩？」



諾儀：「係囉，你之前唔係叫我地點都要對你既議案投反對票架咩，所以我先唔明。」

吓…你地兩個係度講緊咩…點解我完全聽唔明…

就係我擰轉臉，望住阿雪同諾儀果陣，我背後忽然傳黎一把笑聲。

「哈哈哈哈，估唔到你居然會搞咁多野黎引我出黎，你真係好野！」

講野既人唔係其他人，而係阿威。



阿威：「原來由頭到尾，你都係度懷疑我，仲叫我去查內鬼？我真係俾你呃哂。」

而家呢度既人講既所有野，我一句都聽唔明。

我到而家都唔知道到底發生緊咩事，我仲係度諗緊點解阿威無投贊成。

其他野我都無辦法聽得入耳，我個頭甚至開始痛起上黎。

「你自己做過咩你自己知！唔好賴落阿明度！佢咩都唔知！呢個方法係我地諗既！」



有一把女聲係台下傳出，我唔洗睇都知道係邊個，係Anna。

佢地五個，開始慢慢咁行過黎台呢邊。

有無人可以同我解釋一下，而家發生緊咩事…

唔洗一陣，佢地五個已經行到黎台上。

阿天：「喂你地做咩！返落去！」

Anna：「你收聲！唔關你事！同我乖乖咁坐係度！」

Anna一句就令阿天收左皮，呆左咁坐係度，而Ellie仲有Yui就走左黎我旁邊。

我見到Ellie就激動起黎，即刻捉住佢。



我：「Ellie，你話我知，你話我知，到底發生咩事，點解阿威佢會…」

Ellie：「你冷靜D先…我會慢慢咁話哂俾你知既。」

「之所以我地之前係學校查唔到任何野，其實係因為搞出所有野既人就係阿威自己。」

「我係你之前收到果封信果下就已經大慨估到，所以我先佈呢個局出黎。」

「我故意叫阿明你去通知阿威一聲，講到個議案只要有佢支持一定可以通過到咁。」

「不過我都無諗過會咁順利，佢連你想提咩議案都唔問。」

「當佢見到個議案，以為你已經有三票既時候，佢就會知道自己既一票可以保住自己七星既地位，佢一定會露出本性投反對。」



「之後我就去左搵阿雪同諾儀，叫佢地一定唔好投贊成票。」

「因為投票係不記名，若然佢地其中一個投左贊成，阿威都可以狡辯話果個就係自己。」

「不過若然真係通過左都係無用，因為你地根本無權自把自為解散七星。」

「我地都只係大人們既傀儡，只要班大人反對就無可能解散七星，今次呢一切都只係為左引阿威露出馬腳。」

原來係咁，但點解阿威要搞咁多野對付我…

呢個時候我發現Anna並未就此停下，佢行左埋去阿威度，一手捉住阿威。

Anna：「講呀！點解要咁對阿明！！佢對你咁好，當正你係兄弟，點解背叛佢！！」

阿威：「我只係拎返我應該有既野，我有咩錯！」



Anna：「你應該有既野？你有咩野係阿明攞左你！你自己講！」

阿威：「佢根本唔配有而家既呢一切！！」

呢個說話，深深咁打擊我，個心好似玻璃咁碎左。

我無諗過一句咁既說話，居然會出自我最好既朋友把口。