二零五六: 【第一章 時光機？！】

【第一章 時光機？！】
 
2016年9月1日
 
我叫林天澤，今年16歲，今日係開學嘅日子，不過…喺我出門口前，有條友阻住咗我。
 
「你又想點呀…唔好阻住我返學啦！」
 
「Sorry呀，林博士，但係我必須解決你。」
 




「我講咗幾多次，你咁樣做冇用㗎，你係冇可能完成到任務！」
 
喺我眼前嘅，係一個自稱嚟自未來嘅特務，佢日日都過嚟煩住我，已經成兩個月喇，真係好煩。
 
2016年7月6日
 
暑假啱啱開始，阿莫就打嚟搵我。
 
阿莫全名莫天銘，係我最好嘅朋友。
 




「喂，阿澤，好悶呀，出嚟行街？」
 
「但係我想瞓覺。」
 
「放緊暑假就唔好咁頹啦。」
 
「總之我就唔想出街啦。」
 
「OKOK，冇問題，咁我上你屋企？」
 




「是但你。」
 
十五分鐘後，阿莫上咗嚟。
 
「做咩毒撚吖，出下街啦。我聽講龍珠出咗新漫畫，一齊去睇下？順便用下你啲獎學金。」
 
「咁仲等咩呀？行啦！」
 
之後，我就同佢出咗街，咁啱又係中午，我哋就走去食飯先。
 
食食下飯，隔離枱就坐低咗個西裝友。
 
佢入到嚟室內，都仍然戴住黑超，又帶哂耳機咁，個人又高大，總之睇落就成個保鏢咁。
 
呢樣都唔係最奇怪，最奇怪嘅係，呢個西裝友一路食飯就一路望住我，搞到我成餐飯都食得好唔自在。




 
好喇，終於食完飯，諗住埋單走人啦，正當我攞緊錢出嚟嘅時候…
 
「啱啱個西裝友幫你哋埋咗單喇喎。」老闆唔為意咁講咗句。
 
「吓？我哋唔識佢㗎喎...」
 
「總之你兩個唔使俾錢啦。快啲走啦，咪阻住我做生意。」
 
「吓…」
 
正當我喺度諗緊發生咩事嘅時候…Shit！個西裝友企咗喺門口！唔通佢等緊我？！
 
但係要離開餐廳，得一道門可以出，又冇後門，唯有頂硬上！
 




於是我就望住地下，避免同個西裝友有眼神接觸，一路行出餐廳。
 
突然間有把聲叫住我。
 
「林天澤！請問你係咪林天澤？」
 
仆街...係咪個西裝友叫我？
 
「喂，條友好似叫你喎。」阿莫用手肘輕輕撞咗我一下。
 
「咁而家點算呀？」
 
「應佢囉。唔係咩呀。」
 
真係仆你個街。




 
於是我勉為其難，就轉身望向個西裝友。
 
「咩...咩事呀？」
 
「你好，林天澤博士。我係嚟自2056年嘅特務。我叫馬泰。」
 
「咩話？2056年？」
 
其實我得閒都會睇吓科幻小說。對穿越時空嘅嘢都好有興趣，所以一聽到個西裝友話佢係嚟自2056年，我真係嚇咗一跳。
 
「冇錯，而我嚟2016年嘅目標，係要解決你。」
 
「解決？啫係要殺咗我？」
 




「解決，唔一定係殺嘅。我嘅意思係，令你嘅未來改變。」
 
「點解要改變先？」
 
「呢件事說來話長...因為你喺未來製造咗時光機。」
 
「吓？時光機？！」

待續…