「續寫」無啦啦多左幾個家姐同阿妺: 陳煒明
大家聽到我咁講都愕左然，一直係台下既Sarah佢地亦都即刻衝左上黎。
Ellen：「阿明，你真係要..」
我：「你地落返去等我先啦，我一陣有野同你地講。」
Ellen：「但係…」
Ellie：「行啦家姐，我地要信阿明啊。」
Sarah：「係囉，信佢喇，我地不嬲都等慣佢架啦，唔差在呢次啦。」
就係咁，Ellen係Sarah同Ellie半推半夾咁返落台，Yui亦緊隨其後。
只有Anna無郁，企左係度同我對望。
我：「Anna…」
Anna：「你要點做都好，我都會撐你，所以放膽去做啦傻仔明。」
我連「多謝」都未黎得切講出口，Anna佢就已經一個人返左落去。
多謝呢D說話，都係在心中啦，而家做左正經野先。
我：「唔好意思，我女朋友比較緊張我，我地講返正經野先喇。」
阿信：「我無聽錯啊？你話你願意離開七星？」
我：「係，你無聽錯，只要你地肯保證以後唔搞我同我屋企人，我可以離開七星。」
阿雪：「阿明你真係捨得？如果你留係七星的話你可以…」
我：「我知道，但我覺得自己始終都係唔岩呢D生活，而且我係七星會令我身邊既人為我操心。」
諾儀：「好，我明白啦，我可以向你保證，只要我仲係七星，就唔會有人搞你。」
阿雪：「我都無問題~~反正我本來就唔會針對阿明你~」
阿信：「我都無問題，但係你可以唔洗…」
我：「多謝你，不過都係唔好喇，我始終都係想…」
阿信：「好喇，真係難得有人可以放得低，我好佩服你。」
只係剩低阿天，大家都望住佢。
阿天：「陳煒明，我對你改觀。」
「主動提出離開七星既人，你係第二個，第一個主動提出離開七星既人到最後都係留係七星。」
「難得你有咁堅定既決心，所以我可以應承你，七星絕對唔會干擾到你既生活。」
「或者，我阿爸講得岩，我應該要學下你既氣量既態度。」
「好高興可以認識到你。」
阿天講完就行左埋黎，伸出隻手。
阿天：「不齒同一個曾經打過自己朋友既人握手啊…？」
我：「當然唔會，果件事我已經無放係心好耐。」
我一邊講一邊同佢握手。
其實阿天…都唔係咁差啫，起碼光明正大。
如果大家碰面既地方唔係七星，或者大家可以做朋友都未定。
我同阿天握完手就離開左呢個台，頭都不回果種。
我走到台下，見到既第一個人唔係Sarah佢地，而係李生仲有愛麗絲。
見到李生，我第一句講既就係對唔住。
我：「真係好對唔住啊李Uncle，我自把自為。」
李生：「答左我先，你真係決定要離開七星？」
我：「我知道我係應承左你，但我真係唔想再留係七星，錢果方面我會諗辦法…」
李生：「錢？咩錢？」
我：「eh…之前作為我應承你做七星既條件果五千萬呢…」
其實最後係一億，不過都無乜分別，我都係無可能還到。
李生：「哦！個少少錢就由佢啦！我根本無打算收返，但係你真係打算唔做？你係一個人材，應該係呢方面發展先係。」
我：「好多謝你既賞識，但係我始終都覺得自己唔適合。」
「我入左七星之後無錯係見到好多新野，亦可以叫做得到地位，但係換黎既卻係失去左一個朋友。」
「而且要我去猜忌身邊既人，提防有無人去害我，呢D咁既生活我真係唔慣。」
「可能因為我本身出身窮，無乜大志啦，而家咁既生活，有咁多對我好既人我已經好滿足，唔需要再去爭名逐利啦。」
一個唔留神我就自己講起上黎，無理到佢兩個添。
李生：「好，我明白啦，強人所難都係無用，甚至可能會弄巧反拙。」
「你走啦，去行自己想行既路，過自己想過既生活啦。」
我：「eh…」
李生：「放心啦我唔秋後算帳既，反正你做七星既時候都已經令我賺多左好多錢。」
「你都叫做稱職，令到七星無偏向一邊，所以我已經滿足啦，之後我會搵人代替你架啦。」
「不過我公司隨時都歡迎你，只要你仲係而家既你，知唔知道？」
我：「知道，多謝李Uncle，另外仲有一件事…」
「吓！！！你認真架？？」
仆街，四條友同時咁樣大叫，我隻耳就快報銷啦。
我：「你地幾個冷靜D先，唔好咁大反應，學下二家姐喇，睇下二家姐佢幾淡定。」
佢地幾個聽完我咁講都望下二家姐，之後就即刻靜哂。
二家姐：「我想聽埋個理由先俾反應啫，點解你要退學？」
「離開七星我可以理解，但點解要離開埋聖所羅王？無咁既必要喎。」
Sarah：「係囉係囉，唔好dup低我地啦…」
我：「唔係啊，今次阿威呢件事令我諗左好多野，亦令我有咁既決定。」
「我地一直都想學校可以安寧，但總係事與願違，硬係有野會發生，到底原因出係邊？」
「經過今次之後我覺得原因係出係我身上。」
Ellen：「點解..咁講既？」
我：「Ellie，睇你表情你應該知道我點解會咁講啦，不如你幫我講，你知我唔係好識講野。」
無錯，Ellie係頭先唯一一個無叫出黎既人，仲保持微笑。
Ellie：「阿明既意思應該係因為佢本來既出身，就算佢做既野係幾咁正確，都會有人唔妥佢，係咪咁？」
我：「無錯啦，而且我而家仲要係學生會主席呢D咁引人注目既位置，肯定會有人不滿，只係而家未表露出黎啫。」
Anna：「阿明你唔好因為阿威而亂諗野啦，阿威只係諗埋左一邊啫，學校入面個個都咁愛戴你，邊度仲會有人想對付你啫。」
Ellen：「係囉係囉，大家而家係學校過得咁開心都係因為你咋，你走左去算點喎。」
我：「而家無啫，邊個敢肯定將來會無？我夠無諗過阿威會…」
我一提到阿威，大家都靜左。
我：「放心啦，學校仲有你地同埋阿惠佢地吖嘛，唔會因為無左我就冧既。」
Sarah：「之但係…」
我：「唔洗但係啦，呢一年我過得比之前三年加埋都開心，咁就已經好夠啦。」
「呢一年我仲可以識到你地，同你地過左好多開心既日子，直頭係恩賜啦。」
Anna：「你咁講即係無打算帶埋我地走..？」
我：「你地走埋的話咁仲有邊個幫我睇住學生會？唔可以俾我地既心血付諸流水架。」
「啪！」
啪一聲，代表又有人被人打左一巴，今次被打既人係我。
打我既人係Anna。
Anna：「陳煒明，你好自私！」
講完佢就一支箭咁走左去，Sarah佢地都跟住一齊走左。
二家姐：「你..唔追？」
我：「唔啦…我一定要走。」
二家姐：「走去邊？你唔覺得你咁做只係逃避？」
我：「可能啦，但我…」
「喂，咁不如轉校去我度？保證你會覺得好玩。」
咦呢把聲係…晨哥！？
我一擰轉臉，就見到晨哥大字型咁坐左係度。
我：「晨哥！！你幾時黎架！」
晨哥：「你咁好失禮呢，我一早就係度啦，你二家姐都係我救架。頭先我仲有份投票添。」
我：「係咩，唔好意思呀…eh…」
晨哥：「講返正經野先，你咁樣放低哂所有野，你捨得咩？」
我：「唯一唔捨得既，應該只有佢地五個啦。」
晨哥：「咁仲丟低佢地，自己一個人走左去？」
我：「我係好想帶埋佢地走，但我發現自己好似去到邊都會惹事咁，我唔想…」
晨哥：「唔想下一次會波及佢地同令佢地再一次為你擔心？」
我：「係啊，畢竟佢地都係我好重視同珍惜既人…」
晨哥：「我明白啦，既然呢個係你既決定，我都無謂多講，唉我返屋企訓教先，眼訓。」
晨哥講完就彈左起身，自己一個人離開。
而家，就得返我同二家姐係度。
二家姐：「你而家打算去邊..？」
我：「哈哈，或者我而家已經無地方可以去啦。」
講真既，我而家返屋企可能會見到Sarah同Yui，到時又會尷尬。
最後得出既結論就係，我根本無地方可以去。
我相信只係比時間佢地幾個，佢地一定會明白我咁做既用意既，問題就係需要時間。
呢段時間，我應該去邊？
二家姐：「跟我黎啦，難得所有野都順順利利咁結束，去食餐飯啦。」
也只能如此啦…
之後我就跟住二家姐飲飲食食，佢仲叫埋大家姐出黎，大家全程都好歡樂。
我地三個人都無提過我想走呢件事，一句都無。
我原本都仲係好放唔開Sarah佢地嬲左我呢件事，好想去搵佢地，個心非常矛盾，不過大家姐果種傻大姐性格好感染到人，加上佢不停咁灌我飲酒，我好快就暫時放開左呢個包袱。
最後我仲要醉埋，唉真係無鬼用。
「佢放唔低既..係Sar..佢地五個..無我…」
我迷迷糊糊咁聽到呢句說話，不過就唔知邊個講既。
到我一睜大眼，我就發現自己訓左係自己張床上。
可能因為飲完酒既關係，我個頭好痛好重，不過奇怪啦，點解連對手都覺得好重，好似用唔到力咁既？
就算我出盡九牛二虎之力，我對手仍然好重，好似有野責住咁。
既然手就郁唔到，咁就郁下個頭，睇下到底咩事啦。
一望向我左右兩邊，我就呆左。
唔怪得用唔到力啦…原來係因為你地…
Sarah，Yui，Anna，Ellen仲有Ellie五個全部訓哂係我左右兩邊，仲責住我兩隻手。
第一次，覺得張床咁大係一件好事。
不過，點解佢地會…
Sarah：「阿明，你醒嗱？」
咦原來Sarah醒左架！？嘩同佢幾乎面貼面，我個心即時跳得快過過山車！
我：「早..早啊…」
Anna：「係咪好surprise點解我地五個都會係度。」
咦！！原來五個都醒左架！！
我：「你地…」
「早晨啊阿明。」
佢地五個同時彈起身，望住我一齊講早晨。
我：「點解你地…你地唔係..？」
Anna：「你想話我地唔係嬲左你咩？」
Ellen：「係架，我地尋日聽到你話dup低我地自己一個走係好嬲架。」
Sarah：「你真係要多得Ellie同Yui係咁幫你講說話吖，唔係我地都唔會咁快原諒你吖！」
到底…發生咩事。
Yui：「我都係相信阿明啫，阿明你有咁既決定一定有你既理由。」
Ellie：「阿明你係打算自己一個走的話，就算日後出左咩事，都唔會波及到我地，係咪？」
Ellie實在太聰明啦。
我：「咁電視都有話過，愈珍惜既野就愈唔可以放係身邊嘛…」
嗱我鳩吹架咋，唔知有無呢句架。
Anna：「Ellie就估到你個傻仔明會係咁，所以尋日先係咁勸我地。」
「一齊走啦，我地六個一齊去讀新學校。」
我：「喂…」
Ellen：「我睇左幾間學校都唔錯架，不如比你地睇下？」
Yui：「我都可以同你地一齊返學..？」
Sarah：「當然可以啦！一齊返學啦！」
我：「喂！！！聽下我講野呀！」
Anna：「做咩呀傻仔明，鬼死咁大聲。」
我：「我咪話左，你地要留係聖所羅王，幫我睇住學校！」
Ellen：「咁點解你自己就可以走，我地幾個唔可以？」
屌，駁唔到。
Sarah：「我地唔係講好左，幾時都要六個人係埋一齊架咩？你想反口？」
更加駁唔到。我真係有咁講過。
Ellie：「我地五個係你女朋友黎架，有福就要同享，有難更加要同當，點可以要你一個人背負起所有野。」
Shit，開始感動添。
Yui係呢個時候走到去我臉前，應該係有野想講。
「啜。」
！！！
Yui咩都無講，只係錫左我一下，大家都嘩然。
Sarah：「好奸呀Yui！」
Ellen：「我又要！」
Anna：「傻仔明！！」
一個吻，結果令到場面變得混亂不堪，我好似一隻被幾個人搶緊既公仔咁，手腳都幾乎被扯斷。
Anna甚至出埋箍頸，不停「問」比唔比佢地跟埋我走，我無辦法，只好投降。
我：「好啦好啦！大家一齊走啦滿意未？」
「好野！錫哂你呀！」
真係無佢地收。
講係咁講，不過我個嘴角始終都係失守，忍唔住笑左。
我真係幸福。
之後返到學校，我大致上同阿惠佢交代哂所有事，包括阿威既事，同埋我地五個退學既事。
我：「咁之後就交俾你啦，新學生會主席。」
阿惠：「大佬明，你真係要走？」
我：「放心啦，會同你顛埋今個學期既。」
阿惠：「我捨不得你~~」
我：「喂咪咁啦，好gay呀。」
阿惠既反應比我想像中更平靜，可能佢夠了解我掛。
淨低既呢兩個幾月，我同佢地幾個每日都無憂無慮咁玩，盡量係離開前製造更多回憶。
最顛既係last day去禮堂打邊爐，最後仲引左十幾人黎食，諗起都開心。
講起last day，last day果日有超多人黎搵我影相，男女都有，甚至連老師都有主動黎搵我影相。
佢地個個都有講同一句說話：
「多謝你，陳煒明。」
或者咁可以算係一個華麗謝幕啦，希望大家都會記得我啦。
再見喇，聖所羅王書院。
我陳煒明，原本只係高登仔一名，在一個機緣巧合之下，靠母幹變成左一個有錢人。 多左三位家姐、一位阿妺，經歷左一年時間之後仲得到五位女朋友，更加曾經成為香港最上層既人。
不過我係得到咁多既同時亦失去左唔少，包括一個好朋友。
去到最後，我選擇離開呢個地方。
我選擇帶同我係呢度得到既人同事物去一個新地方，開展新既生活。
只要有佢地五個同埋屋企人，我就心滿意足，別無他求啦。
以後會點，無人會知，不過正正係因為咁先會令人期待。
幸福又好辛苦都好，我地六個人都會一齊行落去。
-完-