「續寫」無啦啦多左幾個家姐同阿妺: 入侵

我被佢地三個送左返去，仲幾乎抱埋我上床咁濟，好彩係我強力拒絕之下佢地先停手。 

「咁你好好抖下啦，我叫左泳琦留係出面，有乜事你嗌佢啦。」 

大家姐係臨出返去之前咁講。 

我：「嗯，唔該大家姐。」 

Sarah：「阿明你有事都可以搵我架…」 



我：「嗯，多謝你。」 

我向佢地報以一個微笑，以示謝意。 

佢地走哂之後，我先慢慢爬上床。 

我坐係張床上面，望住個天花板，回憶返今日發生既事。 

可惡… 



明明我應承左Anna要拎全場總冠軍比佢… 

明明應承左阿威要贏個仆街… 

明明想借今次機會救Sarah… 

我真係好想贏一次…咁都唔得..？ 

愈諗就愈唔開心，我對住個天花板長嘆左一口氣，仲笑左一下。 



「我真係好失敗。」 

我一邊講一邊喊，但係係笑住咁喊。 

唔…對眼好澀… 

我慢慢張開眼，望下窗外面，個天已經黑哂。 

原來我訓著左… 

隻右腳好似已經唔痛了。 

我嘗試落床行下，睇下仲痛唔痛。 

當我一轉身，我嚇呆左。 



大家姐，二家姐，Sarah，羽晨仲有泳琦坐哂係我間房兩張梳化仔度訓著左。 

可以有呢d屋企人，真係幸福。 

我慢慢行出露台，仲故意放輕腳步，以免嘈醒佢地。 

隻腳真係已經無痛，可惜已經太遲。 

星期一我已經無比賽。 

「阿明…？」 

唔？Sarah把聲？ 



我擰轉頭望，見到佢矇下矇下咁慢慢行過黎。 

我：「你地一直都係度？」 

Sarah：「係吖…家姐話怕你行動唔方便，所以就提議入你房，點知入到去你已經訓左。」 

我：「哈哈…我坐坐下就訓著左…」 

Sarah：「點吖你隻腳？仲痛？」 

我：「唔痛啦，不過都太遲了。」 

我：「對唔住啊，我幫你唔到，結果你都係要同佢去街。」 

我唔敢望住佢講，怕望到佢既反應。 



「唔緊要啦，你都盡左力啦。」 

聽到佢咁講，我偷偷咁望向佢果邊，但我見唔到佢有乜表情，因為佢望住個地下。 

佢應該好唔開心.. 

我一定要諗下辦法先得… 

但諗辦法救Sarah之前，我要諗辦法救自己個肚先，我而家好肚餓… 

「我去叫醒家姐佢地啦，你應該都肚餓架喇。」 

我肚餓你都知你咁厲害既？ 



Sarah好快咁係我身邊走過，走去家姐們身邊叫醒佢地。 

佢地好快就醒左，仲要個個起身第一句說話都係： 

「阿明/哥哥/少爺呢？」 

衰鬼，有少少感動添。 

大家姐：「無事就好喇！咁我地出去食飯喇！」 

二家姐：「好，我都肚餓，近近地去C Hotel食算喇。」 

C Hotel？好貴架喎。 

泳琦：「咁我去準備車先。」 

泳琦講完就出左去。 

我：「咁你地出返去先啦，我要換衫先。」 

大家姐：「等家姐我幫你換咪得囉。」 

二家姐/Sarah：「家姐！」 

我都未比得切反應，Sarah同二家姐就已經搶先出聲。 

之後Sarah同二家姐就帶走左大家姐同羽晨，留低我自己一個。 

唔可以要佢地等太耐。 

我抱住呢種心態，好快咁換好哂衫出去。 

行到去客廳，見到佢地企哂起度，望住個門口。 

咩事呢？ 

我探個頭去望下門口，睇下有邊個係度。 

一望到我就不自覺咁揸緊左拳頭。 

因為企係門口既係仆街偉。