【第十一章 危機】
 
「哈哈哈…估唔到我同邱一晉約喺公園等,咁快就見到你…我哋終於見面喇,年幼嘅林天澤。」
 
「范子軒…」
 
後面嘅特務用手勒住我條頸,攞咗條手巾出嚟掩住我個鼻。我當然知道係攞嚟整暈我。
 
「林天澤!唔好唞氣呀!」
 


遠處傳嚟未來林天澤把聲。
 
「連大人林天澤都喺度,咁齊人呀!哈哈哈!」
 
「F!你究竟想點?」
 
未來林天澤一邊跑過嚟,一邊質問F。
 
「我要令你冇得做科學家!冇得出名!」
 


呢個時候我閉氣都到咗極限,所以我一腳向前踢,踢落F隻腳度。邱一晉禁住我個鼻嗰隻手都鬆開咗。
 
「哎呀!」 但係我仍然俾邱一晉捉住,走唔甩。
 
「捉佢走!」
 
邱一晉趁我唔為意,又再次將條手巾放咗喺我個鼻度,今次我中咗計,暈咗。
 
「唔好啊!」
 


「哈哈哈!Bye bye!」
 
之後,F同邱一晉,連埋我一齊消失咗。冇錯,又穿越咗時空。
 
2056年10月3日
 
我張開眼,發現自己喺一個類似手術室嘅地方,有幾盞燈都照住我。
 
自己企咗喺一個密封嘅玻璃艙入面,而我嘅身體同手腳就比人鎖住咗。
 
「醒喇?年輕林天澤。」
 
一個帶住F字面具嘅人行咗埋嚟。我認得呢把聲。
 
「F!你想點?」


 
「我要你生不如死!」
 
之後佢攞咗一支試管出嚟,入面裝住咗一啲綠色嘅液體。
 
「呢支係我嘅科學家團隊調製出嚟嘅藥水,只要用咗佢,就可以令你變成一個傻仔!到時唔好講話學霸,學渣你都冇得做!」
 
「咁樣有意義咩?你只會害咗你自己咋!」
 
「你知唔知,我對你嘅恨係有幾深?由細到大,讀書都叻過我,我同你講嘢,你就敷衍我,而家仲要有成就過我!我已經受夠喇!」
 
「但係你大個咗之後都成功過我呀!建立新中國,又做埋全國首富,你仲未滿足咩?」
 
「係呀!我未滿足呀!我妒忌你呀!點吖?」
 


「收手啦,你而家都已經有財有勢啦,我嘅存在真係咁阻到你嘅人生咩?」
 
「你一日仲生存喺呢個世界,我一日都唔會安樂!」
 
「就算俾你洗到我腦,呢個世界都仲有千千萬萬個天才林天澤!」
 
「收聲呀!我唔想聽你嗰種謬論!總之而家我要洗你腦!人嚟!」
 
之後有幾個西裝友行咗過嚟,將嗰支綠色藥水倒入我隔離嘅一部機器度。 呢個時候F行咗埋部機度。
 
「只要一禁咗呢個掣,藥水就會噴出嚟,你一吸咗呢啲藥水,就會變成一個傻仔!哈哈!」
 
我好嬲,又好驚,但係就咩都做唔到。
 
「停手!」


 
係未來林天澤!
 
「林天澤?!」
 
「范子軒,我唔會俾你得逞!」
 
突然間,我身邊其中一個西裝友一腳踢爆咗個玻璃罩!又將我手腳嘅鎖解開咗!
 
我睇真啲,原來個西裝友係馬泰!
 
「馬泰?你唔係應該喺醫院架咩?」
 
F見到馬泰都好驚訝。
 


「今日我仲喺醫院…不過兩個月後就唔再係喇。」
 
「你嘅意思係…」
 
未來林天澤都開聲。
 
「呢個馬泰,係由12月過嚟嘅。」
 
「你呢個二五仔!」
 
「我喺醫院住嘅兩個月時間,都喺度諗,究竟我幫你做事,執行呢啲任務,係啱定唔啱。最尾,我終於諗通咗,我發現,我應該要幫嘅,係博士!」
 
「你…!」
 
馬泰已經冇理過F,佢而家留意嘅係要救我。
 
「走啦細林博士!」
 
「咁你點?」
 
「我自己對付到佢哋。放心,我係空手道黑帶。」
 
「小心。」
 
「嗯。」
 
我同未來林天澤都衝咗出手術室,之後我哋就開始搵路出去。
 
好彩一路上都冇F嘅手下,我哋好快就離開咗。
 
「我哋而家究竟喺邊度?」
 
我俾人迷暈咗之後就嚟到咗手術室,我連自己喺邊個年代都未知。
 
「係喎,你啱啱暈咗。我哋而家喺2056年嘅F公司總部。」
 
「2056年?啫係…我而家喺未來?」
 
「冇錯,所以我哋而家仍然係好危險。」
 
「而家點算?」
 
「我同你返去2016年。避到就避啦。」
 
同時,F公司總部內。
 
「馬泰…估唔到你係二五仔一個…」
 
「F,你做緊嘅事唔係好事!停手啦!」
 
「我唔識分咩叫好事咩叫壞事!總之阻我做事嘅人就要死!上!」
 
F身邊嘅五個特務都向馬泰衝去。
 
然而馬泰佢雖然頭腦簡單,但係佢嘅四肢都好發達!
 
佢三兩下功夫又搞掂咗四個特務。
 
而家喺馬泰眼前,剩返一個特務... 邱一晉。
 
邱一晉跑向馬泰,馬泰一拳向佢揮去。
 
只見邱一晉靈活咁彎低上身,避開咗馬泰嘅拳頭,再一拳打落馬泰個肚度。
 
受到呢一擊嘅馬泰,即刻將雙手放喺肚度,身體好自然咁彎低。
 
邱一晉見到呢個機會,即刻批掙落馬泰個頭度,打到馬泰成個人趴低咗。
 
「Mr. F,你可以解決佢喇。」
 
邱一晉示意俾F殺佢。
 
F攞出手槍,槍口指住馬泰個頭。
 
結果出人意表,F放低咗隻手,冇開到槍。
 
「馬泰,我要殺嘅人唔係你。你走啦,我以後唔想再見到你。」
 
「士可殺,不可辱。我寧願你殺我。」
 
趴喺地下嘅馬泰,講出咗呢句說話。
 
「咁我唯有...」
 
「砰!」
 
F開咗槍,但係...馬泰消失咗。
 
「唔見咗?算啦。」
 
F雖然感到驚訝,但係都無可奈何。
 
2016年10月3日,荒廢學校二樓。
 
「呢度係...天堂?」
 
「呢度係2016年,馬泰,你冇死到。」
 
「大林博士,我已經係一個敗者,點解你要救我?」
 
「因為...你係我哋嘅同伴。」
 
我經歷咗咁多事,一時間個腦都未load到。
 
「究竟喺我俾邱一晉迷暈咗之後,發生咗咩事?」
 
「等我哋慢慢同你解釋啦...」
 
未來林天澤同馬泰異口同聲。
 
待續...